౧. విభఙ్గవారో

హేతుపచ్చయో

౧౦౨. ఉపాదానో చేవ ఉపాదానసమ్పయుత్తో చ ధమ్మో ఉపాదానస్స చేవ ఉపాదానసమ్పయుత్తస్స చ ధమ్మస్స హేతుపచ్చయేన పచ్చయో – ఉపాదానా చేవ ఉపాదానసమ్పయుత్తా చ హేతూ సమ్పయుత్తకానం ఉపాదానానం హేతుపచ్చయేన పచ్చయో. (మూలం పుచ్ఛితబ్బం) ఉపాదానా చేవ ఉపాదానసమ్పయుత్తా చ హేతూ సమ్పయుత్తకానం ఖన్ధానం హేతుపచ్చయేన పచ్చయో. (మూలం పుచ్ఛితబ్బం) ఉపాదానా చేవ ఉపాదానసమ్పయుత్తా చ హేతూ సమ్పయుత్తకానం ఖన్ధానం ఉపాదానానఞ్చ హేతుపచ్చయేన పచ్చయో. (౩)

౧౦౩. ఉపాదానసమ్పయుత్తో చేవ నో చ ఉపాదానో ధమ్మో ఉపాదానసమ్పయుత్తస్స చేవ నో చ ఉపాదానస్స ధమ్మస్స హేతుపచ్చయేన పచ్చయో – ఉపాదానసమ్పయుత్తా చేవ నో చ ఉపాదానా హేతూ సమ్పయుత్తకానం ఖన్ధానం హేతుపచ్చయేన పచ్చయో. (మూలం పుచ్ఛితబ్బం) ఉపాదానసమ్పయుత్తా చేవ నో చ ఉపాదానా హేతూ సమ్పయుత్తకానం ఉపాదానానం హేతుపచ్చయేన పచ్చయో. (మూలం పుచ్ఛితబ్బం) ఉపాదానసమ్పయుత్తా చేవ నో చ ఉపాదానా హేతూ సమ్పయుత్తకానం ఖన్ధానం ఉపాదానానఞ్చ హేతుపచ్చయేన పచ్చయో. (౩)

౧౦౪. ఉపాదానో చేవ ఉపాదానసమ్పయుత్తో చ ఉపాదానసమ్పయుత్తో చేవ నో చ ఉపాదానో చ ధమ్మా ఉపాదానస్స చేవ ఉపాదానసమ్పయుత్తస్స చ ధమ్మస్స హేతుపచ్చయేన పచ్చయో – ఉపాదానా చేవ ఉపాదానసమ్పయుత్తా చ ఉపాదానసమ్పయుత్తా చేవ నో చ ఉపాదానా చ హేతూ సమ్పయుత్తకానం ఉపాదానానం హేతుపచ్చయేన పచ్చయో. (మూలం పుచ్ఛితబ్బం) ఉపాదానా చేవ ఉపాదానసమ్పయుత్తా చ ఉపాదానసమ్పయుత్తా చేవ నో చ ఉపాదానా చ హేతూ సమ్పయుత్తకానం ఖన్ధానం హేతుపచ్చయేన పచ్చయో. (మూలం పుచ్ఛితబ్బం) ఉపాదానా చేవ ఉపాదానసమ్పయుత్తా చ ఉపాదానసమ్పయుత్తా చేవ నో చ ఉపాదానా చ హేతూ సమ్పయుత్తకానం ఖన్ధానం ఉపాదానానఞ్చ హేతుపచ్చయేన పచ్చయో. (౩)

ఆరమ్మణపచ్చయో

౧౦౫. ఉపాదానో చేవ ఉపాదానసమ్పయుత్తో చ ధమ్మో ఉపాదానస్స చేవ ఉపాదానసమ్పయుత్తస్స చ ధమ్మస్స ఆరమ్మణపచ్చయేన పచ్చయో – ఉపాదానే ఆరబ్భ ఉపాదానా ఉప్పజ్జన్తి. (మూలం పుచ్ఛితబ్బం) ఉపాదానే ఆరబ్భ ఉపాదానసమ్పయుత్తా చేవ నో చ ఉపాదానా ఖన్ధా ఉప్పజ్జన్తి. (మూలం పుచ్ఛితబ్బం) ఉపాదానే ఆరబ్భ ఉపాదానా చ సమ్పయుత్తకా చ ఖన్ధా ఉప్పజ్జన్తి. (౩)

ఉపాదానసమ్పయుత్తో చేవ నో చ ఉపాదానో ధమ్మో ఉపాదానసమ్పయుత్తస్స చేవ నో చ ఉపాదానస్స ధమ్మస్స ఆరమ్మణపచ్చయేన పచ్చయో – ఉపాదానసమ్పయుత్తే చేవ నో చ ఉపాదానే ఖన్ధే ఆరబ్భ ఉపాదానసమ్పయుత్తా చేవ నో చ ఉపాదానా ఖన్ధా ఉప్పజ్జన్తి (తీణిపి కాతబ్బా, ఘటనే తీణిపి కాతబ్బా).

అధిపతిపచ్చయో

౧౦౬. ఉపాదానో చేవ ఉపాదానసమ్పయుత్తో చ ధమ్మో ఉపాదానస్స చేవ ఉపాదానసమ్పయుత్తస్స చ ధమ్మస్స అధిపతిపచ్చయేన పచ్చయో… తీణి. (౩)

ఉపాదానసమ్పయుత్తో చేవ నో చ ఉపాదానో ధమ్మో ఉపాదానసమ్పయుత్తస్స చేవ నో చ ఉపాదానస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి (తీణిపి, తీసుపి ద్వేపి అధిపతి కాతబ్బా, ఘటనాధిపతిపి తీణి).

అనన్తరపచ్చయో

౧౦౭. ఉపాదానో చేవ ఉపాదానసమ్పయుత్తో చ ధమ్మో ఉపాదానస్స చేవ ఉపాదానసమ్పయుత్తస్స చ ధమ్మస్స అనన్తరపచ్చయేన పచ్చయో – పురిమా పురిమా ఉపాదానా చేవ ఉపాదానసమ్పయుత్తా చ ఖన్ధా పచ్ఛిమానం పచ్ఛిమానం ఉపాదానానం అనన్తరపచ్చయేన పచ్చయో (ఏవం నవపి పఞ్హా కాతబ్బా, ఆవజ్జనాపి వుట్ఠానమ్పి నత్థి).

సమనన్తరపచ్చయాది

౧౦౮. ఉపాదానో చేవ ఉపాదానసమ్పయుత్తో చ ధమ్మో ఉపాదానస్స చేవ ఉపాదానసమ్పయుత్తస్స చ ధమ్మస్స సమనన్తరపచ్చయేన పచ్చయో… నవ… సహజాతపచ్చయేన పచ్చయో… నవ… అఞ్ఞమఞ్ఞపచ్చయేన పచ్చయో… నవ… నిస్సయపచ్చయేన పచ్చయో… నవ.

ఉపనిస్సయపచ్చయో

౧౦౯. ఉపాదానో చేవ ఉపాదానసమ్పయుత్తో చ ధమ్మో ఉపాదానస్స చేవ ఉపాదానసమ్పయుత్తస్స చ ధమ్మస్స ఉపనిస్సయపచ్చయేన పచ్చయో…పే… తీణి.

ఉపాదానసమ్పయుత్తో చేవ నో చ ఉపాదానో ధమ్మో ఉపాదానసమ్పయుత్తస్స చేవ నో చ ఉపాదానస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – ఉపాదానసమ్పయుత్తా చేవ నో చ ఉపాదానా ఖన్ధా ఉపాదానసమ్పయుత్తకానఞ్చేవ నో చ ఉపాదానానం ఖన్ధానం ఉపనిస్సయపచ్చయేన పచ్చయో (తీణి ఘటనుపనిస్సయేపి తీణి)… ఆసేవనపచ్చయేన పచ్చయో… నవ.

కమ్మపచ్చయాది

౧౧౦. ఉపాదానసమ్పయుత్తో చేవ నో చ ఉపాదానో ధమ్మో ఉపాదానసమ్పయుత్తస్స చేవ నో చ ఉపాదానస్స ధమ్మస్స కమ్మపచ్చయేన పచ్చయో… తీణి… ఆహారపచ్చయేన పచ్చయో… తీణి… ఇన్ద్రియపచ్చయేన పచ్చయో… తీణి… ఝానపచ్చయేన పచ్చయో… తీణి… మగ్గపచ్చయేన పచ్చయో… నవ… సమ్పయుత్తపచ్చయేన పచ్చయో… నవ… అత్థిపచ్చయేన పచ్చయో… నవ… నత్థిపచ్చయేన పచ్చయో… నవ… విగతపచ్చయేన పచ్చయో… నవ… అవిగతపచ్చయేన పచ్చయో… నవ.