౧. విభఙ్గవారో

హేతుపచ్చయో

౧. గన్థం ధమ్మం పటిచ్చ గన్థో ధమ్మో ఉప్పజ్జతి హేతుపచ్చయా – సీలబ్బతపరామాసం కాయగన్థం పటిచ్చ అభిజ్ఝాకాయగన్థో, అభిజ్ఝాకాయగన్థం పటిచ్చ సీలబ్బతపరామాసో కాయగన్థో, ఇదంసచ్చాభినివేసం కాయగన్థం పటిచ్చ అభిజ్ఝాకాయగన్థో, అభిజ్ఝాకాయగన్థం పటిచ్చ ఇదంసచ్చాభినివేసో కాయగన్థో. (౧)

గన్థం ధమ్మం పటిచ్చ నోగన్థో ధమ్మో ఉప్పజ్జతి హేతుపచ్చయా – గన్థే పటిచ్చ సమ్పయుత్తకా ఖన్ధా చిత్తసముట్ఠానఞ్చ రూపం. (౨)

గన్థం ధమ్మం పటిచ్చ గన్థో చ నోగన్థో చ ధమ్మా ఉప్పజ్జన్తి హేతుపచ్చయా – సీలబ్బతపరామాసం కాయగన్థం పటిచ్చ అభిజ్ఝాకాయగన్థో సమ్పయుత్తకా చ ఖన్ధా చిత్తసముట్ఠానఞ్చ రూపం (చక్కం). (౩)

౨. నోగన్థం ధమ్మం పటిచ్చ నోగన్థో ధమ్మో ఉప్పజ్జతి హేతుపచ్చయా – నోగన్థం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం…పే…. (౧)

నోగన్థం ధమ్మం పటిచ్చ గన్థో ధమ్మో ఉప్పజ్జతి హేతుపచ్చయా – నోగన్థే ఖన్ధే పటిచ్చ గన్థా. (౨)

నోగన్థం ధమ్మం పటిచ్చ గన్థో చ నోగన్థో చ ధమ్మా ఉప్పజ్జన్తి హేతుపచ్చయా – నోగన్థం ఏకం ఖన్ధం పటిచ్చ తయో ఖన్ధా గన్థా చ చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

౩. గన్థఞ్చ నోగన్థఞ్చ ధమ్మం పటిచ్చ గన్థో ధమ్మో ఉప్పజ్జతి హేతుపచ్చయా – సీలబ్బతపరామాసం కాయగన్థఞ్చ సమ్పయుత్తకే చ ఖన్ధే పటిచ్చ అభిజ్ఝాకాయగన్థో (చక్కం). (౧)

గన్థఞ్చ నోగన్థఞ్చ ధమ్మం పటిచ్చ నోగన్థో ధమ్మో ఉప్పజ్జతి హేతుపచ్చయా – నోగన్థం ఏకం ఖన్ధఞ్చ గన్థే చ పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే చ…పే… గన్థే చ సమ్పయుత్తకే ఖన్ధే చ పటిచ్చ చిత్తసముట్ఠానం రూపం. (౨)

గన్థఞ్చ నోగన్థఞ్చ ధమ్మం పటిచ్చ గన్థో చ నోగన్థో చ ధమ్మా ఉప్పజ్జన్తి హేతుపచ్చయా – నోగన్థం ఏకం ఖన్ధఞ్చ సీలబ్బతపరామాసకాయగన్థఞ్చ పటిచ్చ తయో ఖన్ధా అభిజ్ఝాకాయగన్థో చిత్తసముట్ఠానఞ్చ రూపం…పే… ద్వే ఖన్ధే చ…పే…. (చక్కం. సంఖిత్తం.) (౩)

ఆరమ్మణపచ్చయా…పే… అవిగతపచ్చయా.