౧. విభఙ్గవారో

హేతుపచ్చయో

౫౧. సఞ్ఞోజనసమ్పయుత్తం ధమ్మం పచ్చయా సఞ్ఞోజనసమ్పయుత్తో ధమ్మో ఉప్పజ్జతి హేతుపచ్చయా… తీణి (పటిచ్చసదిసం).

సఞ్ఞోజనవిప్పయుత్తం ధమ్మం పచ్చయా సఞ్ఞోజనవిప్పయుత్తో ధమ్మో ఉప్పజ్జతి హేతుపచ్చయా (యావ పటిసన్ధి), ఏకం మహాభూతం…పే… వత్థుం పచ్చయా సఞ్ఞోజనవిప్పయుత్తా ఖన్ధా, వత్థుం పచ్చయా ఉద్ధచ్చసహగతో మోహో. (౧)

సఞ్ఞోజనవిప్పయుత్తం ధమ్మం పచ్చయా సఞ్ఞోజనసమ్పయుత్తో ధమ్మో ఉప్పజ్జతి హేతుపచ్చయా – వత్థుం పచ్చయా సఞ్ఞోజనసమ్పయుత్తకా ఖన్ధా, ఉద్ధచ్చసహగతం మోహం పచ్చయా సమ్పయుత్తకా ఖన్ధా. (౨)

సఞ్ఞోజనవిప్పయుత్తం ధమ్మం పచ్చయా సఞ్ఞోజనసమ్పయుత్తో చ సఞ్ఞోజనవిప్పయుత్తో చ ధమ్మా ఉప్పజ్జన్తి హేతుపచ్చయా – వత్థుం పచ్చయా సఞ్ఞోజనసమ్పయుత్తకా ఖన్ధా, మహాభూతే పచ్చయా చిత్తసముట్ఠానం రూపం, ఉద్ధచ్చసహగతం మోహం పచ్చయా సమ్పయుత్తకా ఖన్ధా చిత్తసముట్ఠానఞ్చ రూపం. (౩)

౫౨. సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పచ్చయా సఞ్ఞోజనసమ్పయుత్తో ధమ్మో ఉప్పజ్జతి హేతుపచ్చయా – సఞ్ఞోజనసమ్పయుత్తం ఏకం ఖన్ధఞ్చ వత్థుఞ్చ పచ్చయా తయో ఖన్ధా …పే… ద్వే ఖన్ధే…పే… ఉద్ధచ్చసహగతం ఏకం ఖన్ధఞ్చ మోహఞ్చ పచ్చయా తయో ఖన్ధా…పే… ద్వే ఖన్ధే…పే…. (౧)

సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పచ్చయా సఞ్ఞోజనవిప్పయుత్తో ధమ్మో ఉప్పజ్జతి హేతుపచ్చయా – సఞ్ఞోజనసమ్పయుత్తే ఖన్ధే చ మహాభూతే చ పచ్చయా చిత్తసముట్ఠానం రూపం, ఉద్ధచ్చసహగతే ఖన్ధే చ మోహఞ్చ పచ్చయా చిత్తసముట్ఠానం రూపం. (౨)

సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పచ్చయా సఞ్ఞోజనసమ్పయుత్తో చ సఞ్ఞోజనవిప్పయుత్తో చ ధమ్మా ఉప్పజ్జన్తి హేతుపచ్చయా – సఞ్ఞోజనసమ్పయుత్తం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే… సఞ్ఞోజనసమ్పయుత్తే ఖన్ధే చ మహాభూతే చ పచ్చయా చిత్తసముట్ఠానం రూపం, ఉద్ధచ్చసహగతం ఏకం ఖన్ధఞ్చ మోహఞ్చ పచ్చయా తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

ఆరమ్మణపచ్చయో

౫౩. సఞ్ఞోజనసమ్పయుత్తం ధమ్మం పచ్చయా సఞ్ఞోజనసమ్పయుత్తో ధమ్మో ఉప్పజ్జతి ఆరమ్మణపచ్చయా… తీణి (పటిచ్చసదిసా).

సఞ్ఞోజనవిప్పయుత్తం ధమ్మం పచ్చయా సఞ్ఞోజనవిప్పయుత్తో ధమ్మో ఉప్పజ్జతి ఆరమ్మణపచ్చయా (యావ పటిసన్ధి), వత్థుం పచ్చయా సఞ్ఞోజనవిప్పయుత్తా ఖన్ధా, చక్ఖాయతనం పచ్చయా చక్ఖువిఞ్ఞాణం…పే… కాయాయతనం పచ్చయా కాయవిఞ్ఞాణం, వత్థుం పచ్చయా సఞ్ఞోజనవిప్పయుత్తా ఖన్ధా, వత్థుం పచ్చయా ఉద్ధచ్చసహగతో మోహో. (౧)

సఞ్ఞోజనవిప్పయుత్తం ధమ్మం పచ్చయా సఞ్ఞోజనసమ్పయుత్తో ధమ్మో ఉప్పజ్జతి ఆరమ్మణపచ్చయా – వత్థుం పచ్చయా సఞ్ఞోజనసమ్పయుత్తకా ఖన్ధా, ఉద్ధచ్చసహగతం మోహం పచ్చయా సమ్పయుత్తకా ఖన్ధా. (౨)

సఞ్ఞోజనవిప్పయుత్తం ధమ్మం పచ్చయా సఞ్ఞోజనసమ్పయుత్తో చ సఞ్ఞోజనవిప్పయుత్తో చ ధమ్మా ఉప్పజ్జన్తి ఆరమ్మణపచ్చయా – వత్థుం పచ్చయా ఉద్ధచ్చసహగతా ఖన్ధా చ మోహో చ. (౩)

౫౪. సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పచ్చయా సఞ్ఞోజనసమ్పయుత్తో ధమ్మో ఉప్పజ్జతి ఆరమ్మణపచ్చయా – సఞ్ఞోజనసమ్పయుత్తం ఏకం ఖన్ధఞ్చ వత్థుఞ్చ పచ్చయా తయో ఖన్ధా…పే… ద్వే ఖన్ధే…పే… ఉద్ధచ్చసహగతం ఏకం ఖన్ధఞ్చ మోహఞ్చ పచ్చయా తయో ఖన్ధా…పే… ద్వే ఖన్ధే…పే…. (౧)

సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పచ్చయా సఞ్ఞోజనవిప్పయుత్తో ధమ్మో ఉప్పజ్జతి ఆరమ్మణపచ్చయా – ఉద్ధచ్చసహగతే ఖన్ధే చ వత్థుఞ్చ పచ్చయా ఉద్ధచ్చసహగతో మోహో. (౨)

సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పచ్చయా సఞ్ఞోజనసమ్పయుత్తో చ సఞ్ఞోజనవిప్పయుత్తో చ ధమ్మా ఉప్పజ్జన్తి ఆరమ్మణపచ్చయా – ఉద్ధచ్చసహగతం ఏకం ఖన్ధఞ్చ వత్థుఞ్చ పచ్చయా తయో ఖన్ధా మోహో చ…పే… ద్వే ఖన్ధే…పే…. (౩)

అధిపతిపచ్చయాది

౫౫. సఞ్ఞోజనసమ్పయుత్తం ధమ్మం పచ్చయా సఞ్ఞోజనసమ్పయుత్తో ధమ్మో ఉప్పజ్జతి అధిపతిపచ్చయా…పే… అవిగతపచ్చయా…పే….