౧-౭. పటిచ్చవారాది

పచ్చయచతుక్కం

౨౮. కిలేసవిప్పయుత్తం సంకిలేసికం కుసలం ధమ్మం పటిచ్చ కిలేసవిప్పయుత్తో సంకిలేసికో కుసలో ధమ్మో ఉప్పజ్జతి హేతుపచ్చయా. (౧)

కిలేసవిప్పయుత్తం అసంకిలేసికం కుసలం ధమ్మం పటిచ్చ కిలేసవిప్పయుత్తో అసంకిలేసికో కుసలో ధమ్మో ఉప్పజ్జతి హేతుపచ్చయా (సంఖిత్తం).

౨౯. హేతుయా ద్వే, ఆరమ్మణే ద్వే…పే… అవిగతే ద్వే (సంఖిత్తం. లోకియదుకకుసలసదిసం. సహజాతవారేపి…పే… పఞ్హావారేపి విత్థారేతబ్బం).

౩౦. కిలేసవిప్పయుత్తం సంకిలేసికం అబ్యాకతం ధమ్మం పటిచ్చ కిలేసవిప్పయుత్తో సంకిలేసికో అబ్యాకతో ధమ్మో ఉప్పజ్జతి హేతుపచ్చయా. (౧)

కిలేసవిప్పయుత్తం అసంకిలేసికం అబ్యాకతం ధమ్మం పటిచ్చ కిలేసవిప్పయుత్తో అసంకిలేసికో అబ్యాకతో ధమ్మో ఉప్పజ్జతి హేతుపచ్చయా… తీణి.

కిలేసవిప్పయుత్తం సంకిలేసికం అబ్యాకతఞ్చ కిలేసవిప్పయుత్తం అసంకిలేసికం అబ్యాకతఞ్చ ధమ్మం పటిచ్చ కిలేసవిప్పయుత్తో సంకిలేసికో అబ్యాకతో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౩౧. హేతుయా పఞ్చ, ఆరమ్మణే ద్వే…పే… ఆసేవనే ఏకం…పే… అవిగతే పఞ్చ (సంఖిత్తం. లోకియదుకఅబ్యాకతసదిసం. సహజాతవారేపి…పే… పఞ్హావారేపి సబ్బత్థ విత్థారేతబ్బం).

కిలేసగోచ్ఛకకుసలత్తికం నిట్ఠితం.