౧. విభఙ్గవారో

నహేతుపచ్చయో

౬. నోఉపాదానం ధమ్మం పటిచ్చ నోఉపాదానో ధమ్మో ఉప్పజ్జతి నహేతుపచ్చయా – అహేతుకం నోఉపాదానం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం…పే… మహాభూతే పటిచ్చ చిత్తసముట్ఠానం రూపం కటత్తారూపం ఉపాదారూపం; బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

నఆరమ్మణపచ్చయాది

౭. ఉపాదానం ధమ్మం పటిచ్చ నోఉపాదానో ధమ్మో ఉప్పజ్జతి నఆరమ్మణపచ్చయా – ఉపాదానే పటిచ్చ చిత్తసముట్ఠానం రూపం. (౧)

నోఉపాదానం ధమ్మం పటిచ్చ నోఉపాదానో ధమ్మో ఉప్పజ్జతి నఆరమ్మణపచ్చయా – నోఉపాదానే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే నోఉపాదానే ఖన్ధే పటిచ్చ కటత్తారూపం, ఖన్ధే పటిచ్చ వత్థు, ఏకం మహాభూతం…పే… (యావ అసఞ్ఞసత్తా). (౧)

ఉపాదానఞ్చ నోఉపాదానం చ ధమ్మం పటిచ్చ నోఉపాదానో ధమ్మో ఉప్పజ్జతి నఆరమ్మణపచ్చయా – ఉపాదానే చ సమ్పయుత్తకే చ ఖన్ధే పటిచ్చ చిత్తసముట్ఠానం రూపం, ఉపాదానే చ మహాభూతే చ పటిచ్చ చిత్తసముట్ఠానం రూపం. (౧)

నఅధిపతిపచ్చయా… నఅనన్తరపచ్చయా…పే… నఉపనిస్సయపచ్చయా.

నపురేజాతపచ్చయో

౮. ఉపాదానం ధమ్మం పటిచ్చ ఉపాదానో ధమ్మో ఉప్పజ్జతి నపురేజాతపచ్చయా – అరూపే అత్తవాదుపాదానం పటిచ్చ కాముపాదానం, కాముపాదానం పటిచ్చ అత్తవాదుపాదానం. (౧)

ఉపాదానం ధమ్మం పటిచ్చ నోఉపాదానో ధమ్మో ఉప్పజ్జతి నపురేజాతపచ్చయా – అరూపే ఉపాదానే పటిచ్చ సమ్పయుత్తకా ఖన్ధా, ఉపాదానే పటిచ్చ చిత్తసముట్ఠానం రూపం (సంఖిత్తం, నవపి పఞ్హా అరూపే ద్వే ఉపాదానా).