౧. విభఙ్గవారో

హేతుపచ్చయో

౧. ఉపాదానం ధమ్మం పటిచ్చ ఉపాదానో ధమ్మో ఉప్పజ్జతి హేతుపచ్చయా – దిట్ఠుపాదానం పటిచ్చ కాముపాదానం, కాముపాదానం పటిచ్చ దిట్ఠుపాదానం, సీలబ్బతుపాదానం పటిచ్చ కాముపాదానం, కాముపాదానం పటిచ్చ సీలబ్బతుపాదానం, అత్తవాదుపాదానం పటిచ్చ కాముపాదానం, కాముపాదానం పటిచ్చ అత్తవాదుపాదానం. (౧)

ఉపాదానం ధమ్మం పటిచ్చ నోఉపాదానో ధమ్మో ఉప్పజ్జతి హేతుపచ్చయా – ఉపాదానే పటిచ్చ సమ్పయుత్తకా ఖన్ధా చిత్తసముట్ఠానఞ్చ రూపం. (౨)

ఉపాదానం ధమ్మం పటిచ్చ ఉపాదానో చ నోఉపాదానో చ ధమ్మా ఉప్పజ్జన్తి హేతుపచ్చయా – దిట్ఠుపాదానం పటిచ్చ కాముపాదానం సమ్పయుత్తకా చ ఖన్ధా చిత్తసముట్ఠానఞ్చ రూపం, కాముపాదానం…పే… (సబ్బం చక్కం కాతబ్బం). (౩)

౨. నోఉపాదానం ధమ్మం పటిచ్చ నోఉపాదానో ధమ్మో ఉప్పజ్జతి హేతుపచ్చయా – నోఉపాదానం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే నోఉపాదానం ఏకం ఖన్ధం పటిచ్చ తయో ఖన్ధా కటత్తా చ రూపం…పే… ద్వే ఖన్ధే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం…పే… మహాభూతే పటిచ్చ చిత్తసముట్ఠానం రూపం కటత్తారూపం ఉపాదారూపం. (౧)

నోఉపాదానం ధమ్మం పటిచ్చ ఉపాదానో ధమ్మో ఉప్పజ్జతి హేతుపచ్చయా – నోఉపాదానే ఖన్ధే పటిచ్చ ఉపాదానా. (౨)

నోఉపాదానం ధమ్మం పటిచ్చ ఉపాదానో చ నోఉపాదానో చ ధమ్మా ఉప్పజ్జన్తి హేతుపచ్చయా – నోఉపాదానం ఏకం ఖన్ధం పటిచ్చ తయో ఖన్ధా ఉపాదానా చ చిత్తసముట్ఠానఞ్చ రూపం…పే… ద్వే ఖన్ధే పటిచ్చ ద్వే ఖన్ధా ఉపాదానా చ చిత్తసముట్ఠానఞ్చ రూపం. (౩)

౩. ఉపాదానఞ్చ నోఉపాదానఞ్చ ధమ్మం పటిచ్చ ఉపాదానో ధమ్మో ఉప్పజ్జతి హేతుపచ్చయా – దిట్ఠుపాదానఞ్చ సమ్పయుత్తకే చ ఖన్ధే పటిచ్చ కాముపాదానం (సబ్బే చక్కా కాతబ్బా). (౧)

ఉపాదానఞ్చ నోఉపాదానఞ్చ ధమ్మం పటిచ్చ నోఉపాదానో ధమ్మో ఉప్పజ్జతి హేతుపచ్చయా – నోఉపాదానం ఏకం ఖన్ధఞ్చ ఉపాదానఞ్చ పటిచ్చ తయో ఖన్ధా చిత్తసముట్ఠానఞ్చ రూపం, ద్వే ఖన్ధే చ…పే… ఉపాదానఞ్చ మహాభూతే చ పటిచ్చ చిత్తసముట్ఠానం రూపం. (౨)

ఉపాదానఞ్చ నోఉపాదానఞ్చ ధమ్మం పటిచ్చ ఉపాదానో చ నోఉపాదానో చ ధమ్మా ఉప్పజ్జన్తి హేతుపచ్చయా – నోఉపాదానం ఏకం ఖన్ధఞ్చ దిట్ఠుపాదానఞ్చ పటిచ్చ తయో ఖన్ధా కాముపాదానఞ్చ చిత్తసముట్ఠానం రూపం, ద్వే ఖన్ధే చ…పే… (చక్కం కాతబ్బం). (౩)

ఆరమ్మణపచ్చయో

౪. ఉపాదానం ధమ్మం పటిచ్చ ఉపాదానో ధమ్మో ఉప్పజ్జతి ఆరమ్మణపచ్చయా (నవపి పఞ్హా కాతబ్బా, రూపం ఛడ్డేతబ్బం).