౧. విభఙ్గవారో
హేతుపచ్చయో
౧౫. సఞ్ఞోజనో ధమ్మో సఞ్ఞోజనస్స ధమ్మస్స హేతుపచ్చయేన పచ్చయో – సఞ్ఞోజనా హేతూ సమ్పయుత్తకానం సఞ్ఞోజనానం హేతుపచ్చయేన పచ్చయో. (౧)
సఞ్ఞోజనో ధమ్మో నోసఞ్ఞోజనస్స ధమ్మస్స హేతుపచ్చయేన పచ్చయో – సఞ్ఞోజనా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో. (౨)
సఞ్ఞోజనో ధమ్మో సఞ్ఞోజనస్స చ నోసఞ్ఞోజనస్స చ ధమ్మస్స హేతుపచ్చయేన పచ్చయో – సఞ్ఞోజనా హేతూ సమ్పయుత్తకానం ఖన్ధానం సఞ్ఞోజనానం చిత్తసముట్ఠానానఞ్చ రూపానం హేతుపచ్చయేన పచ్చయో. (౩)
౧౬. నోసఞ్ఞోజనో ధమ్మో నోసఞ్ఞోజనస్స ధమ్మస్స హేతుపచ్చయేన పచ్చయో – నోసఞ్ఞోజనా హేతూ సమ్పయుత్తకానం ఖన్ధానం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే…పే…. (౧)
ఆరమ్మణపచ్చయో
౧౭. సఞ్ఞోజనో ధమ్మో సఞ్ఞోజనస్స ధమ్మస్స ఆరమ్మణపచ్చయేన పచ్చయో – సఞ్ఞోజనే ఆరబ్భ సఞ్ఞోజనా ఉప్పజ్జన్తి. (మూలం కాతబ్బం) సఞ్ఞోజనే ఆరబ్భ నోసఞ్ఞోజనా ఖన్ధా ఉప్పజ్జన్తి. (మూలం కాతబ్బం) సఞ్ఞోజనే ఆరబ్భ సఞ్ఞోజనా చ సమ్పయుత్తకా చ ఖన్ధా ఉప్పజ్జన్తి. (౩)
౧౮. నోసఞ్ఞోజనో ధమ్మో నోసఞ్ఞోజనస్స ధమ్మస్స ఆరమ్మణపచ్చయేన పచ్చయో – దానం దత్వా సీలం…పే… ఉపోసథకమ్మం కత్వా తం పచ్చవేక్ఖతి, పుబ్బే సుచిణ్ణాని…పే… ఝానా…పే… అరియా మగ్గా వుట్ఠహిత్వా మగ్గం పచ్చవేక్ఖన్తి, ఫలం…పే… నిబ్బానం పచ్చవేక్ఖన్తి, నిబ్బానం గోత్రభుస్స, వోదానస్స, మగ్గస్స, ఫలస్స, ఆవజ్జనాయ ఆరమ్మణపచ్చయేన పచ్చయో; అరియా నోసఞ్ఞోజనే పహీనే కిలేసే…పే… విక్ఖమ్భితే కిలేసే…పే… పుబ్బే…పే… చక్ఖుం …పే… వత్థుం నోసఞ్ఞోజనే ఖన్ధే అనిచ్చతో…పే… దోమనస్సం ఉప్పజ్జతి; దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, చేతోపరియఞాణేన నోసఞ్ఞోజనచిత్తసమఙ్గిస్స చిత్తం జానాతి, ఆకాసానఞ్చాయతనం విఞ్ఞాణఞ్చాయతనస్స…పే… ఆకిఞ్చఞ్ఞాయతనం నేవసఞ్ఞానాసఞ్ఞాయతనస్స…పే… రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే… నోసఞ్ఞోజనా ఖన్ధా ఇద్ధివిధఞాణస్స, చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
నోసఞ్ఞోజనో ధమ్మో సఞ్ఞోజనస్స ధమ్మస్స ఆరమ్మణపచ్చయేన పచ్చయో – దానం…పే… సీలం…పే… ఉపోసథకమ్మం…పే… పుబ్బే…పే… ఝానా…పే… చక్ఖుం…పే… వత్థుం నోసఞ్ఞోజనే ఖన్ధే అస్సాదేతి అభినన్దతి, తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి. (౨)
నోసఞ్ఞోజనో ధమ్మో సఞ్ఞోజనస్స చ నోసఞ్ఞోజనస్స చ ధమ్మస్స ఆరమ్మణపచ్చయేన పచ్చయో – దానం దత్వా సీలం…పే… ఉపోసథకమ్మం…పే… పుబ్బే…పే… ఝానా…పే… చక్ఖుం…పే… వత్థుం నోసఞ్ఞోజనే ఖన్ధే అస్సాదేతి అభినన్దతి, తం ఆరబ్భ సఞ్ఞోజనా చ సఞ్ఞోజనసమ్పయుత్తకా చ ఖన్ధా ఉప్పజ్జన్తి. (౩)
సఞ్ఞోజనో చ నోసఞ్ఞోజనో చ ధమ్మా సఞ్ఞోజనస్స ధమ్మస్స ఆరమ్మణపచ్చయేన పచ్చయో… తీణి (ఆరబ్భయేవ కాతబ్బా).
అధిపతిపచ్చయో
౧౯. సఞ్ఞోజనో ధమ్మో సఞ్ఞోజనస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – సఞ్ఞోజనం గరుం కత్వా…పే… తీణి (గరుకారమ్మణా).
నోసఞ్ఞోజనో ధమ్మో నోసఞ్ఞోజనస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – దానం దత్వా సీలం…పే… తీణి (తిణ్ణమ్పి ఆరమ్మణాధిపతి, సహజాతాధిపతిపి కాతబ్బా, విభజితబ్బా తీణిపి).
సఞ్ఞోజనో చ నోసఞ్ఞోజనో చ ధమ్మా సఞ్ఞోజనస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – సఞ్ఞోజనే చ సమ్పయుత్తకే చ ఖన్ధే గరుం కత్వా…పే… తీణి.
అనన్తరపచ్చయో
౨౦. సఞ్ఞోజనో ధమ్మో సఞ్ఞోజనస్స ధమ్మస్స అనన్తరపచ్చయేన పచ్చయో – పురిమా పురిమా సఞ్ఞోజనా పచ్ఛిమానం పచ్ఛిమానం సఞ్ఞోజనానం అనన్తరపచ్చయేన పచ్చయో… తీణి.
నోసఞ్ఞోజనో ధమ్మో నోసఞ్ఞోజనస్స ధమ్మస్స అనన్తరపచ్చయేన పచ్చయో – పురిమా పురిమా నోసఞ్ఞోజనా ఖన్ధా పచ్ఛిమానం…పే… ఫలసమాపత్తియా అనన్తరపచ్చయేన పచ్చయో. (౧)
నోసఞ్ఞోజనో ధమ్మో సఞ్ఞోజనస్స ధమ్మస్స అనన్తరపచ్చయేన పచ్చయో – పురిమా పురిమా నోసఞ్ఞోజనా ఖన్ధా పచ్ఛిమానం పచ్ఛిమానం సఞ్ఞోజనానం అనన్తరపచ్చయేన పచ్చయో; ఆవజ్జనా సఞ్ఞోజనానం అనన్తరపచ్చయేన పచ్చయో (ఏవం ద్వేపి కాతబ్బా). (౩)
సఞ్ఞోజనో చ నోసఞ్ఞోజనో చ ధమ్మా సఞ్ఞోజనస్స ధమ్మస్స అనన్తరపచ్చయేన పచ్చయో… తీణి.
సమనన్తరపచ్చయాది
౨౧. సఞ్ఞోజనో ధమ్మో సఞ్ఞోజనస్స ధమ్మస్స సమనన్తరపచ్చయేన పచ్చయో… నవ… సహజాతపచ్చయేన పచ్చయో… నవ… అఞ్ఞమఞ్ఞపచ్చయేన పచ్చయో… నవ… నిస్సయపచ్చయేన పచ్చయో… నవ.
ఉపనిస్సయపచ్చయో
౨౨. సఞ్ఞోజనో ధమ్మో సఞ్ఞోజనస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సఞ్ఞోజనా సఞ్ఞోజనానం ఉపనిస్సయపచ్చయేన పచ్చయో (ఏవం తీణిపి).
౨౩. నోసఞ్ఞోజనో ధమ్మో నోసఞ్ఞోజనస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ దానం దేతి…పే… సమాపత్తిం ఉప్పాదేతి, మానం జప్పేతి, దిట్ఠిం గణ్హాతి; సీలం…పే… పఞ్ఞం, రాగం…పే… పత్థనం…పే… సేనాసనం ఉపనిస్సాయ దానం దేతి…పే… సఙ్ఘం భిన్దతి; సద్ధా…పే… సేనాసనం సద్ధాయ…పే… ఫలసమాపత్తియా ఉపనిస్సయపచ్చయేన పచ్చయో. (౧)
నోసఞ్ఞోజనో ధమ్మో సఞ్ఞోజనస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ మానం జప్పేతి, దిట్ఠిం గణ్హాతి; సీలం…పే… సేనాసనం ఉపనిస్సాయ పాణం హనతి…పే… సఙ్ఘం భిన్దతి; సద్ధా…పే… సేనాసనం రాగస్స…పే… పత్థనాయ ఉపనిస్సయపచ్చయేన పచ్చయో. (౨)
నోసఞ్ఞోజనో ధమ్మో సఞ్ఞోజనస్స చ నోసఞ్ఞోజనస్స చ ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – సద్ధం ఉపనిస్సాయ మానం జప్పేతి, దిట్ఠిం గణ్హాతి; సీలం…పే… సేనాసనం ఉపనిస్సాయ పాణం హనతి…పే… సఙ్ఘం భిన్దతి; సద్ధా…పే… సేనాసనం సఞ్ఞోజనానం సమ్పయుత్తకానఞ్చ ఖన్ధానం ఉపనిస్సయపచ్చయేన పచ్చయో. (౩)
సఞ్ఞోజనో చ నోసఞ్ఞోజనో చ ధమ్మా సఞ్ఞోజనస్స ధమ్మస్స ఉపనిస్సయపచ్చయేన పచ్చయో… తీణి.
పురేజాతపచ్చయో
౨౪. నోసఞ్ఞోజనో ధమ్మో నోసఞ్ఞోజనస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం అనిచ్చతో…పే… దోమనస్సం ఉప్పజ్జతి; దిబ్బేన చక్ఖునా రూపం పస్సతి, దిబ్బాయ సోతధాతుయా సద్దం సుణాతి, రూపాయతనం చక్ఖువిఞ్ఞాణస్స…పే… ఫోట్ఠబ్బాయతనం కాయవిఞ్ఞాణస్స…పే…. వత్థుపురేజాతం – చక్ఖాయతనం చక్ఖువిఞ్ఞాణస్స…పే… కాయాయతనం కాయవిఞ్ఞాణస్స…పే… వత్థు నోసఞ్ఞోజనానం ఖన్ధానం పురేజాతపచ్చయేన పచ్చయో. (౧)
నోసఞ్ఞోజనో ధమ్మో సఞ్ఞోజనస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం అస్సాదేతి అభినన్దతి, తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి. వత్థుపురేజాతం – వత్థు సఞ్ఞోజనానం పురేజాతపచ్చయేన పచ్చయో. (౨)
నోసఞ్ఞోజనో ధమ్మో సఞ్ఞోజనస్స చ నోసఞ్ఞోజనస్స చ ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం. ఆరమ్మణపురేజాతం – చక్ఖుం…పే… వత్థుం అస్సాదేతి, అభినన్దతి, తం ఆరబ్భ సఞ్ఞోజనా చ సమ్పయుత్తకా చ ఖన్ధా ఉప్పజ్జన్తి. వత్థుపురేజాతం – వత్థు సఞ్ఞోజనానం సమ్పయుత్తకానఞ్చ ఖన్ధానం పురేజాతపచ్చయేన పచ్చయో. (౩)
పచ్ఛాజాతపచ్చయో
౨౫. సఞ్ఞోజనో ధమ్మో నోసఞ్ఞోజనస్స ధమ్మస్స పచ్ఛాజాతపచ్చయేన పచ్చయో… ఏకం.
నోసఞ్ఞోజనో ధమ్మో నోసఞ్ఞోజనస్స ధమ్మస్స పచ్ఛాజాతపచ్చయేన పచ్చయో…పే…. (౧)
సఞ్ఞోజనో చ నోసఞ్ఞోజనో చ ధమ్మా నోసఞ్ఞోజనస్స ధమ్మస్స పచ్ఛాజాతపచ్చయేన పచ్చయో…పే…. (౧)
ఆసేవనపచ్చయో
౨౬. సఞ్ఞోజనో ధమ్మో సఞ్ఞోజనస్స ధమ్మస్స ఆసేవనపచ్చయేన పచ్చయో… నవ.
కమ్మపచ్చయాది
౨౭. నోసఞ్ఞోజనో ధమ్మో నోసఞ్ఞోజనస్స ధమ్మస్స కమ్మపచ్చయేన పచ్చయో… తీణి… విపాకపచ్చయేన పచ్చయో… ఏకం… ఆహారపచ్చయేన పచ్చయో… తీణి… ఇన్ద్రియపచ్చయేన పచ్చయో… తీణి… ఝానపచ్చయేన పచ్చయో… తీణి… మగ్గపచ్చయేన పచ్చయో… నవ… సమ్పయుత్తపచ్చయేన పచ్చయో… నవ.
విప్పయుత్తపచ్చయో
౨౮. సఞ్ఞోజనో ధమ్మో నోసఞ్ఞోజనస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం (విభజితబ్బం). (౧)
నోసఞ్ఞోజనో ధమ్మో నోసఞ్ఞోజనస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం (విభజితబ్బం). (౧)
నోసఞ్ఞోజనో ధమ్మో సఞ్ఞోజనస్స ధమ్మస్స విప్పయుత్తపచ్చయేన పచ్చయో. పురేజాతం – వత్థు సఞ్ఞోజనానం విప్పయుత్తపచ్చయేన పచ్చయో. (౨)
నోసఞ్ఞోజనో ధమ్మో సఞ్ఞోజనస్స చ నోసఞ్ఞోజనస్స చ ధమ్మస్స విప్పయుత్తపచ్చయేన పచ్చయో. పురేజాతం – వత్థు సఞ్ఞోజనానం సమ్పయుత్తకానఞ్చ ఖన్ధానం విప్పయుత్తపచ్చయేన పచ్చయో. (౩)
సఞ్ఞోజనో చ నోసఞ్ఞోజనో చ ధమ్మా నోసఞ్ఞోజనస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం (విభజితబ్బం). (౧)
అత్థిపచ్చయో
౨౯. సఞ్ఞోజనో ధమ్మో సఞ్ఞోజనస్స ధమ్మస్స అత్థిపచ్చయేన పచ్చయో… ఏకం (పటిచ్చసదిసం). (౧)
సఞ్ఞోజనో ధమ్మో నోసఞ్ఞోజనస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం (సంఖిత్తం). (౨)
సఞ్ఞోజనో ధమ్మో సఞ్ఞోజనస్స చ నోసఞ్ఞోజనస్స చ ధమ్మస్స అత్థిపచ్చయేన పచ్చయో (పటిచ్చసదిసం). (౩)
౩౦. నోసఞ్ఞోజనో ధమ్మో నోసఞ్ఞోజనస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం (సంఖిత్తం). (౧)
నోసఞ్ఞోజనో ధమ్మో సఞ్ఞోజనస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతా – నోసఞ్ఞోజనా ఖన్ధా సమ్పయుత్తకానం సఞ్ఞోజనానం అత్థిపచ్చయేన పచ్చయో. పురేజాతం – చక్ఖుం…పే… వత్థుం అస్సాదేతి అభినన్దతి, తం ఆరబ్భ రాగో ఉప్పజ్జతి…పే… దోమనస్సం ఉప్పజ్జతి, వత్థు సఞ్ఞోజనానం అత్థిపచ్చయేన పచ్చయో. (౨)
నోసఞ్ఞోజనో ధమ్మో సఞ్ఞోజనస్స చ నోసఞ్ఞోజనస్స చ ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – నోసఞ్ఞోజనో…పే… (సంఖిత్తం, ఆసవసదిసం). (౩)
౩౧. సఞ్ఞోజనో చ నోసఞ్ఞోజనో చ ధమ్మా సఞ్ఞోజనస్స ధమ్మస్స అత్థిపచ్చయేన పచ్చయో – సహజాతం, పురేజాతం (ఆసవసదిసం). (౧)
సఞ్ఞోజనో చ నోసఞ్ఞోజనో చ ధమ్మా నోసఞ్ఞోజనస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం (విభజితబ్బం ఆసవసదిసం). (౨)
సఞ్ఞోజనో చ నోసఞ్ఞోజనో చ ధమ్మా సఞ్ఞోజనస్స చ నోసఞ్ఞోజనస్స చ ధమ్మస్స అత్థిపచ్చయేన పచ్చయో – సహజాతం, పురేజాతం (విభజితబ్బం ఆసవసదిసం). (౩)