౧. విభఙ్గవారో

హేతుపచ్చయో

౫౫. గన్థసమ్పయుత్తం ధమ్మం పచ్చయా గన్థసమ్పయుత్తో ధమ్మో ఉప్పజ్జతి హేతుపచ్చయా… తీణి (పటిచ్చసదిసా).

గన్థవిప్పయుత్తం ధమ్మం పచ్చయా గన్థవిప్పయుత్తో ధమ్మో ఉప్పజ్జతి హేతుపచ్చయా – గన్థవిప్పయుత్తం ఏకం ఖన్ధం పచ్చయా…పే… పటిసన్ధిక్ఖణే…పే… ఖన్ధే పచ్చయా వత్థు, వత్థుం పచ్చయా ఖన్ధా, ఏకం మహాభూతం…పే… వత్థుం పచ్చయా గన్థవిప్పయుత్తా ఖన్ధా. (౧)

గన్థవిప్పయుత్తం ధమ్మం పచ్చయా గన్థసమ్పయుత్తో ధమ్మో ఉప్పజ్జతి హేతుపచ్చయా – వత్థుం పచ్చయా గన్థసమ్పయుత్తకా ఖన్ధా, దిట్ఠిగతవిప్పయుత్తం లోభం పచ్చయా సమ్పయుత్తకా ఖన్ధా, పటిఘం పచ్చయా సమ్పయుత్తకా ఖన్ధా. (౨)

గన్థవిప్పయుత్తం ధమ్మం పచ్చయా గన్థసమ్పయుత్తో చ గన్థవిప్పయుత్తో చ ధమ్మా ఉప్పజ్జన్తి హేతుపచ్చయా – వత్థుం పచ్చయా గన్థసమ్పయుత్తకా ఖన్ధా, మహాభూతే పచ్చయా చిత్తసముట్ఠానం రూపం, దిట్ఠిగతవిప్పయుత్తం లోభం పచ్చయా సమ్పయుత్తకా ఖన్ధా చిత్తసముట్ఠానఞ్చ రూపం, పటిఘం పచ్చయా సమ్పయుత్తకా ఖన్ధా చిత్తసముట్ఠానఞ్చ రూపం, వత్థుం పచ్చయా దిట్ఠిగతవిప్పయుత్తలోభసహగతా ఖన్ధా చ లోభో చ, వత్థుం పచ్చయా దోమనస్ససహగతా ఖన్ధా చ పటిఘఞ్చ. (౩)

౫౬. గన్థసమ్పయుత్తఞ్చ గన్థవిప్పయుత్తఞ్చ ధమ్మం పచ్చయా గన్థసమ్పయుత్తో ధమ్మో ఉప్పజ్జతి హేతుపచ్చయా – గన్థసమ్పయుత్తం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే… దిట్ఠిగతవిప్పయుత్తలోభసహగతం ఏకం ఖన్ధఞ్చ వత్థుఞ్చ లోభఞ్చ పచ్చయా తయో ఖన్ధా …పే… ద్వే ఖన్ధే…పే… దోమనస్ససహగతం ఏకం ఖన్ధఞ్చ వత్థుఞ్చ పటిఘఞ్చ పచ్చయా తయో ఖన్ధా…పే… ద్వే ఖన్ధే…పే…. (౧)

గన్థసమ్పయుత్తఞ్చ గన్థవిప్పయుత్తఞ్చ ధమ్మం పచ్చయా గన్థవిప్పయుత్తో ధమ్మో ఉప్పజ్జతి హేతుపచ్చయా – గన్థసమ్పయుత్తే ఖన్ధే చ మహాభూతే చ పచ్చయా చిత్తసముట్ఠానం రూపం, దిట్ఠిగతవిప్పయుత్తలోభసహగతే ఖన్ధే చ లోభఞ్చ పచ్చయా చిత్తసముట్ఠానం రూపం, దోమనస్ససహగతే ఖన్ధే చ పటిఘఞ్చ పచ్చయా చిత్తసముట్ఠానం రూపం, దిట్ఠిగతవిప్పయుత్తలోభసహగతే ఖన్ధే చ వత్థుఞ్చ పచ్చయా లోభో, దోమనస్ససహగతే ఖన్ధే చ వత్థుఞ్చ పచ్చయా పటిఘం. (౨)

గన్థసమ్పయుత్తఞ్చ గన్థవిప్పయుత్తఞ్చ ధమ్మం పచ్చయా గన్థసమ్పయుత్తో చ గన్థవిప్పయుత్తో చ ధమ్మా ఉప్పజ్జన్తి హేతుపచ్చయా – గన్థసమ్పయుత్తం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే… గన్థసమ్పయుత్తే ఖన్ధే చ మహాభూతే చ పచ్చయా చిత్తసముట్ఠానం రూపం, దిట్ఠిగతవిప్పయుత్తలోభసహగతం ఏకం ఖన్ధఞ్చ లోభఞ్చ పచ్చయా తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… దోమనస్ససహగతం ఏకం ఖన్ధఞ్చ పటిఘఞ్చ పచ్చయా తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… దిట్ఠిగతవిప్పయుత్తలోభసహగతం ఏకం ఖన్ధఞ్చ వత్థుఞ్చ పచ్చయా తయో ఖన్ధా లోభో చ…పే… ద్వే ఖన్ధే…పే… దోమనస్ససహగతం ఏకం ఖన్ధఞ్చ వత్థుఞ్చ పచ్చయా తయో ఖన్ధా పటిఘఞ్చ…పే… ద్వే ఖన్ధే…పే… (సంఖిత్తం). (౩)