౨. సఙ్ఖ్యావారో

సుద్ధం

౪౬౬. హేతుయా చత్తారి, ఆరమ్మణే చత్తారి, అధిపతియా ద్వే, అనన్తరే చత్తారి, సమనన్తరే చత్తారి, సహజాతే పఞ్చ, అఞ్ఞమఞ్ఞే ద్వే, నిస్సయే పఞ్చ, ఉపనిస్సయే చత్తారి, పురేజాతే ఛ, పచ్ఛాజాతే ఛ, ఆసేవనే ఏకం, కమ్మే పఞ్చ, విపాకే చత్తారి, ఆహారే నవ, ఇన్ద్రియే చత్తారి, ఝానే చత్తారి, మగ్గే చత్తారి, సమ్పయుత్తే ద్వే, విప్పయుత్తే ఛ, అత్థియా నవ, నత్థియా చత్తారి, విగతే చత్తారి, అవిగతే నవ.

పచ్చనీయుద్ధారో

౪౬౭. ఉపాదిన్నో ధమ్మో ఉపాదిన్నస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… పురేజాతపచ్చయేన పచ్చయో… పచ్ఛాజాతపచ్చయేన పచ్చయో… ఆహారపచ్చయేన పచ్చయో… ఇన్ద్రియపచ్చయేన పచ్చయో. (౧)

ఉపాదిన్నో ధమ్మో అనుపాదిన్నస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… పురేజాతపచ్చయేన పచ్చయో… పచ్ఛాజాతపచ్చయేన పచ్చయో… ఆహారపచ్చయేన పచ్చయో. (౨)

ఉపాదిన్నో ధమ్మో ఉపాదిన్నస్స చ అనుపాదిన్నస్స చ ధమ్మస్స సహజాతపచ్చయేన పచ్చయో… పచ్ఛాజాతపచ్చయేన పచ్చయో… ఆహారపచ్చయేన పచ్చయో. (౩)

౪౬౮. అనుపాదిన్నో ధమ్మో అనుపాదిన్నస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… పచ్ఛాజాతపచ్చయేన పచ్చయో… ఆహారపచ్చయేన పచ్చయో. (౧)

అనుపాదిన్నో ధమ్మో ఉపాదిన్నస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… పచ్ఛాజాతపచ్చయేన పచ్చయో… కమ్మపచ్చయేన పచ్చయో… ఆహారపచ్చయేన పచ్చయో. (౨)

అనుపాదిన్నో ధమ్మో ఉపాదిన్నస్స చ అనుపాదిన్నస్స చ ధమ్మస్స పచ్ఛాజాతపచ్చయేన పచ్చయో… ఆహారపచ్చయేన పచ్చయో. (౩)

ఉపాదిన్నో చ అనుపాదిన్నో చ ధమ్మా ఉపాదిన్నస్స ధమ్మస్స పురేజాతం, పచ్ఛాజాతం, ఆహారం, ఇన్ద్రియం. (౧)

ఉపాదిన్నో చ అనుపాదిన్నో చ ధమ్మా అనుపాదిన్నస్స ధమ్మస్స సహజాతం, పురేజాతం, పచ్ఛాజాతం, ఆహారం. (౨)

ఉపాదిన్నో చ అనుపాదిన్నో చ ధమ్మా ఉపాదిన్నస్స చ అనుపాదిన్నస్స చ ధమ్మస్స ఆహారపచ్చయేన పచ్చయో. (౩)