౧-౪. పచ్చయానులోమాది

౬౨. ఉపాదానసమ్పయుత్తం ధమ్మం సంసట్ఠో ఉపాదానసమ్పయుత్తో ధమ్మో ఉప్పజ్జతి హేతుపచ్చయా – ఉపాదానసమ్పయుత్తం ఏకం ఖన్ధం సంసట్ఠా… తీణి.

ఉపాదానవిప్పయుత్తం ధమ్మం సంసట్ఠో ఉపాదానవిప్పయుత్తో ధమ్మో ఉప్పజ్జతి హేతుపచ్చయా (పటిచ్చసదిసం, అరూపంయేవ కాతబ్బం).

ఉపాదానవిప్పయుత్తం ధమ్మం సంసట్ఠో ఉపాదానసమ్పయుత్తో ధమ్మో ఉప్పజ్జతి హేతుపచ్చయా (పటిచ్చసదిసం, అరూపంయేవ కాతబ్బం).

ఉపాదానసమ్పయుత్తఞ్చ ఉపాదానవిప్పయుత్తఞ్చ ధమ్మం సంసట్ఠో ఉపాదానసమ్పయుత్తో ధమ్మో ఉప్పజ్జతి హేతుపచ్చయా (పటిచ్చసదిసం, అరూపంయేవ కాతబ్బం).

హేతుయా ఛ, ఆరమ్మణే ఛ, అధిపతియా ఛ (సబ్బత్థ ఛ), విపాకే ఏకం…పే… అవిగతే ఛ.

అనులోమం.

ఉపాదానవిప్పయుత్తం ధమ్మం సంసట్ఠో ఉపాదానవిప్పయుత్తో ధమ్మో ఉప్పజ్జతి నహేతుపచ్చయా (సంఖిత్తం).

నహేతుయా ఏకం, నఅధిపతియా ఛ, నపురేజాతే ఛ, నపచ్ఛాజాతే ఛ, నఆసేవనే ఛ, నకమ్మే చత్తారి, నవిపాకే ఛ, నఝానే ఏకం, నమగ్గే ఏకం, నవిప్పయుత్తే ఛ.

పచ్చనీయం.