౫. సంసట్ఠవారో

౧-౪. పచ్చయానులోమాది

౪౪౩. ఉపాదిన్నం ధమ్మం సంసట్ఠో ఉపాదిన్నో ధమ్మో ఉప్పజ్జతి హేతుపచ్చయా – ఉపాదిన్నం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే….

అనుపాదిన్నం ధమ్మం సంసట్ఠో అనుపాదిన్నో ధమ్మో ఉప్పజ్జతి హేతుపచ్చయా – అనుపాదిన్నం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే…. (౧)

హేతుయా ద్వే, ఆరమ్మణే ద్వే, అధిపతియా ఏకం, అనన్తరే ద్వే, సమనన్తరే ద్వే, సహజాతే ద్వే, అఞ్ఞమఞ్ఞే ద్వే, నిస్సయే ద్వే, ఉపనిస్సయే ద్వే, పురేజాతే ద్వే, ఆసేవనే ఏకం, కమ్మే ద్వే, విపాకే ద్వే…పే… అవిగతే ద్వే.

అనులోమం.

౪౪౪. ఉపాదిన్నం ధమ్మం సంసట్ఠో ఉపాదిన్నో ధమ్మో ఉప్పజ్జతి నహేతుపచ్చయా – అహేతుకం ఉపాదిన్నం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… అహేతుకపటిసన్ధిక్ఖణే…పే…. (౧)

అనుపాదిన్నం ధమ్మం సంసట్ఠో అనుపాదిన్నో ధమ్మో ఉప్పజ్జతి నహేతుపచ్చయా – అహేతుకం అనుపాదిన్నం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… విచికిచ్ఛాసహగతే ఉద్ధచ్చసహగతే ఖన్ధే సంసట్ఠో విచికిచ్ఛాసహగతో ఉద్ధచ్చసహగతో మోహో. (౧)

నహేతుయా ద్వే, నఅధిపతియా ద్వే, నపురేజాతే ద్వే, నపచ్ఛాజాతే ద్వే, నఆసేవనే ద్వే, నకమ్మే ఏకం, నవిపాకే ఏకం, నఝానే ఏకం, నమగ్గే ద్వే, నవిప్పయుత్తే ద్వే.

పచ్చనీయం.