౧. విభఙ్గవారో

హేతుపచ్చయో

౧౦౬. సఞ్ఞోజనో చేవ సఞ్ఞోజనసమ్పయుత్తో చ ధమ్మో సఞ్ఞోజనస్స చేవ సఞ్ఞోజనసమ్పయుత్తస్స చ ధమ్మస్స హేతుపచ్చయేన పచ్చయో – కామరాగసఞ్ఞోజనో దిట్ఠిసఞ్ఞోజనస్స అవిజ్జాసఞ్ఞోజనస్స హేతుపచ్చయేన పచ్చయో (చక్కం). (౧)

సఞ్ఞోజనో చేవ సఞ్ఞోజనసమ్పయుత్తో చ ధమ్మో సఞ్ఞోజనసమ్పయుత్తస్స చేవ నో చ సఞ్ఞోజనస్స ధమ్మస్స హేతుపచ్చయేన పచ్చయో – సఞ్ఞోజనా చేవ సఞ్ఞోజనసమ్పయుత్తా చ హేతూ సమ్పయుత్తకానం ఖన్ధానం హేతుపచ్చయేన పచ్చయో. (౨)

సఞ్ఞోజనో చేవ సఞ్ఞోజనసమ్పయుత్తో చ ధమ్మో సఞ్ఞోజనస్స చేవ సఞ్ఞోజనసమ్పయుత్తస్స చ సఞ్ఞోజనసమ్పయుత్తస్స చేవ నో చ సఞ్ఞోజనస్స చ ధమ్మస్స హేతుపచ్చయేన పచ్చయో – కామరాగసఞ్ఞోజనో దిట్ఠిసఞ్ఞోజనస్స అవిజ్జాసఞ్ఞోజనస్స సమ్పయుత్తకానఞ్చ ఖన్ధానం హేతుపచ్చయేన పచ్చయో (చక్కం). (౩)

ఆరమ్మణపచ్చయో

౧౦౭. సఞ్ఞోజనో చేవ సఞ్ఞోజనసమ్పయుత్తో చ ధమ్మో సఞ్ఞోజనస్స చేవ సఞ్ఞోజనసమ్పయుత్తస్స చ ధమ్మస్స ఆరమ్మణపచ్చయేన పచ్చయో – సఞ్ఞోజనే ఆరబ్భ సఞ్ఞోజనా ఉప్పజ్జన్తి. (మూలం కాతబ్బం) సఞ్ఞోజనే ఆరబ్భ సఞ్ఞోజనసమ్పయుత్తా చేవ నో చ సఞ్ఞోజనా ఖన్ధా ఉప్పజ్జన్తి. (మూలం కాతబ్బం) సఞ్ఞోజనే ఆరబ్భ సఞ్ఞోజనా చ సఞ్ఞోజనసమ్పయుత్తకా చ ఖన్ధా ఉప్పజ్జన్తి. (౧)

సఞ్ఞోజనసమ్పయుత్తో చేవ నో చ సఞ్ఞోజనో ధమ్మో సఞ్ఞోజనసమ్పయుత్తస్స చేవ నో చ సఞ్ఞోజనస్స ధమ్మస్స ఆరమ్మణపచ్చయేన పచ్చయో – సఞ్ఞోజనసమ్పయుత్తే చేవ నో చ సఞ్ఞోజనే ఖన్ధే ఆరబ్భ సఞ్ఞోజనసమ్పయుత్తా చేవ నో చ సఞ్ఞోజనా ఖన్ధా ఉప్పజ్జన్తి. (౧)

సఞ్ఞోజనసమ్పయుత్తో చేవ నో చ సఞ్ఞోజనో ధమ్మో సఞ్ఞోజనస్స చేవ సఞ్ఞోజనసమ్పయుత్తస్స చ ధమ్మస్స ఆరమ్మణపచ్చయేన పచ్చయో – సఞ్ఞోజనసమ్పయుత్తే చేవ నో చ సఞ్ఞోజనే ఖన్ధే ఆరబ్భ సఞ్ఞోజనా ఉప్పజ్జన్తి. (౨)

సఞ్ఞోజనసమ్పయుత్తో చేవ నో చ సఞ్ఞోజనో ధమ్మో సఞ్ఞోజనస్స చేవ సఞ్ఞోజనసమ్పయుత్తస్స చ సఞ్ఞోజనసమ్పయుత్తస్స చేవ నో చ సఞ్ఞోజనస్స చ ధమ్మస్స ఆరమ్మణపచ్చయేన పచ్చయో – సఞ్ఞోజనసమ్పయుత్తే చేవ నో చ సఞ్ఞోజనే ఖన్ధే ఆరబ్భ సఞ్ఞోజనా చ సఞ్ఞోజనసమ్పయుత్తకా చ ఖన్ధా ఉప్పజ్జన్తి. (౩)

సఞ్ఞోజనో చేవ సఞ్ఞోజనసమ్పయుత్తో చ సఞ్ఞోజనసమ్పయుత్తో చేవ నో చ సఞ్ఞోజనో చ ధమ్మా సఞ్ఞోజనస్స చేవ సఞ్ఞోజనసమ్పయుత్తస్స చ ధమ్మస్స ఆరమ్మణపచ్చయేన పచ్చయో… తీణి.

అధిపతిపచ్చయో

౧౦౮. సఞ్ఞోజనో చేవ సఞ్ఞోజనసమ్పయుత్తో చ ధమ్మో సఞ్ఞోజనస్స చేవ సఞ్ఞోజనసమ్పయుత్తస్స చ ధమ్మస్స అధిపతిపచ్చయేన పచ్చయో – ఆరమ్మణాధిపతి… తీణి.

సఞ్ఞోజనసమ్పయుత్తో చేవ నో చ సఞ్ఞోజనో ధమ్మో సఞ్ఞోజనసమ్పయుత్తస్స చేవ నో చ సఞ్ఞోజనస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి… తీణి (ఇమాసు తీసుపి పఞ్హాసు ఆరమ్మణాధిపతిపి సహజాతాధిపతిపి కాతబ్బా).

సఞ్ఞోజనో చేవ సఞ్ఞోజనసమ్పయుత్తో చ సఞ్ఞోజనసమ్పయుత్తో చేవ నో చ సఞ్ఞోజనో చ ధమ్మా సఞ్ఞోజనస్స చేవ సఞ్ఞోజనసమ్పయుత్తస్స చ ధమ్మస్స అధిపతిపచ్చయేన పచ్చయో – ఆరమ్మణాధిపతి… తీణి.

అనన్తరపచ్చయాది

౧౦౯. సఞ్ఞోజనో చేవ సఞ్ఞోజనసమ్పయుత్తో చ ధమ్మో సఞ్ఞోజనస్స చేవ సఞ్ఞోజనసమ్పయుత్తస్స చ ధమ్మస్స అనన్తరపచ్చయేన పచ్చయో… నవ (నిన్నానాకరణం, విభజనా నత్థి. ఆరమ్మణసదిసా)… సమనన్తరపచ్చయేన పచ్చయో… నవ… సహజాతపచ్చయేన పచ్చయో… నవ… అఞ్ఞమఞ్ఞపచ్చయేన పచ్చయో… నవ… నిస్సయపచ్చయేన పచ్చయో… నవ… ఉపనిస్సయపచ్చయేన పచ్చయో… నవ (ఆరమ్మణనయేన కాతబ్బా)… ఆసేవనపచ్చయేన పచ్చయో… నవ.

కమ్మపచ్చయాది

౧౧౦. సఞ్ఞోజనసమ్పయుత్తో చేవ నో చ సఞ్ఞోజనో ధమ్మో సఞ్ఞోజనసమ్పయుత్తస్స చేవ నో చ సఞ్ఞోజనస్స ధమ్మస్స కమ్మపచ్చయేన పచ్చయో… తీణి… ఆహారపచ్చయేన పచ్చయో… తీణి… ఇన్ద్రియపచ్చయేన పచ్చయో… తీణి… ఝానపచ్చయేన పచ్చయో… తీణి… మగ్గపచ్చయేన పచ్చయో… నవ … సమ్పయుత్తపచ్చయేన పచ్చయో… నవ… అత్థిపచ్చయేన పచ్చయో … నవ… నత్థిపచ్చయేన పచ్చయో… నవ… విగతపచ్చయేన పచ్చయో… నవ… అవిగతపచ్చయేన పచ్చయో… నవ.