౧-౭. పటిచ్చవారాది

పచ్చయచతుక్కం

౧౧. నదస్సనేన పహాతబ్బహేతుకం కుసలం ధమ్మ పటిచ్చ నదస్సనేన పహాతబ్బహేతుకో కుసలో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)

౧౨. దస్సనేన పహాతబ్బహేతుకం అకుసలం ధమ్మం పటిచ్చ దస్సనేన పహాతబ్బహేతుకో అకుసలో ధమ్మో ఉప్పజ్జతి హేతుపచ్చయా. (౧)

నదస్సనేన పహాతబ్బహేతుకం అకుసలం ధమ్మం పటిచ్చ నదస్సనేన పహాతబ్బహేతుకో అకుసలో ధమ్మో ఉప్పజ్జతి హేతుపచ్చయా. నదస్సనేన పహాతబ్బహేతుకం అకుసలం ధమ్మం పటిచ్చ దస్సనేన పహాతబ్బహేతుకో అకుసలో ధమ్మో ఉప్పజ్జతి హేతుపచ్చయా. (౨)

దస్సనేన పహాతబ్బహేతుకం అకుసలఞ్చ నదస్సనేన పహాతబ్బహేతుకం అకుసలఞ్చ ధమ్మం పటిచ్చ దస్సనేన పహాతబ్బహేతుకో అకుసలో ధమ్మో ఉప్పజ్జతి హేతుపచ్చయా. (౧)

దస్సనేన పహాతబ్బహేతుకం అకుసలం ధమ్మం పటిచ్చ దస్సనేన పహాతబ్బహేతుకో అకుసలో ధమ్మో ఉప్పజ్జతి ఆరమ్మణపచ్చయా… తీణి (నదస్సనే ద్వే, ఘటనే ఏకం, సంఖిత్తం).

౧౩. హేతుయా చత్తారి, ఆరమ్మణే ఛ, అధిపతియా ద్వే (సబ్బత్థ ఛ), అవిగతే ఛ (సంఖిత్తం).

౧౪. దస్సనేన పహాతబ్బహేతుకం అకుసలం ధమ్మం పటిచ్చ నదస్సనేన పహాతబ్బహేతుకో అకుసలో ధమ్మో ఉప్పజ్జతి నహేతుపచ్చయా.

నదస్సనేన పహాతబ్బహేతుకం అకుసలం ధమ్మం పటిచ్చ నదస్సనేన పహాతబ్బహేతుకో అకుసలో ధమ్మో ఉప్పజ్జతి నహేతుపచ్చయా (సంఖిత్తం).

౧౫. నహేతుయా ద్వే, నఅధిపతియా ఛ…పే… నకమ్మే చత్తారి, నవిపాకే ఛ, నవిప్పయుత్తే ఛ (సంఖిత్తం. సహజాతవారాది విత్థారేతబ్బో).

౧౬. దస్సనేన పహాతబ్బహేతుకో అకుసలో ధమ్మో దస్సనేన పహాతబ్బహేతుకస్స అకుసలస్స ధమ్మస్స హేతుపచ్చయేన పచ్చయో (సంఖిత్తం).

౧౭. హేతుయా తీణి, ఆరమ్మణే నవ, అధిపతియా తీణి (దస్సనే ఏకం, నదస్సనే ద్వే), అనన్తరే నవ, సమనన్తరే నవ, సహజాతే ఛ…పే… ఉపనిస్సయే నవ, ఆసేవనే నవ, కమ్మే చత్తారి, ఆహారే చత్తారి, ఇన్ద్రియే చత్తారి…పే… సమ్పయుత్తే ఛ, అత్థియా ఛ, నత్థియా నవ…పే… అవిగతే ఛ (సంఖిత్తం).

౧౮. నదస్సనేన పహాతబ్బహేతుకం అబ్యాకతం ధమ్మం పటిచ్చ నదస్సనేన పహాతబ్బహేతుకో అబ్యాకతో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)