౧-౭. పటిచ్చవారాది

పచ్చయచతుక్కం

౭౧. రూపావచరం కుసలం ధమ్మం పటిచ్చ రూపావచరో కుసలో ధమ్మో ఉప్పజ్జతి హేతుపచ్చయా. (౧)

నరూపావచరం కుసలం ధమ్మం పటిచ్చ నరూపావచరో కుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౭౨. హేతుయా ద్వే, ఆరమ్మణే ద్వే (సబ్బత్థ ద్వే, సంఖిత్తం).

నఅధిపతియా ద్వే…పే… నపురేజాతే ఏకం, నఆసేవనే ఏకం…పే… నవిప్పయుత్తే ఏకం (సంఖిత్తం. సహజాతవారాది విత్థారేతబ్బో).

౭౩. రూపావచరో కుసలో ధమ్మో రూపావచరస్స కుసలస్స ధమ్మస్స హేతుపచ్చయేన పచ్చయో. (౧)

నరూపావచరో కుసలో ధమ్మో నరూపావచరస్స కుసలస్స ధమ్మస్స హేతుపచ్చయేన పచ్చయో. (౧) (సంఖిత్తం.)

౭౪. హేతుయా ద్వే, ఆరమ్మణే చత్తారి, అధిపతియా తీణి (రూపావచరే ఏకం, సహజాతాధిపతియేవ, నరూపావచరే ద్వే), అనన్తరే తీణి (రూపావచరే ఏకం, నరూపావచరే ద్వే), సమనన్తరే తీణి, సహజాతే ద్వే…పే… ఉపనిస్సయే చత్తారి, ఆసేవనే తీణి, కమ్మే ద్వే…పే… అత్థియా ద్వే, నత్థియా తీణి…పే… అవిగతే ద్వే (సంఖిత్తం).

౭౫. నరూపావచరం అకుసలం ధమ్మం పటిచ్చ నరూపావచరో అకుసలో ధమ్మో ఉప్పజ్జతి హేతుపచ్చయా (సబ్బత్థ ఏకం).

రూపావచరం అబ్యాకతం ధమ్మం పటిచ్చ రూపావచరో అబ్యాకతో ధమ్మో ఉప్పజ్జతి హేతుపచ్చయా… తీణి.

నరూపావచరం అబ్యాకతం ధమ్మం పటిచ్చ నరూపావచరో అబ్యాకతో ధమ్మో ఉప్పజ్జతి హేతుపచ్చయా… తీణి.

రూపావచరం అబ్యాకతఞ్చ నరూపావచరం అబ్యాకతఞ్చ ధమ్మం పటిచ్చ రూపావచరో అబ్యాకతో ధమ్మో ఉప్పజ్జతి హేతుపచ్చయా… తీణి (సంఖిత్తం).

౭౬. హేతుయా నవ, ఆరమ్మణే చత్తారి, అధిపతియా పఞ్చ…పే… పురేజాతే ఆసేవనే ద్వే…పే… అవిగతే నవ (సంఖిత్తం. యథా కామావచరదుకఅబ్యాకతసదిసం, ఏత్తకాయేవ పఞ్హా హేట్ఠుపరికం పరివత్తన్తి. సహజాతవారమ్పి…పే… పఞ్హావారమ్పి సబ్బత్థ విత్థారేతబ్బం).