౧. విభఙ్గవారో

హేతుపచ్చయో

౪౧౬. ఉపాదిన్నం ధమ్మం పటిచ్చ ఉపాదిన్నో ధమ్మో ఉప్పజ్జతి హేతుపచ్చయా – ఉపాదిన్నం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే ఉపాదిన్నం ఏకం ఖన్ధం పటిచ్చ తయో ఖన్ధా కటత్తా చ రూపం…పే… ద్వే ఖన్ధే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం…పే… మహాభూతే పటిచ్చ కటత్తారూపం ఉపాదారూపం. (౧)

ఉపాదిన్నం ధమ్మం పటిచ్చ అనుపాదిన్నో ధమ్మో ఉప్పజ్జతి హేతుపచ్చయా – ఉపాదిన్నే ఖన్ధే పటిచ్చ చిత్తసముట్ఠానం రూపం. (౨)

ఉపాదిన్నం ధమ్మం పటిచ్చ ఉపాదిన్నో చ అనుపాదిన్నో చ ధమ్మా ఉప్పజ్జన్తి హేతుపచ్చయా – ఉపాదిన్నం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

అనుపాదిన్నం ధమ్మం పటిచ్చ అనుపాదిన్నో ధమ్మో ఉప్పజ్జతి హేతుపచ్చయా – అనుపాదిన్నం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… ఏకం మహాభూతం పటిచ్చ…పే… మహాభూతే పటిచ్చ చిత్తసముట్ఠానం రూపం ఉపాదారూపం. (౧)

ఉపాదిన్నఞ్చ అనుపాదిన్నఞ్చ ధమ్మం పటిచ్చ అనుపాదిన్నో ధమ్మో ఉప్పజ్జతి హేతుపచ్చయా – ఉపాదిన్నే ఖన్ధే చ మహాభూతే చ పటిచ్చ చిత్తసముట్ఠానం రూపం. (౧)

ఆరమ్మణపచ్చయో

౪౧౭. ఉపాదిన్నం ధమ్మం పటిచ్చ ఉపాదిన్నో ధమ్మో ఉప్పజ్జతి ఆరమ్మణపచ్చయా – ఉపాదిన్నం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే… వత్థుం పటిచ్చ ఖన్ధా. (౧)

అనుపాదిన్నం ధమ్మం పటిచ్చ అనుపాదిన్నో ధమ్మో ఉప్పజ్జతి ఆరమ్మణపచ్చయా – అనుపాదిన్నం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

అధిపతిపచ్చయో

౪౧౮. అనుపాదిన్నం ధమ్మం పటిచ్చ అనుపాదిన్నో ధమ్మో ఉప్పజ్జతి అధిపతిపచ్చయా – అనుపాదిన్నం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… ఏకం మహాభూతం పటిచ్చ…పే… మహాభూతే పటిచ్చ చిత్తసముట్ఠానం రూపం ఉపాదారూపం (సంఖిత్తం).