౧-౭. పటిచ్చవారాది

పచ్చయచతుక్కం

హేతుపచ్చయో

౧౯. చేతసికం కుసలం ధమ్మం పటిచ్చ చేతసికో కుసలో ధమ్మో ఉప్పజ్జతి హేతుపచ్చయా. చేతసికం కుసలం ధమ్మం పటిచ్చ అచేతసికో కుసలో ధమ్మో ఉప్పజ్జతి హేతుపచ్చయా. చేతసికం కుసలం ధమ్మం పటిచ్చ చేతసికో కుసలో చ అచేతసికో కుసలో చ ధమ్మా ఉప్పజ్జన్తి హేతుపచ్చయా. (౩)

అచేతసికం కుసలం ధమ్మం పటిచ్చ చేతసికో కుసలో ధమ్మో ఉప్పజ్జతి హేతుపచ్చయా. (౧)

చేతసికం కుసలఞ్చ అచేతసికం కుసలఞ్చ ధమ్మం పటిచ్చ చేతసికో కుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౨౦. హేతుయా పఞ్చ, ఆరమ్మణే పఞ్చ, అధిపతియా పఞ్చ…పే… అవిగతే పఞ్చ.

నఅధిపతియా పఞ్చ, నపురేజాతే పఞ్చ…పే… నకమ్మే తీణి, నవిపాకే పఞ్చ…పే… నవిప్పయుత్తే పఞ్చ (సంఖిత్తం, సహజాతవారాది విత్థారేతబ్బో).

౨౧. చేతసికో కుసలో ధమ్మో చేతసికస్స కుసలస్స ధమ్మస్స హేతుపచ్చయేన పచ్చయో (సంఖిత్తం).

౨౨. హేతుయా తీణి, ఆరమ్మణే నవ, అధిపతియా నవ (ఆదిమ్హి తీణి, సహజాతాధిపతి, మజ్ఝిమేసు తీసు మజ్ఝిమానులోమికాయేవ పఞ్హా, సహజాతాధిపతి,) అనన్తరే నవ…పే… సహజాతే పఞ్చ…పే… ఉపనిస్సయే నవ, ఆసేవనే నవ, కమ్మే తీణి, ఆహారే పఞ్చ, ఇన్ద్రియే పఞ్చ, ఝానే తీణి, మగ్గే తీణి, సమ్పయుత్తే పఞ్చ, అత్థియా పఞ్చ, నత్థియా నవ…పే… అవిగతే పఞ్చ (సంఖిత్తం).

౨౩. చేతసికం అకుసలం ధమ్మం పటిచ్చ చేతసికో అకుసలో ధమ్మో ఉప్పజ్జతి హేతుపచ్చయా. చేతసికం అకుసలం ధమ్మం పటిచ్చ అచేతసికో అకుసలో ధమ్మో ఉప్పజ్జతి హేతుపచ్చయా. చేతసికం అకుసలం ధమ్మం పటిచ్చ చేతసికో అకుసలో చ అచేతసికో అకుసలో చ ధమ్మా ఉప్పజ్జన్తి హేతుపచ్చయా. (౩)

అచేతసికం అకుసలం ధమ్మం పటిచ్చ చేతసికో అకుసలో ధమ్మో ఉప్పజ్జతి హేతుపచ్చయా. (౧)

చేతసికం అకుసలఞ్చ అచేతసికం అకుసలఞ్చ ధమ్మం పటిచ్చ చేతసికో అకుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౨౪. హేతుయా పఞ్చ, ఆరమ్మణే పఞ్చ…పే… అవిగతే పఞ్చ (సంఖిత్తం, యథా కుసలనయం ఏవం నహేతుపచ్చయమ్పి కాతబ్బం). (సహజాతవారమ్పి…పే… పఞ్హావారమ్పి విత్థారేతబ్బం).

౨౫. చేతసికం అబ్యాకతం ధమ్మం పటిచ్చ చేతసికో అబ్యాకతో ధమ్మో ఉప్పజ్జతి హేతుపచ్చయా. చేతసికం అబ్యాకతం ధమ్మం పటిచ్చ అచేతసికో అబ్యాకతో ధమ్మో ఉప్పజ్జతి హేతుపచ్చయా. చేతసికం అబ్యాకతం ధమ్మం పటిచ్చ చేతసికో అబ్యాకతో చ అచేతసికో అబ్యాకతో చ ధమ్మా ఉప్పజ్జన్తి హేతుపచ్చయా. (౩)

అచేతసికం అబ్యాకతం ధమ్మం పటిచ్చ అచేతసికో అబ్యాకతో ధమ్మో ఉప్పజ్జతి హేతుపచ్చయా… తీణి.

చేతసికం అబ్యాకతఞ్చ అచేతసికం అబ్యాకతఞ్చ ధమ్మం పటిచ్చ చేతసికో అబ్యాకతో ధమ్మో ఉప్పజ్జతి హేతుపచ్చయా… తీణి (సంఖిత్తం).

౨౬. హేతుయా నవ, ఆరమ్మణే నవ, అధిపతియా నవ…పే… పురేజాతే ఆసేవనే పఞ్చ, కమ్మే నవ, విపాకే నవ…పే… అవిగతే నవ (సంఖిత్తం).

నహేతుయా నవ, నఆరమ్మణే తీణి, నఅధిపతియా నవ (సబ్బే కాతబ్బా)…పే… నకమ్మే చత్తారి, నవిపాకే నవ, నఆహారే ఏకం, నఇన్ద్రియే ఏకం, నఝానే ఛ, నమగ్గే నవ, నసమ్పయుత్తే తీణి, నవిప్పయుత్తే ఛ…పే… నోవిగతే తీణి. (సంఖిత్తం, సహజాతవారాది విత్థారేతబ్బో).

౨౭. చేతసికో అబ్యాకతో ధమ్మో చేతసికస్స అబ్యాకతస్స ధమ్మస్స హేతుపచ్చయేన పచ్చయో (సంఖిత్తం).

౨౮. హేతుయా తీణి, ఆరమ్మణే నవ, అధిపతియా నవ (ఏత్థ ఛసు సహజాతాధిపతి), అనన్తరే నవ…పే… సహజాతే నవ, అఞ్ఞమఞ్ఞే నవ, నిస్సయే నవ, ఉపనిస్సయే నవ, పురేజాతే తీణి, ఆసేవనే నవ, కమ్మే తీణి, విపాకే నవ, ఆహారే నవ, ఇన్ద్రియే నవ, ఝానే తీణి, మగ్గే తీణి, సమ్పయుత్తే పఞ్చ, విప్పయుత్తే పఞ్చ, అత్థియా నవ…పే… అవిగతే నవ (సంఖిత్తం).