౬౯-౧. ఉపాదానదుక-కుసలత్తికం

౧-౭. పటిచ్చవారాది

పచ్చయచతుక్కం

౧. నోఉపాదానం కుసలం ధమ్మం పటిచ్చ నోఉపాదానో కుసలో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)

౨. ఉపాదానం అకుసలం ధమ్మం పటిచ్చ ఉపాదానో అకుసలో ధమ్మో ఉప్పజ్జతి హేతుపచ్చయా. ఉపాదానం అకుసలం ధమ్మం పటిచ్చ నోఉపాదానో అకుసలో ధమ్మో ఉప్పజ్జతి హేతుపచ్చయా. ఉపాదానం అకుసలం ధమ్మం పటిచ్చ ఉపాదానో అకుసలో చ నోఉపాదానో అకుసలో చ ధమ్మా ఉప్పజ్జన్తి హేతుపచ్చయా. (౩)

నోఉపాదానం అకుసలం ధమ్మం పటిచ్చ నోఉపాదానో అకుసలో ధమ్మో ఉప్పజ్జతి హేతుపచ్చయా… తీణి.

ఉపాదానం అకుసలఞ్చ నోఉపాదానం అకుసలఞ్చ ధమ్మం పటిచ్చ ఉపాదానో అకుసలో ధమ్మో ఉప్పజ్జతి హేతుపచ్చయా… తీణి (సంఖిత్తం).

౩. హేతుయా నవ, ఆరమ్మణే నవ (సబ్బత్థ నవ), అవిగతే నవ (సంఖిత్తం).

౪. నోఉపాదానం అకుసలం ధమ్మం పటిచ్చ నోఉపాదానో అకుసలో ధమ్మో ఉప్పజ్జతి నహేతుపచ్చయా (సంఖిత్తం).

౫. నహేతుయా ఏకం, నఅధిపతియా నవ, నపురేజాతే నవ…పే… నకమ్మే తీణి, నవిపాకే నవ, నవిప్పయుత్తే నవ (సంఖిత్తం. సహజాతవారాది విత్థారేతబ్బో).

౬. ఉపాదానో అకుసలో ధమ్మో ఉపాదానస్స అకుసలస్స ధమ్మస్స హేతుపచ్చయేన పచ్చయో (సంఖిత్తం).

౭. హేతుయా నవ, ఆరమ్మణే నవ, అధిపతియా నవ (నోఉపాదానమూలకే తీణి, సహజాతాధిపతి), అనన్తరే నవ…పే… నిస్సయే నవ, ఉపనిస్సయే నవ, ఆసేవనే నవ, కమ్మే తీణి (నోఉపాదానమూలకే), ఆహారే తీణి, ఇన్ద్రియే తీణి, ఝానే తీణి, మగ్గే నవ, సమ్పయుత్తే నవ, అత్థియా నవ…పే… అవిగతే నవ (సంఖిత్తం).

౮. నోఉపాదానం అబ్యాకతం ధమ్మం పటిచ్చ నోఉపాదానో అబ్యాకతో ధమ్మో ఉప్పజ్జతి హేతుపచ్చయా (సంఖిత్తం).

౯. హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)

౭౦-౧. ఉపాదానియదుక-కుసలత్తికం

౧-౭. పటిచ్చవారాది

పచ్చయచతుక్కం

హేతుపచ్చయో

౧౦. ఉపాదానియం కుసలం ధమ్మం పటిచ్చ ఉపాదానియో కుసలో ధమ్మో ఉప్పజ్జతి హేతుపచ్చయా. (౧)

అనుపాదానియం కుసలం ధమ్మం పటిచ్చ అనుపాదానియో కుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౧౧. హేతుయా ద్వే, ఆరమ్మణే ద్వే…పే… అవిగతే ద్వే (సంఖిత్తం. లోకియలోకుత్తరదుకకుసలసదిసం. సహజాతవారమ్పి…పే… పఞ్హావారమ్పి విత్థారేతబ్బం.)

౧౨. ఉపాదానియం అకుసలం ధమ్మం పటిచ్చ ఉపాదానియో అకుసలో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)

౧౩. ఉపాదానియం అబ్యాకతం ధమ్మం పటిచ్చ ఉపాదానియో అబ్యాకతో ధమ్మో ఉప్పజ్జతి హేతుపచ్చయా. (౧)

అనుపాదానియం అబ్యాకతం ధమ్మం పటిచ్చ అనుపాదానియో అబ్యాకతో ధమ్మో ఉప్పజ్జతి హేతుపచ్చయా. అనుపాదానియం అబ్యాకతం ధమ్మం పటిచ్చ ఉపాదానియో అబ్యాకతో ధమ్మో ఉప్పజ్జతి హేతుపచ్చయా. అనుపాదానియం అబ్యాకతం ధమ్మం పటిచ్చ ఉపాదానియో అబ్యాకతో చ అనుపాదానియో అబ్యాకతో చ ధమ్మా ఉప్పజ్జన్తి హేతుపచ్చయా. (౩)

ఉపాదానియం అబ్యాకతఞ్చ అనుపాదానియం అబ్యాకతఞ్చ ధమ్మం పటిచ్చ ఉపాదానియో అబ్యాకతో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౧౪. హేతుయా పఞ్చ, ఆరమ్మణే ద్వే…పే… ఆసేవనే ఏకం…పే… అవిగతే పఞ్చ (సంఖిత్తం. లోకియదుకఅబ్యాకతసదిసం. సహజాతవారమ్పి…పే… పఞ్హావారమ్పి విత్థారేతబ్బం).

౭౧-౧. ఉపాదానసమ్పయుత్తదుక-కుసలత్తికం

౧-౭. పటిచ్చవారాది

పచ్చయచతుక్కం

హేతుపచ్చయో

౧౫. ఉపాదానవిప్పయుత్తం కుసలం ధమ్మం పటిచ్చ ఉపాదానవిప్పయుత్తో కుసలో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)

౧౬. ఉపాదానసమ్పయుత్తం అకుసలం ధమ్మం పటిచ్చ ఉపాదానసమ్పయుత్తో అకుసలో ధమ్మో ఉప్పజ్జతి హేతుపచ్చయా… తీణి.

ఉపాదానవిప్పయుత్తం అకుసలం ధమ్మం పటిచ్చ ఉపాదానవిప్పయుత్తో అకుసలో ధమ్మో ఉప్పజ్జతి హేతుపచ్చయా… ద్వే.

ఉపాదానసమ్పయుత్తం అకుసలఞ్చ ఉపాదానవిప్పయుత్తం అకుసలఞ్చ ధమ్మం పటిచ్చ ఉపాదానసమ్పయుత్తో అకుసలో ధమ్మో ఉప్పజ్జతి హేతుపచ్చయా (సంఖిత్తం).

౧౭. హేతుయా ఛ, ఆరమ్మణే ఛ (సబ్బత్థ ఛ), అవిగతే ఛ (సంఖిత్తం).

నహేతుయా ఏకం, నఅధిపతియా ఛ…పే… నకమ్మే చత్తారి, నవిపాకే ఛ, నవిప్పయుత్తే ఛ (సంఖిత్తం. సహజాతవారాది విత్థారేతబ్బో).

౧౮. ఉపాదానసమ్పయుత్తో అకుసలో ధమ్మో ఉపాదానసమ్పయుత్తస్స అకుసలస్స ధమ్మస్స హేతుపచ్చయేన పచ్చయో… తీణి.

ఉపాదానవిప్పయుత్తో అకుసలో ధమ్మో ఉపాదానవిప్పయుత్తస్స అకుసలస్స ధమ్మస్స హేతుపచ్చయేన పచ్చయో… ద్వే.

ఉపాదానసమ్పయుత్తో అకుసలో చ ఉపాదానవిప్పయుత్తో అకుసలో చ ధమ్మా ఉపాదానసమ్పయుత్తస్స అకుసలస్స ధమ్మస్స హేతుపచ్చయేన పచ్చయో (సంఖిత్తం).

౧౯. హేతుయా ఛ, ఆరమ్మణే నవ, అధిపతియా నవ (ఉపాదానసమ్పయుత్తమూలకే తీణి, సహజాతాధిపతి, ఉపాదానవిప్పయుత్తే ఏకం), అనన్తరే నవ, సమనన్తరే నవ, సహజాతే ఛ, అఞ్ఞమఞ్ఞే ఛ, నిస్సయే ఛ, ఉపనిస్సయే నవ, ఆసేవనే నవ, కమ్మే చత్తారి, ఆహారే చత్తారి, ఇన్ద్రియే చత్తారి, ఝానే చత్తారి, మగ్గే చత్తారి, సమ్పయుత్తే ఛ, అత్థియా ఛ, నత్థియా నవ, విగతే నవ, అవిగతే ఛ (సంఖిత్తం).

౨౦. ఉపాదానవిప్పయుత్తం అబ్యాకతం ధమ్మం పటిచ్చ ఉపాదానవిప్పయుత్తో అబ్యాకతో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం).

౭౨-౧. ఉపాదానఉపాదానియదుక-కుసలత్తికం

౧-౭. పటిచ్చవారాది

పచ్చయచతుక్కం

హేతుపచ్చయో

౨౧. ఉపాదానియఞ్చేవ నో చ ఉపాదానం కుసలం ధమ్మం పటిచ్చ ఉపాదానియో చేవ నో చ ఉపాదానో కుసలో ధమ్మో ఉప్పజ్జతి హేతుపచ్చయా (సంఖిత్తం).

హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)

౨౨. ఉపాదానఞ్చేవ ఉపాదానియఞ్చ అకుసలం ధమ్మం పటిచ్చ ఉపాదానో చేవ ఉపాదానియో చ అకుసలో ధమ్మో ఉప్పజ్జతి హేతుపచ్చయా… తీణి.

ఉపాదానియఞ్చేవ నో చ ఉపాదానం అకుసలం ధమ్మం పటిచ్చ ఉపాదానియో చేవ నో చ ఉపాదానో అకుసలో ధమ్మో ఉప్పజ్జతి హేతుపచ్చయా… తీణి.

ఉపాదానఞ్చేవ ఉపాదానియం అకుసలఞ్చ ఉపాదానియఞ్చేవ నో చ ఉపాదానం అకుసలఞ్చ ధమ్మం పటిచ్చ ఉపాదానో చేవ ఉపాదానియో చ అకుసలో ధమ్మో ఉప్పజ్జతి హేతుపచ్చయా… తీణి (సంఖిత్తం).

౨౩. హేతుయా నవ, ఆరమ్మణే నవ…పే… అవిగతే నవ (సంఖిత్తం. ఇమం గమనం ఉపాదానదుకఅకుసలసదిసం. సహజాతవారమ్పి…పే… పఞ్హావారమ్పి విత్థారేతబ్బం).

౨౪. ఉపాదానియఞ్చేవ నో చ ఉపాదానం అబ్యాకతం ధమ్మం పటిచ్చ ఉపాదానియో చేవ నో చ ఉపాదానో అబ్యాకతో ధమ్మో ఉప్పజ్జతి హేతుపచ్చయా (సంఖిత్తం).

౨౫. హేతుయా ఏకం, ఆరమ్మణే ఏకం…పే… అవిగతే ఏకం (సంఖిత్తం).

(సహజాతవారేపి…పే… పఞ్హావారేపి సబ్బత్థ ఏకం.)

౭౩-౧. ఉపాదానఉపాదానసమ్పయుత్తదుక-కుసలత్తికం

౧-౭. పటిచ్చవారాది

పచ్చయచతుక్కం

హేతుపచ్చయో

౨౬. ఉపాదానఞ్చేవ ఉపాదానసమ్పయుత్తఞ్చ అకుసలం ధమ్మం పటిచ్చ ఉపాదానో చేవ ఉపాదానసమ్పయుత్తో చ అకుసలో ధమ్మో ఉప్పజ్జతి హేతుపచ్చయా… తీణి.

ఉపాదానసమ్పయుత్తఞ్చేవ నో చ ఉపాదానం అకుసలం ధమ్మం పటిచ్చ ఉపాదానసమ్పయుత్తో చేవ నో చ ఉపాదానో అకుసలో ధమ్మో ఉప్పజ్జతి హేతుపచ్చయా… తీణి.

ఉపాదానఞ్చేవ ఉపాదానసమ్పయుత్తం అకుసలఞ్చ ఉపాదానసమ్పయుత్తఞ్చేవ నో చ ఉపాదానం అకుసలఞ్చ ధమ్మం పటిచ్చ ఉపాదానో చేవ ఉపాదానసమ్పయుత్తో చ అకుసలో ధమ్మో ఉప్పజ్జతి హేతుపచ్చయా… తీణి (సంఖిత్తం).

౨౭. హేతుయా నవ, ఆరమ్మణే నవ, అధిపతియా నవ…పే… అవిగతే నవ (సంఖిత్తం). (ఇమం గమనం ఉపాదానదుకఅకుసలసదిసం. ఇధ పన హేతుపచ్చయా ఇదం నానం. సహజాతవారేపి…పే… పఞ్హావారేపి సబ్బత్థ నవ.)

౭౪-౧. ఉపాదానవిప్పయుత్తఉపాదానియదుక-కుసలత్తికం

౧-౭. పటిచ్చవారాది

పచ్చయచతుక్కం

హేతుపచ్చయో

౨౮. ఉపాదానవిప్పయుత్తం ఉపాదానియం కుసలం ధమ్మం పటిచ్చ ఉపాదానవిప్పయుత్తో ఉపాదానియో కుసలో ధమ్మో ఉప్పజ్జతి హేతుపచ్చయా. (౧)

ఉపాదానవిప్పయుత్తం అనుపాదానియం కుసలం ధమ్మం పటిచ్చ ఉపాదానవిప్పయుత్తో అనుపాదానియో కుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౨౯. హేతుయా ద్వే, ఆరమ్మణే ద్వే…పే… అవిగతే ద్వే (సంఖిత్తం. లోకియదుకకుసలసదిసం. సహజాతవారమ్పి…పే… పఞ్హావారమ్పి విత్థారేతబ్బం).

౩౦. ఉపాదానవిప్పయుత్తం ఉపాదానియం అకుసలం ధమ్మం పటిచ్చ ఉపాదానవిప్పయుత్తో ఉపాదానియో అకుసలో ధమ్మో ఉప్పజ్జతి హేతుపచ్చయా (సబ్బత్థ ఏకం).

ఉపాదానవిప్పయుత్తం ఉపాదానియం అబ్యాకతం ధమ్మం పటిచ్చ ఉపాదానవిప్పయుత్తో ఉపాదానియో అబ్యాకతో ధమ్మో ఉప్పజ్జతి హేతుపచ్చయా. (౧)

ఉపాదానవిప్పయుత్తం అనుపాదానియం అబ్యాకతం ధమ్మం పటిచ్చ ఉపాదానవిప్పయుత్తో అనుపాదానియో అబ్యాకతో ధమ్మో ఉప్పజ్జతి హేతుపచ్చయా… తీణి.

ఉపాదానవిప్పయుత్తం ఉపాదానియం అబ్యాకతఞ్చ ఉపాదానవిప్పయుత్తం అనుపాదానియం అబ్యాకతఞ్చ ధమ్మం పటిచ్చ ఉపాదానవిప్పయుత్తో ఉపాదానియో అబ్యాకతో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౩౧. హేతుయా పఞ్చ, ఆరమ్మణే ద్వే…పే… అవిగతే పఞ్చ (సంఖిత్తం. లోకియదుకఅబ్యాకతసదిసం. సహజాతవారమ్పి…పే… పఞ్హావారమ్పి సబ్బత్థ విత్థారేతబ్బం).

ఉపాదానగోచ్ఛకకుసలత్తికం నిట్ఠితం.