౧. విభఙ్గవారో

నహేతుపచ్చయో

౫. నోగన్థం ధమ్మం పటిచ్చ నోగన్థో ధమ్మో ఉప్పజ్జతి నహేతుపచ్చయా – అహేతుకం నోగన్థం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే (యావ అసఞ్ఞసత్తా), విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

నఆరమ్మణపచ్చయాది

౬. గన్థం ధమ్మం పటిచ్చ నోగన్థో ధమ్మో ఉప్పజ్జతి నఆరమ్మణపచ్చయా – గన్థే పటిచ్చ చిత్తసముట్ఠానం రూపం. (౧)

నోగన్థం ధమ్మం పటిచ్చ నోగన్థో ధమ్మో ఉప్పజ్జతి నఆరమ్మణపచ్చయా – నోగన్థే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే…పే… (యావ అసఞ్ఞసత్తా). (౧)

గన్థఞ్చ నోగన్థఞ్చ ధమ్మం పటిచ్చ నోగన్థో ధమ్మో ఉప్పజ్జతి నఆరమ్మణపచ్చయా – గన్థే చ సమ్పయుత్తకే చ ఖన్ధే పటిచ్చ చిత్తసముట్ఠానం రూపం (సంఖిత్తం).

నఅధిపతిపచ్చయా… నవ, నఅనన్తరపచ్చయా… తీణి, నసమనన్తరపచ్చయా… తీణి, నఅఞ్ఞమఞ్ఞపచ్చయా… తీణి, నఉపనిస్సయపచ్చయా… తీణి.

నపురేజాతపచ్చయాది

౭. గన్థం ధమ్మం పటిచ్చ గన్థో ధమ్మో ఉప్పజ్జతి నపురేజాతపచ్చయా – అరూపే ఇదంసచ్చాభినివేసం కాయగన్థం పటిచ్చ అభిజ్ఝాకాయగన్థో, అభిజ్ఝాకాయగన్థం పటిచ్చ ఇదంసచ్చాభినివేసో కాయగన్థో (అరూపే సీలబ్బతపరామాసో నత్థి, ఏవం నవ పఞ్హా కాతబ్బా), నపచ్ఛాజాతే నవ, నఆసేవనే నవ, నకమ్మే తీణి, నవిపాకే నవ, నఆహారే ఏకం, నఇన్ద్రియే ఏకం, నఝానే ఏకం, నమగ్గే ఏకం, నసమ్పయుత్తే తీణి, నవిప్పయుత్తే నవ, నోనత్థియా తీణి, నోవిగతే తీణి.