౧. విభఙ్గవారో

నహేతుపచ్చయో

౫౧. ఉపాదానవిప్పయుత్తం ధమ్మం పటిచ్చ ఉపాదానవిప్పయుత్తో ధమ్మో ఉప్పజ్జతి నహేతుపచ్చయా – అహేతుకం ఉపాదానవిప్పయుత్తం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే…పే… (యావ అసఞ్ఞసత్తా) విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

నఆరమ్మణపచ్చయాది

౫౨. ఉపాదానసమ్పయుత్తం ధమ్మం పటిచ్చ ఉపాదానవిప్పయుత్తో ధమ్మో ఉప్పజ్జతి నఆరమ్మణపచ్చయా – ఉపాదానసమ్పయుత్తే ఖన్ధే పటిచ్చ చిత్తసముట్ఠానం రూపం. (౧)

ఉపాదానవిప్పయుత్తం ధమ్మం పటిచ్చ ఉపాదానవిప్పయుత్తో ధమ్మో ఉప్పజ్జతి నఆరమ్మణపచ్చయా – ఉపాదానవిప్పయుత్తే ఖన్ధే పటిచ్చ చిత్తసముట్ఠానం రూపం, దిట్ఠిగతవిప్పయుత్తం లోభం పటిచ్చ చిత్తసముట్ఠానం రూపం; పటిసన్ధిక్ఖణే…పే… (యావ అసఞ్ఞసత్తా). (౧)

ఉపాదానసమ్పయుత్తఞ్చ ఉపాదానవిప్పయుత్తఞ్చ ధమ్మం పటిచ్చ ఉపాదానవిప్పయుత్తో ధమ్మో ఉప్పజ్జతి నఆరమ్మణపచ్చయా – ఉపాదానసమ్పయుత్తే ఖన్ధే చ మహాభూతే చ పటిచ్చ చిత్తసముట్ఠానం రూపం, దిట్ఠిగతవిప్పయుత్తలోభసహగతే ఖన్ధే చ లోభఞ్చ పటిచ్చ చిత్తసముట్ఠానం రూపం. (౧)

నఅధిపతిపచ్చయా… నఅనన్తరపచ్చయా… నసమనన్తరపచ్చయా… నఉపనిస్సయపచ్చయా.

నపురేజాతపచ్చయాది

౫౩. ఉపాదానసమ్పయుత్తం ధమ్మం పటిచ్చ ఉపాదానసమ్పయుత్తో ధమ్మో ఉప్పజ్జతి నపురేజాతపచ్చయా – అరూపే ఉపాదానసమ్పయుత్తం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

ఉపాదానసమ్పయుత్తం ధమ్మం పటిచ్చ ఉపాదానవిప్పయుత్తో ధమ్మో ఉప్పజ్జతి నపురేజాతపచ్చయా – అరూపే దిట్ఠిగతవిప్పయుత్తలోభసహగతే ఖన్ధే పటిచ్చ లోభో, ఉపాదానసమ్పయుత్తే ఖన్ధే పటిచ్చ చిత్తసముట్ఠానం రూపం. (౨)

ఉపాదానసమ్పయుత్తం ధమ్మం పటిచ్చ ఉపాదానసమ్పయుత్తో చ ఉపాదానవిప్పయుత్తో చ ధమ్మా ఉప్పజ్జన్తి నపురేజాతపచ్చయా – అరూపే దిట్ఠిగతవిప్పయుత్తలోభసహగతం ఏకం ఖన్ధం పటిచ్చ తయో ఖన్ధా లోభో చ…పే… ద్వే ఖన్ధే…పే…. (౩)

౫౪. ఉపాదానవిప్పయుత్తం ధమ్మం పటిచ్చ ఉపాదానవిప్పయుత్తో ధమ్మో ఉప్పజ్జతి నపురేజాతపచ్చయా – అరూపే ఉపాదానవిప్పయుత్తం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… ఉపాదానవిప్పయుత్తే ఖన్ధే పటిచ్చ చిత్తసముట్ఠానం రూపం, దిట్ఠిగతవిప్పయుత్తం లోభం పటిచ్చ చిత్తసముట్ఠానం రూపం; పటిసన్ధిక్ఖణే…పే… (యావ అసఞ్ఞసత్తా). (౧)

ఉపాదానవిప్పయుత్తం ధమ్మం పటిచ్చ ఉపాదానసమ్పయుత్తో ధమ్మో ఉప్పజ్జతి నపురేజాతపచ్చయా – అరూపే దిట్ఠిగతవిప్పయుత్తం లోభం పటిచ్చ సమ్పయుత్తకా ఖన్ధా. (౨)

ఉపాదానసమ్పయుత్తఞ్చ ఉపాదానవిప్పయుత్తఞ్చ ధమ్మం పటిచ్చ ఉపాదానసమ్పయుత్తో ధమ్మో ఉప్పజ్జతి నపురేజాతపచ్చయా – అరూపే దిట్ఠిగతవిప్పయుత్తలోభసహగతం ఏకం ఖన్ధఞ్చ లోభఞ్చ పటిచ్చ తయో ఖన్ధా…పే… ద్వే ఖన్ధే చ…పే…. (౧)

ఉపాదానసమ్పయుత్తఞ్చ ఉపాదానవిప్పయుత్తఞ్చ ధమ్మం పటిచ్చ ఉపాదానవిప్పయుత్తో ధమ్మో ఉప్పజ్జతి నపురేజాతపచ్చయా – ఉపాదానసమ్పయుత్తే ఖన్ధే చ మహాభూతే చ పటిచ్చ చిత్తసముట్ఠానం రూపం, దిట్ఠిగతవిప్పయుత్తలోభసహగతే ఖన్ధే చ లోభఞ్చ పటిచ్చ చిత్తసముట్ఠానం రూపం. (౨)

నపచ్ఛాజాతపచ్చయా… నఆసేవనపచ్చయా.

నకమ్మపచ్చయో

౫౫. ఉపాదానసమ్పయుత్తం ధమ్మం పటిచ్చ ఉపాదానసమ్పయుత్తో ధమ్మో ఉప్పజ్జతి నకమ్మపచ్చయా – ఉపాదానసమ్పయుత్తే ఖన్ధే పటిచ్చ సమ్పయుత్తకా చేతనా. (౧)

ఉపాదానవిప్పయుత్తం ధమ్మం పటిచ్చ ఉపాదానవిప్పయుత్తో ధమ్మో ఉప్పజ్జతి నకమ్మపచ్చయా – ఉపాదానవిప్పయుత్తే ఖన్ధే పటిచ్చ సమ్పయుత్తకా చేతనా; బాహిరం… ఆహారసముట్ఠానం… ఉతుసముట్ఠానం…పే…. (౧)

ఉపాదానవిప్పయుత్తం ధమ్మం పటిచ్చ ఉపాదానసమ్పయుత్తో ధమ్మో ఉప్పజ్జతి నకమ్మపచ్చయా – దిట్ఠిగతవిప్పయుత్తం లోభం పటిచ్చ సమ్పయుత్తకా చేతనా. (౨)

ఉపాదానసమ్పయుత్తఞ్చ ఉపాదానవిప్పయుత్తఞ్చ ధమ్మం పటిచ్చ ఉపాదానసమ్పయుత్తో ధమ్మో ఉప్పజ్జతి నకమ్మపచ్చయా – దిట్ఠిగతవిప్పయుత్తలోభసహగతే ఖన్ధే చ లోభఞ్చ పటిచ్చ సమ్పయుత్తకా చేతనా. (౧) (సంఖిత్తం.)