౧. విభఙ్గవారో

హేతుపచ్చయో

౧. సారమ్మణం ధమ్మం పటిచ్చ సారమ్మణో ధమ్మో ఉప్పజ్జతి హేతుపచ్చయా – సారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧)

సారమ్మణం ధమ్మం పటిచ్చ అనారమ్మణో ధమ్మో ఉప్పజ్జతి హేతుపచ్చయా – సారమ్మణే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే…పే…. (౨)

సారమ్మణం ధమ్మం పటిచ్చ సారమ్మణో చ అనారమ్మణో చ ధమ్మా ఉప్పజ్జన్తి హేతుపచ్చయా – సారమ్మణం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే…పే…. (౩)

౨. అనారమ్మణం ధమ్మం పటిచ్చ అనారమ్మణో ధమ్మో ఉప్పజ్జతి హేతుపచ్చయా – ఏకం మహాభూతం…పే… మహాభూతే పటిచ్చ చిత్తసముట్ఠానం రూపం కటత్తారూపం ఉపాదారూపం. (౧)

అనారమ్మణం ధమ్మం పటిచ్చ సారమ్మణో ధమ్మో ఉప్పజ్జతి హేతుపచ్చయా – పటిసన్ధిక్ఖణే వత్థుం పటిచ్చ సారమ్మణా ఖన్ధా. (౨)

అనారమ్మణం ధమ్మం పటిచ్చ సారమ్మణో చ అనారమ్మణో చ ధమ్మో ఉప్పజ్జన్తి హేతుపచ్చయా – పటిసన్ధిక్ఖణే వత్థుం పటిచ్చ సారమ్మణా ఖన్ధా, మహాభూతే పటిచ్చ కటత్తారూపం. (౩)

౩. సారమ్మణఞ్చ అనారమ్మణఞ్చ ధమ్మం పటిచ్చ సారమ్మణో ధమ్మో ఉప్పజ్జతి హేతుపచ్చయా – పటిసన్ధిక్ఖణే సారమ్మణం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే చ…పే…. (౧)

సారమ్మణఞ్చ అనారమ్మణఞ్చ ధమ్మం పటిచ్చ అనారమ్మణో ధమ్మో ఉప్పజ్జతి హేతుపచ్చయా – సారమ్మణే ఖన్ధే చ మహాభూతే చ పటిచ్చ చిత్తసముట్ఠానం రూపం; పటిసన్ధిక్ఖణే…పే…. (౨)

సారమ్మణఞ్చ అనారమ్మణఞ్చ ధమ్మం పటిచ్చ సారమ్మణో చ అనారమ్మణో చ ధమ్మా ఉప్పజ్జన్తి హేతుపచ్చయా – పటిసన్ధిక్ఖణే సారమ్మణం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే చ…పే… సారమ్మణే ఖన్ధే చ మహాభూతే చ పటిచ్చ కటత్తారూపం. (౩)

ఆరమ్మణపచ్చయో

౪. సారమ్మణం ధమ్మం పటిచ్చ సారమ్మణో ధమ్మో ఉప్పజ్జతి ఆరమ్మణపచ్చయా – సారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే….

అనారమ్మణం ధమ్మం పటిచ్చ సారమ్మణో ధమ్మో ఉప్పజ్జతి ఆరమ్మణపచ్చయా – పటిసన్ధిక్ఖణే వత్థుం పటిచ్చ సారమ్మణా ఖన్ధా.

సారమ్మణఞ్చ అనారమ్మణఞ్చ ధమ్మం పటిచ్చ సారమ్మణో ధమ్మో ఉప్పజ్జతి ఆరమ్మణపచ్చయా – పటిసన్ధిక్ఖణే సారమ్మణం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే చ…పే… (సంఖిత్తం).