౧. విభఙ్గవారో

హేతుపచ్చయో

౧. సఞ్ఞోజనం ధమ్మం పటిచ్చ సఞ్ఞోజనో ధమ్మో ఉప్పజ్జతి హేతుపచ్చయా – కామరాగసఞ్ఞోజనం పటిచ్చ దిట్ఠిసఞ్ఞోజనం అవిజ్జాసఞ్ఞోజనం, కామరాగసఞ్ఞోజనం పటిచ్చ సీలబ్బతపరామాససఞ్ఞోజనం అవిజ్జాసఞ్ఞోజనం, కామరాగసఞ్ఞోజనం పటిచ్చ మానసఞ్ఞోజనం అవిజ్జాసఞ్ఞోజనం, కామరాగసఞ్ఞోజనం పటిచ్చ అవిజ్జాసఞ్ఞోజనం, పటిఘసఞ్ఞోజనం పటిచ్చ ఇస్సాసఞ్ఞోజనం అవిజ్జాసఞ్ఞోజనం, పటిఘసఞ్ఞోజనం పటిచ్చ మచ్ఛరియసఞ్ఞోజనం అవిజ్జాసఞ్ఞోజనం, పటిఘసఞ్ఞోజనం పటిచ్చ అవిజ్జాసఞ్ఞోజనం, మానసఞ్ఞోజనం పటిచ్చ భవరాగసఞ్ఞోజనం అవిజ్జాసఞ్ఞోజనం, భవరాగసఞ్ఞోజనం పటిచ్చ అవిజ్జాసఞ్ఞోజనం, విచికిచ్ఛాసఞ్ఞోజనం పటిచ్చ అవిజ్జాసఞ్ఞోజనం. (౧)

సఞ్ఞోజనం ధమ్మం పటిచ్చ నోసఞ్ఞోజనో ధమ్మో ఉప్పజ్జతి హేతుపచ్చయా – సఞ్ఞోజనే పటిచ్చ సమ్పయుత్తకా ఖన్ధా చిత్తసముట్ఠానఞ్చ రూపం. (౨)

సఞ్ఞోజనం ధమ్మం పటిచ్చ సఞ్ఞోజనో చ నోసఞ్ఞోజనో చ ధమ్మా ఉప్పజ్జన్తి హేతుపచ్చయా – కామరాగసఞ్ఞోజనం పటిచ్చ దిట్ఠిసఞ్ఞోజనం అవిజ్జాసఞ్ఞోజనం సమ్పయుత్తకా చ ఖన్ధా చిత్తసముట్ఠానఞ్చ రూపం (చక్కం బన్ధితబ్బం). (౩)

౨. నోసఞ్ఞోజనం ధమ్మం పటిచ్చ నోసఞ్ఞోజనో ధమ్మో ఉప్పజ్జతి హేతుపచ్చయా – నోసఞ్ఞోజనం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం…పే… మహాభూతే పటిచ్చ చిత్తసముట్ఠానం రూపం కటత్తారూపం ఉపాదారూపం. (౧)

నోసఞ్ఞోజనం ధమ్మం పటిచ్చ సఞ్ఞోజనో ధమ్మో ఉప్పజ్జతి హేతుపచ్చయా – నోసఞ్ఞోజనే ఖన్ధే పటిచ్చ సఞ్ఞోజనా. (౨)

నోసఞ్ఞోజనం ధమ్మం పటిచ్చ సఞ్ఞోజనో చ నోసఞ్ఞోజనో చ ధమ్మా ఉప్పజ్జన్తి హేతుపచ్చయా – నోసఞ్ఞోజనం ఏకం ఖన్ధం పటిచ్చ తయో ఖన్ధా సఞ్ఞోజనా చ చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

౩. సఞ్ఞోజనఞ్చ నోసఞ్ఞోజనఞ్చ ధమ్మం పటిచ్చ సఞ్ఞోజనో ధమ్మో ఉప్పజ్జతి హేతుపచ్చయా – కామరాగసఞ్ఞోజనఞ్చ సమ్పయుత్తకే చ ఖన్ధే పటిచ్చ దిట్ఠిసఞ్ఞోజనం అవిజ్జాసఞ్ఞోజనం (చక్కం బన్ధితబ్బం). (౧)

సఞ్ఞోజనఞ్చ నోసఞ్ఞోజనఞ్చ ధమ్మం పటిచ్చ నోసఞ్ఞోజనో ధమ్మో ఉప్పజ్జతి హేతుపచ్చయా – నోసఞ్ఞోజనం ఏకం ఖన్ధఞ్చ సఞ్ఞోజనే చ పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే చ…పే…. (౨)

సఞ్ఞోజనఞ్చ నోసఞ్ఞోజనఞ్చ ధమ్మం పటిచ్చ సఞ్ఞోజనో చ నోసఞ్ఞోజనో చ ధమ్మా ఉప్పజ్జన్తి హేతుపచ్చయా – నోసఞ్ఞోజనం ఏకం ఖన్ధఞ్చ కామరాగసఞ్ఞోజనఞ్చ పటిచ్చ తయో ఖన్ధా దిట్ఠిసఞ్ఞోజనం అవిజ్జాసఞ్ఞోజనం చిత్తసముట్ఠానఞ్చ రూపం…పే… (చక్కం బన్ధితబ్బం). (౩)

(ఆరమ్మణపచ్చయే రూపం నత్థి. అధిపతిపచ్చయో హేతుసదిసో, విచికిచ్ఛాసఞ్ఞోజనం నత్థి.) అనన్తరపచ్చయా…పే… అవిగతపచ్చయా.