౧-౭. పటిచ్చవారాది

పచ్చయచతుక్కం

హేతుపచ్చయో

౮౪. అజ్ఝత్తికం కుసలం ధమ్మం పటిచ్చ బాహిరో కుసలో ధమ్మో ఉప్పజ్జతి హేతుపచ్చయా. (౧)

బాహిరం కుసలం ధమ్మం పటిచ్చ బాహిరో కుసలో ధమ్మో ఉప్పజ్జతి హేతుపచ్చయా. బాహిరం కుసలం ధమ్మం పటిచ్చ అజ్ఝత్తికో కుసలో ధమ్మో ఉప్పజ్జతి హేతుపచ్చయా. బాహిరం కుసలం ధమ్మం పటిచ్చ అజ్ఝత్తికో కుసలో చ బాహిరో కుసలో చ ధమ్మా ఉప్పజ్జన్తి హేతుపచ్చయా. (౩)

అజ్ఝత్తికం కుసలఞ్చ బాహిరం కుసలఞ్చ ధమ్మం పటిచ్చ బాహిరో కుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౮౫. హేతుయా పఞ్చ, ఆరమ్మణే పఞ్చ…పే… అవిగతే పఞ్చ. (సంఖిత్తం. చిత్తదుకసదిసం. సహజాతవారమ్పి…పే… పఞ్హావారమ్పి విత్థారేతబ్బం).

౮౬. అజ్ఝత్తికం అకుసలం ధమ్మం పటిచ్చ బాహిరో అకుసలో ధమ్మో ఉప్పజ్జతి హేతుపచ్చయా. (౧)

బాహిరం అకుసలం ధమ్మం పటిచ్చ బాహిరో అకుసలో ధమ్మో ఉప్పజ్జతి హేతుపచ్చయా. బాహిరం అకుసలం ధమ్మం పటిచ్చ అజ్ఝత్తికో అకుసలో ధమ్మో ఉప్పజ్జతి హేతుపచ్చయా. బాహిరం అకుసలం ధమ్మం పటిచ్చ అజ్ఝత్తికో అకుసలో చ బాహిరో అకుసలో చ ధమ్మా ఉప్పజ్జన్తి హేతుపచ్చయా. (౩)

అజ్ఝత్తికం అకుసలఞ్చ బాహిరం అకుసలఞ్చ ధమ్మం పటిచ్చ బాహిరో అకుసలో ధమ్మో ఉప్పజ్జతి హేతుపచ్చయా. (౧) (సంఖిత్తం.)

౮౭. హేతుయా పఞ్చ, ఆరమ్మణే పఞ్చ…పే… అవిగతే పఞ్చ. (సంఖిత్తం. చిత్తదుకసదిసం. సహజాతవారమ్పి…పే… పఞ్హావారమ్పి విత్థారేతబ్బం.)

౮౮. అజ్ఝత్తికం అబ్యాకతం ధమ్మం పటిచ్చ అజ్ఝత్తికో అబ్యాకతో ధమ్మో ఉప్పజ్జతి హేతుపచ్చయా… తీణి.

బాహిరం అబ్యాకతం ధమ్మం పటిచ్చ బాహిరో అబ్యాకతో ధమ్మో ఉప్పజ్జతి హేతుపచ్చయా… తీణి.

అజ్ఝత్తికం అబ్యాకతఞ్చ బాహిరం అబ్యాకతఞ్చ ధమ్మం పటిచ్చ అజ్ఝత్తికో అబ్యాకతో ధమ్మో ఉప్పజ్జతి హేతుపచ్చయా… తీణి (సంఖిత్తం).

౮౯. హేతుయా నవ, ఆరమ్మణే పఞ్చ, అధిపతియా పఞ్చ…పే… అఞ్ఞమఞ్ఞే పఞ్చ, నిస్సయే నవ, ఉపనిస్సయే పఞ్చ, పురేజాతే పఞ్చ, ఆసేవనే పఞ్చ, కమ్మే…పే… మగ్గే నవ, సమ్పయుత్తే పఞ్చ, విప్పయుత్తే నవ…పే… అవిగతే నవ (సంఖిత్తం).

నహేతుయా నవ, నఆరమ్మణే నవ, నఅధిపతియా నవ…పే… నకమ్మే తీణి, నవిపాకే పఞ్చ, నఆహారే ఏకం, నఇన్ద్రియే ఏకం, నఝానే పఞ్చ, నమగ్గే నవ, నసమ్పయుత్తే నవ, నవిప్పయుత్తే పఞ్చ, నోనత్థియా నవ, నోవిగతే నవ (సంఖిత్తం. సహజాతవారమ్పి…పే… సమ్పయుత్తవారమ్పి విత్థారేతబ్బం.)

౯౦. బాహిరో అబ్యాకతో ధమ్మో బాహిరస్స అబ్యాకతస్స ధమ్మస్స హేతుపచ్చయేన పచ్చయో (సంఖిత్తం).

బాహిరో అబ్యాకతో ధమ్మో బాహిరస్స అబ్యాకతస్స ధమ్మస్స కమ్మపచ్చయేన పచ్చయో… తీణి.

౯౧. హేతుయా తీణి, ఆరమ్మణే నవ, అధిపతియా నవ (అజ్ఝత్తికో బాహిరస్స గమనకాలే సహజాతాధిపతి, మజ్ఝే తీసుపి సహజాతాధిపతి), అనన్తరే నవ, సహజాతే నవ, అఞ్ఞమఞ్ఞే పఞ్చ, నిస్సయే నవ, ఉపనిస్సయే నవ, పురేజాతే నవ (ఆరమ్మణపురేజాతమ్పి వత్థుపురేజాతమ్పి), పచ్ఛాజాతే నవ, ఆసేవనే నవ, కమ్మే తీణి, విపాకే నవ, ఆహారే నవ (తిణ్ణన్నం కబళీకారో ఆహారో), ఇన్ద్రియే నవ (తిణ్ణన్నం రూపజీవితిన్ద్రియం), ఝానే మగ్గే తీణి, సమ్పయుత్తే పఞ్చ, విప్పయుత్తే నవ, అత్థియా నవ…పే… అవిగతే నవ (సంఖిత్తం).