౧. విభఙ్గవారో

నహేతుపచ్చయో

౩౨౩. అజ్ఝత్తికం ధమ్మం పటిచ్చ అజ్ఝత్తికో ధమ్మో ఉప్పజ్జతి నహేతుపచ్చయా – అహేతుకపటిసన్ధిక్ఖణే చిత్తం పటిచ్చ అజ్ఝత్తికం కటత్తారూపం. (౧)

అజ్ఝత్తికం ధమ్మం పటిచ్చ బాహిరో ధమ్మో ఉప్పజ్జతి నహేతుపచ్చయా – అహేతుకం చిత్తం పటిచ్చ సమ్పయుత్తకా ఖన్ధా చిత్తసముట్ఠానఞ్చ రూపం; అహేతుకపటిసన్ధిక్ఖణే చిత్తం పటిచ్చ సమ్పయుత్తకా ఖన్ధా బాహిరం కటత్తా చ రూపం, విచికిచ్ఛాసహగతం ఉద్ధచ్చసహగతం చిత్తం పటిచ్చ విచికిచ్ఛాసహగతో ఉద్ధచ్చసహగతో మోహో. (౨)

అజ్ఝత్తికం ధమ్మం పటిచ్చ అజ్ఝత్తికో చ బాహిరో చ ధమ్మా ఉప్పజ్జన్తి నహేతుపచ్చయా – అహేతుకపటిసన్ధిక్ఖణే చిత్తం పటిచ్చ సమ్పయుత్తకా ఖన్ధా అజ్ఝత్తికఞ్చ బాహిరఞ్చ కటత్తారూపం. (౩)

౩౨౪. బాహిరం ధమ్మం పటిచ్చ బాహిరో ధమ్మో ఉప్పజ్జతి నహేతుపచ్చయా – అహేతుకం బాహిరం ఏకం ఖన్ధం పటిచ్చ ద్వే ఖన్ధా చిత్తసముట్ఠానఞ్చ రూపం, ద్వే ఖన్ధే…పే… అహేతుకపటిసన్ధిక్ఖణే …పే… (యావ అసఞ్ఞసత్తా) విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

బాహిరం ధమ్మం పటిచ్చ అజ్ఝత్తికో ధమ్మో ఉప్పజ్జతి నహేతుపచ్చయా – అహేతుకే బాహిరే ఖన్ధే పటిచ్చ చిత్తం; అహేతుకపటిసన్ధిక్ఖణే బాహిరే ఖన్ధే పటిచ్చ చిత్తం అజ్ఝత్తికం కటత్తా చ రూపం, అహేతుకపటిసన్ధిక్ఖణే వత్థుం పటిచ్చ చిత్తం. (౨)

బాహిరం ధమ్మం పటిచ్చ అజ్ఝత్తికో చ బాహిరో చ ధమ్మా ఉప్పజ్జన్తి నహేతుపచ్చయా – అహేతుకం బాహిరం ఏకం ఖన్ధం పటిచ్చ ద్వే ఖన్ధా చిత్తఞ్చ చిత్తసముట్ఠానఞ్చ రూపం, ద్వే ఖన్ధే …పే… అహేతుకపటిసన్ధిక్ఖణే బాహిరం ఏకం ఖన్ధం పటిచ్చ ద్వే ఖన్ధా చిత్తఞ్చ అజ్ఝత్తికఞ్చ బాహిరఞ్చ కటత్తారూపం, అహేతుకపటిసన్ధిక్ఖణే వత్థుం పటిచ్చ చిత్తం సమ్పయుత్తకా చ ఖన్ధా. (౩)

౩౨౫. అజ్ఝత్తికఞ్చ బాహిరఞ్చ ధమ్మం పటిచ్చ అజ్ఝత్తికో ధమ్మో ఉప్పజ్జతి నహేతుపచ్చయా – అహేతుకపటిసన్ధిక్ఖణే చిత్తఞ్చ సమ్పయుత్తకే చ ఖన్ధే పటిచ్చ అజ్ఝత్తికం కటత్తారూపం. (౧)

అజ్ఝత్తికఞ్చ బాహిరఞ్చ ధమ్మం పటిచ్చ బాహిరో ధమ్మో ఉప్పజ్జతి నహేతుపచ్చయా – అహేతుకం బాహిరం ఏకం ఖన్ధఞ్చ చిత్తఞ్చ పటిచ్చ ద్వే ఖన్ధా చిత్తసముట్ఠానఞ్చ రూపం, ద్వే ఖన్ధే…పే… అహేతుకం చిత్తఞ్చ మహాభూతే చ పటిచ్చ చిత్తసముట్ఠానం రూపం; అహేతుకపటిసన్ధిక్ఖణే బాహిరం ఏకం ఖన్ధఞ్చ చిత్తఞ్చ పటిచ్చ ద్వే ఖన్ధా బాహిరం కటత్తా చ రూపం; అహేతుకపటిసన్ధిక్ఖణే చిత్తఞ్చ మహాభూతే చ పటిచ్చ బాహిరం కటత్తారూపం, అహేతుకపటిసన్ధిక్ఖణే చిత్తఞ్చ వత్థుఞ్చ పటిచ్చ బాహిరా ఖన్ధా, విచికిచ్ఛాసహగతే ఉద్ధచ్చసహగతే ఖన్ధే చ చిత్తఞ్చ పటిచ్చ విచికిచ్ఛాసహగతో ఉద్ధచ్చసహగతో మోహో. (౨)

అజ్ఝత్తికఞ్చ బాహిరఞ్చ ధమ్మం పటిచ్చ అజ్ఝత్తికో చ బాహిరో చ ధమ్మా ఉప్పజ్జన్తి నహేతుపచ్చయా – అహేతుకపటిసన్ధిక్ఖణే బాహిరం ఏకం ఖన్ధఞ్చ చిత్తఞ్చ పటిచ్చ ద్వే ఖన్ధా అజ్ఝత్తికఞ్చ బాహిరఞ్చ కటత్తారూపం, ద్వే ఖన్ధే చ…పే…. (౩)

నఆరమ్మణపచ్చయో

౩౨౬. అజ్ఝత్తికం ధమ్మం పటిచ్చ అజ్ఝత్తికో ధమ్మో ఉప్పజ్జతి నఆరమ్మణపచ్చయా – పటిసన్ధిక్ఖణే చిత్తం పటిచ్చ అజ్ఝత్తికం కటత్తారూపం. (౧)

అజ్ఝత్తికం ధమ్మం పటిచ్చ బాహిరో ధమ్మో ఉప్పజ్జతి నఆరమ్మణపచ్చయా – చిత్తం పటిచ్చ చిత్తసముట్ఠానం రూపం; పటిసన్ధిక్ఖణే చిత్తం పటిచ్చ బాహిరం కటత్తారూపం. (౨)

అజ్ఝత్తికం ధమ్మం పటిచ్చ అజ్ఝత్తికో చ బాహిరో చ ధమ్మా ఉప్పజ్జన్తి నఆరమ్మణపచ్చయా; పటిసన్ధిక్ఖణే చిత్తం పటిచ్చ అజ్ఝత్తికఞ్చ బాహిరఞ్చ కటత్తారూపం. (౩)

బాహిరం ధమ్మం పటిచ్చ బాహిరో ధమ్మో ఉప్పజ్జతి నఆరమ్మణపచ్చయా – బాహిరే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే బాహిరే ఖన్ధే పటిచ్చ బాహిరం కటత్తారూపం, బాహిరే ఖన్ధే పటిచ్చ వత్థు, ఏకం మహాభూతం…పే… (యావ అసఞ్ఞసత్తా). (౧)

బాహిరం ధమ్మం పటిచ్చ అజ్ఝత్తికో ధమ్మో ఉప్పజ్జతి నఆరమ్మణపచ్చయా – పటిసన్ధిక్ఖణే బాహిరే ఖన్ధే పటిచ్చ అజ్ఝత్తికం కటత్తారూపం. (౨)

బాహిరం ధమ్మం పటిచ్చ అజ్ఝత్తికో చ బాహిరో చ ధమ్మా ఉప్పజ్జన్తి నఆరమ్మణపచ్చయా – పటిసన్ధిక్ఖణే బాహిరే ఖన్ధే పటిచ్చ అజ్ఝత్తికఞ్చ బాహిరఞ్చ కటత్తారూపం. (౩)

౩౨౭. అజ్ఝత్తికఞ్చ బాహిరఞ్చ ధమ్మం పటిచ్చ అజ్ఝత్తికో ధమ్మో ఉప్పజ్జతి నఆరమ్మణపచ్చయా – పటిసన్ధిక్ఖణే చిత్తఞ్చ సమ్పయుత్తకే చ ఖన్ధే పటిచ్చ అజ్ఝత్తికం కటత్తారూపం. (౧)

అజ్ఝత్తికఞ్చ బాహిరఞ్చ ధమ్మం పటిచ్చ బాహిరో ధమ్మో ఉప్పజ్జతి నఆరమ్మణపచ్చయా – బాహిరే ఖన్ధే చ చిత్తఞ్చ పటిచ్చ చిత్తసముట్ఠానం రూపం, చిత్తఞ్చ మహాభూతే చ పటిచ్చ చిత్తసముట్ఠానం రూపం (పటిసన్ధిక్ఖణే ద్వే కాతబ్బా).

అజ్ఝత్తికఞ్చ బాహిరఞ్చ ధమ్మం పటిచ్చ అజ్ఝత్తికో చ బాహిరో చ ధమ్మా ఉప్పజ్జన్తి నఆరమ్మణపచ్చయా – పటిసన్ధిక్ఖణే చిత్తఞ్చ సమ్పయుత్తకే చ ఖన్ధే పటిచ్చ అజ్ఝత్తికఞ్చ బాహిరఞ్చ కటత్తారూపం (సంఖిత్తం). (౩)

నఝానపచ్చయో

౩౨౮. అజ్ఝత్తికం ధమ్మం పటిచ్చ బాహిరో ధమ్మో ఉప్పజ్జతి నఝానపచ్చయా – చక్ఖువిఞ్ఞాణం పటిచ్చ సమ్పయుత్తకా ఖన్ధా…పే… కాయవిఞ్ఞాణం…పే….

బాహిరం ధమ్మం పటిచ్చ బాహిరో ధమ్మో ఉప్పజ్జతి నఝానపచ్చయా – చక్ఖువిఞ్ఞాణసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే…పే… కాయవిఞ్ఞాణసహగతం…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే…. బాహిరం ధమ్మం పటిచ్చ అజ్ఝత్తికో ధమ్మో ఉప్పజ్జతి నఝానపచ్చయా – చక్ఖువిఞ్ఞాణసహగతే ఖన్ధే పటిచ్చ చక్ఖువిఞ్ఞాణం…పే… కాయవిఞ్ఞాణసహగతే ఖన్ధే పటిచ్చ కాయవిఞ్ఞాణం. బాహిరం ధమ్మం పటిచ్చ అజ్ఝత్తికో చ బాహిరో చ ధమ్మా ఉప్పజ్జన్తి నఝానపచ్చయా – చక్ఖువిఞ్ఞాణసహగతం ఏకం ఖన్ధం పటిచ్చ ద్వే ఖన్ధా చక్ఖువిఞ్ఞాణఞ్చ, ద్వే ఖన్ధే…పే… కాయవిఞ్ఞాణసహగతం ఏకం ఖన్ధం…పే…. (౩)

అజ్ఝత్తికఞ్చ బాహిరఞ్చ ధమ్మం పటిచ్చ బాహిరో ధమ్మో ఉప్పజ్జతి నఝానపచ్చయా – చక్ఖువిఞ్ఞాణసహగతం ఏకం ఖన్ధఞ్చ చక్ఖువిఞ్ఞాణఞ్చ పటిచ్చ ద్వే ఖన్ధా, ద్వే ఖన్ధే…పే… కాయవిఞ్ఞాణం (చక్కం).