౧-౭. పటిచ్చవారాది

పచ్చయచతుక్కం

౩౭. సవిచారం కుసలం ధమ్మం పటిచ్చ సవిచారో కుసలో ధమ్మో ఉప్పజ్జతి హేతుపచ్చయా… తీణి.

అవిచారం కుసలం ధమ్మం పటిచ్చ అవిచారో కుసలో ధమ్మో ఉప్పజ్జతి హేతుపచ్చయా… ద్వే.

సవిచారం కుసలఞ్చ అవిచారం కుసలఞ్చ ధమ్మం పటిచ్చ సవిచారో కుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౩౮. హేతుయా ఛ, ఆరమ్మణే ఛ…పే… అవిగతే ఛ (సంఖిత్తం. సవితక్కదుకకుసలసదిసం. సహజాతవారమ్పి…పే… పఞ్హావారమ్పి విత్థారేతబ్బం).

౩౯. సవిచారం అకుసలం ధమ్మం పటిచ్చ సవిచారో అకుసలో ధమ్మో ఉప్పజ్జతి హేతుపచ్చయా… తీణి.

అవిచారం అకుసలం ధమ్మం పటిచ్చ సవిచారో అకుసలో ధమ్మో ఉప్పజ్జతి హేతుపచ్చయా. (౧)

సవిచారం అకుసలఞ్చ అవిచారం అకుసలఞ్చ ధమ్మం పటిచ్చ సవిచారో అకుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౪౦. హేతుయా పఞ్చ, ఆరమ్మణే పఞ్చ…పే… అవిగతే పఞ్చ (సంఖిత్తం. సవితక్కదుకఅకుసలసదిసం. సహజాతవారమ్పి…పే… పఞ్హావారమ్పి విత్థారేతబ్బం).

౪౧. సవిచారం అబ్యాకతం ధమ్మం పటిచ్చ సవిచారో అబ్యాకతో ధమ్మో ఉప్పజ్జతి హేతుపచ్చయా… తీణి.

అవిచారం అబ్యాకతం ధమ్మం పటిచ్చ అవిచారో అబ్యాకతో ధమ్మో ఉప్పజ్జతి హేతుపచ్చయా… తీణి.

సవిచారం అబ్యాకతఞ్చ అవిచారం అబ్యాకతఞ్చ ధమ్మం పటిచ్చ సవిచారో అబ్యాకతో ధమ్మో ఉప్పజ్జతి హేతుపచ్చయా… తీణి (సంఖిత్తం).

౪౨. హేతుయా నవ, ఆరమ్మణే నవ…పే… విపాకే నవ…పే… అవిగతే నవ (సంఖిత్తం. సవితక్కదుకఅబ్యాకతసదిసం. సహజాతవారోపి…పే… సమ్పయుత్తవారోపి విత్థారేతబ్బా).

౪౩. సవిచారో అబ్యాకతో ధమ్మో సవిచారస్స అబ్యాకతస్స ధమ్మస్స హేతుపచ్చయేన పచ్చయో (సంఖిత్తం).

౪౪. హేతుయా చత్తారి, ఆరమ్మణే నవ…పే… మగ్గే చత్తారి …పే… అవిగతే నవ (సంఖిత్తం).

నహేతుయా నవ, నఆరమ్మణే నవ (సంఖిత్తం).

హేతుపచ్చయా నఆరమ్మణే చత్తారి (సంఖిత్తం).

నహేతుపచ్చయా ఆరమ్మణే నవ (సంఖిత్తం).

(యథా కుసలత్తికే పఞ్హావారం, ఏవం విత్థారేతబ్బం.)