౧. విభఙ్గవారో

హేతుపచ్చయో

౪౦. సఞ్ఞోజనసమ్పయుత్తం ధమ్మం పటిచ్చ సఞ్ఞోజనసమ్పయుత్తో ధమ్మో ఉప్పజ్జతి హేతుపచ్చయా – సఞ్ఞోజనసమ్పయుత్తం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

సఞ్ఞోజనసమ్పయుత్తం ధమ్మం పటిచ్చ సఞ్ఞోజనవిప్పయుత్తో ధమ్మో ఉప్పజ్జతి హేతుపచ్చయా – సఞ్ఞోజనసమ్పయుత్తే ఖన్ధే పటిచ్చ చిత్తసముట్ఠానం రూపం. (౨)

సఞ్ఞోజనసమ్పయుత్తం ధమ్మం పటిచ్చ సఞ్ఞోజనసమ్పయుత్తో చ సఞ్ఞోజనవిప్పయుత్తో చ ధమ్మా ఉప్పజ్జన్తి హేతుపచ్చయా – సఞ్ఞోజనసమ్పయుత్తం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

౪౧. సఞ్ఞోజనవిప్పయుత్తం ధమ్మం పటిచ్చ సఞ్ఞోజనవిప్పయుత్తో ధమ్మో ఉప్పజ్జతి హేతుపచ్చయా – సఞ్ఞోజనవిప్పయుత్తం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం …పే… ద్వే ఖన్ధే…పే… ఉద్ధచ్చసహగతం మోహం పటిచ్చ చిత్తసముట్ఠానం రూపం; పటిసన్ధిక్ఖణే…పే… ఏకం మహాభూతం…పే…. (౧)

సఞ్ఞోజనవిప్పయుత్తం ధమ్మం పటిచ్చ సఞ్ఞోజనసమ్పయుత్తో ధమ్మో ఉప్పజ్జతి హేతుపచ్చయా – ఉద్ధచ్చసహగతం మోహం పటిచ్చ సమ్పయుత్తకా ఖన్ధా. (౨)

సఞ్ఞోజనవిప్పయుత్తం ధమ్మం పటిచ్చ సఞ్ఞోజనసమ్పయుత్తో చ సఞ్ఞోజనవిప్పయుత్తో చ ధమ్మా ఉప్పజ్జన్తి హేతుపచ్చయా – ఉద్ధచ్చసహగతం మోహం పటిచ్చ సమ్పయుత్తకా ఖన్ధా చిత్తసముట్ఠానఞ్చ రూపం. (౩)

౪౨. సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పటిచ్చ సఞ్ఞోజనసమ్పయుత్తో ధమ్మో ఉప్పజ్జతి హేతుపచ్చయా – ఉద్ధచ్చసహగతం ఏకం ఖన్ధఞ్చ మోహఞ్చ పటిచ్చ తయో ఖన్ధా…పే… ద్వే ఖన్ధే…పే…. (౧)

సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పటిచ్చ సఞ్ఞోజనవిప్పయుత్తో ధమ్మో ఉప్పజ్జతి హేతుపచ్చయా – సఞ్ఞోజనసమ్పయుత్తే ఖన్ధే చ మహాభూతే చ పటిచ్చ చిత్తసముట్ఠానం రూపం, ఉద్ధచ్చసహగతే ఖన్ధే చ మోహఞ్చ పటిచ్చ చిత్తసముట్ఠానం రూపం. (౨)

సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పటిచ్చ సఞ్ఞోజనసమ్పయుత్తో చ సఞ్ఞోజనవిప్పయుత్తో చ ధమ్మా ఉప్పజ్జన్తి హేతుపచ్చయా – ఉద్ధచ్చసహగతం ఏకం ఖన్ధఞ్చ మోహఞ్చ పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

ఆరమ్మణపచ్చయో

౪౩. సఞ్ఞోజనసమ్పయుత్తం ధమ్మం పటిచ్చ సఞ్ఞోజనసమ్పయుత్తో ధమ్మో ఉప్పజ్జతి ఆరమ్మణపచ్చయా – సఞ్ఞోజనసమ్పయుత్తం ఏకం ఖన్ధం…పే… ద్వే ఖన్ధే…పే…. (౧)

సఞ్ఞోజనసమ్పయుత్తం ధమ్మం పటిచ్చ సఞ్ఞోజనవిప్పయుత్తో ధమ్మో ఉప్పజ్జతి ఆరమ్మణపచ్చయా – ఉద్ధచ్చసహగతే ఖన్ధే పటిచ్చ ఉద్ధచ్చసహగతో మోహో. (౨)

సఞ్ఞోజనసమ్పయుత్తం ధమ్మం పటిచ్చ సఞ్ఞోజనసమ్పయుత్తో చ సఞ్ఞోజనవిప్పయుత్తో చ ధమ్మా ఉప్పజ్జన్తి ఆరమ్మణపచ్చయా – ఉద్ధచ్చసహగతం ఏకం ఖన్ధం పటిచ్చ తయో ఖన్ధా మోహో చ…పే… ద్వే ఖన్ధే…పే…. (౩)

౪౪. సఞ్ఞోజనవిప్పయుత్తం ధమ్మం పటిచ్చ సఞ్ఞోజనవిప్పయుత్తో ధమ్మో ఉప్పజ్జతి ఆరమ్మణపచ్చయా – సఞ్ఞోజనవిప్పయుత్తం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే… వత్థుం పటిచ్చ ఖన్ధా. (౧)

సఞ్ఞోజనవిప్పయుత్తం ధమ్మం పటిచ్చ సఞ్ఞోజనసమ్పయుత్తో ధమ్మో ఉప్పజ్జతి ఆరమ్మణపచ్చయా – ఉద్ధచ్చసహగతం మోహం పటిచ్చ సమ్పయుత్తకా ఖన్ధా. (౨)

సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పటిచ్చ సఞ్ఞోజనసమ్పయుత్తో ధమ్మో ఉప్పజ్జతి ఆరమ్మణపచ్చయా – ఉద్ధచ్చసహగతం ఏకం ఖన్ధఞ్చ మోహఞ్చ పటిచ్చ తయో ఖన్ధా…పే… ద్వే ఖన్ధే…పే…. (౧)

అధిపతిపచ్చయో

౪౫. సఞ్ఞోజనసమ్పయుత్తం ధమ్మం పటిచ్చ సఞ్ఞోజనసమ్పయుత్తో ధమ్మో ఉప్పజ్జతి అధిపతిపచ్చయా… తీణి.

సఞ్ఞోజనవిప్పయుత్తం ధమ్మం పటిచ్చ సఞ్ఞోజనవిప్పయుత్తో ధమ్మో ఉప్పజ్జతి అధిపతిపచ్చయా… ఏకం.

సఞ్ఞోజనసమ్పయుత్తఞ్చ సఞ్ఞోజనవిప్పయుత్తఞ్చ ధమ్మం పటిచ్చ సఞ్ఞోజనవిప్పయుత్తో ధమ్మో ఉప్పజ్జతి అధిపతిపచ్చయా – సఞ్ఞోజనసమ్పయుత్తకే ఖన్ధే చ మహాభూతే చ పటిచ్చ చిత్తసముట్ఠానం రూపం. (౧) (సంఖిత్తం.)