౧-౭. పటిచ్చవారాది

పచ్చయచతుక్కం

౪౫. సప్పీతికం కుసలం ధమ్మం పటిచ్చ సప్పీతికో కుసలో ధమ్మో ఉప్పజ్జతి హేతుపచ్చయా. సప్పీతికం కుసలం ధమ్మం పటిచ్చ అప్పీతికో కుసలో ధమ్మో ఉప్పజ్జతి హేతుపచ్చయా. సప్పీతికం కుసలం ధమ్మం పటిచ్చ సప్పీతికో కుసలో చ అప్పీతికో కుసలో చ ధమ్మా ఉప్పజ్జన్తి హేతుపచ్చయా. (౩)

అప్పీతికం కుసలం ధమ్మం పటిచ్చ అప్పీతికో కుసలో ధమ్మో ఉప్పజ్జతి హేతుపచ్చయా. అప్పీతికం కుసలం ధమ్మం పటిచ్చ సప్పీతికో కుసలో ధమ్మో ఉప్పజ్జతి హేతుపచ్చయా. (౨)

సప్పీతికం కుసలఞ్చ అప్పీతికం కుసలఞ్చ ధమ్మం పటిచ్చ సప్పీతికో కుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౪౬. హేతుయా ఛ (సబ్బత్థ ఛ)…పే… అవిగతే ఛ (సంఖిత్తం).

నఅధిపతియా ఛ, నపురేజాతే ఛ…పే… నకమ్మే చత్తారి, నవిప్పయుత్తే ఛ (సంఖిత్తం. సహజాతవారమ్పి …పే… సమ్పయుత్తవారమ్పి విత్థారేతబ్బం).

౪౭. సప్పీతికో కుసలో ధమ్మో సప్పీతికస్స కుసలస్స ధమ్మస్స హేతుపచ్చయేన పచ్చయో… తీణి.

అప్పీతికో కుసలో ధమ్మో అప్పీతికస్స కుసలస్స ధమ్మస్స హేతుపచ్చయేన పచ్చయో. (౧)

సప్పీతికో కుసలో ధమ్మో సప్పీతికస్స కుసలస్స ధమ్మస్స ఆరమ్మణపచ్చయేన పచ్చయో (సంఖిత్తం).

౪౮. హేతుయా చత్తారి, ఆరమ్మణే నవ, అధిపతియా నవ (చత్తారి సహజాతాధిపతి), అనన్తరే నవ, సమనన్తరే నవ, సహజాతే ఛ…పే… ఉపనిస్సయే నవ, ఆసేవనే నవ, కమ్మే చత్తారి, ఆహారే చత్తారి, ఇన్ద్రియే చత్తారి, ఝానే ఛ, మగ్గే చత్తారి, సమ్పయుత్తే ఛ, అత్థియా ఛ, నత్థియా నవ, విగతే నవ, అవిగతే ఛ (సంఖిత్తం).

నహేతుయా నవ, నఆరమ్మణే నవ (సంఖిత్తం).

హేతుపచ్చయా నఆరమ్మణే చత్తారి (సంఖిత్తం).

నహేతుపచ్చయా ఆరమ్మణే నవ (సంఖిత్తం).

(యథా కుసలత్తికే పఞ్హావారం, ఏవం విత్థారేతబ్బం.)

అకుసలపదం

హేతుపచ్చయో

౪౯. సప్పీతికం అకుసలం ధమ్మం పటిచ్చ సప్పీతికో అకుసలో ధమ్మో ఉప్పజ్జతి హేతుపచ్చయా… తీణి.

అప్పీతికం అకుసలం ధమ్మం పటిచ్చ అప్పీతికో అకుసలో ధమ్మో ఉప్పజ్జతి హేతుపచ్చయా… ద్వే.

సప్పీతికం అకుసలఞ్చ అప్పీతికం అకుసలఞ్చ ధమ్మం పటిచ్చ సప్పీతికో అకుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౫౦. హేతుయా ఛ, ఆరమ్మణే ఛ…పే… అవిగతే ఛ (సంఖిత్తం. కుసలసదిసం. సహజాతవారోపి…పే… పఞ్హావారోపి విత్థారేతబ్బా).

అబ్యాకతపదం

హేతుపచ్చయో

౫౧. సప్పీతికం అబ్యాకతం ధమ్మం పటిచ్చ సప్పీతికో అబ్యాకతో ధమ్మో ఉప్పజ్జతి హేతుపచ్చయా… తీణి.

అప్పీతికం అబ్యాకతం ధమ్మం పటిచ్చ అప్పీతికో అబ్యాకతో ధమ్మో ఉప్పజ్జతి హేతుపచ్చయా… తీణి.

సప్పీతికం అబ్యాకతఞ్చ అప్పీతికం అబ్యాకతఞ్చ ధమ్మం పటిచ్చ సప్పీతికో అబ్యాకతో ధమ్మో ఉప్పజ్జతి హేతుపచ్చయా… తీణి (సంఖిత్తం).

౫౨. హేతుయా నవ, ఆరమ్మణే నవ…పే… పురేజాతే ఛ, ఆసేవనే ఛ…పే… అవిగతే నవ (సంఖిత్తం).

నహేతుయా నవ, నఆరమ్మణే తీణి, నఅధిపతియా నవ…పే… నకమ్మే చత్తారి, నవిపాకే నవ, నఆహారే ఏకం, నఇన్ద్రియే ఏకం, నఝానే ఏకం, నమగ్గే నవ, నసమ్పయుత్తే తీణి, నవిప్పయుత్తే ఛ…పే… (సంఖిత్తం. సహజాతవారాది విత్థారేతబ్బో).

౫౩. సప్పీతికో అబ్యాకతో ధమ్మో సప్పీతికస్స అబ్యాకతస్స ధమ్మస్స హేతుపచ్చయేన పచ్చయో (సంఖిత్తం).

౫౪. హేతుయా చత్తారి, ఆరమ్మణే నవ, అధిపతియా నవ, అనన్తరే నవ…పే… (సబ్బత్థ నవ), ఉపనిస్సయే నవ, పురేజాతే తీణి, పచ్ఛాజాతే తీణి, ఆసేవనే నవ, కమ్మే చత్తారి, విపాకే నవ, ఆహారే చత్తారి, ఇన్ద్రియే చత్తారి, ఝానే నవ, మగ్గే చత్తారి, సమ్పయుత్తే ఛ, విప్పయుత్తే పఞ్చ, అత్థియా నవ…పే… అవిగతే నవ (సంఖిత్తం).