౧. విభఙ్గవారో

హేతుపచ్చయో

౨౮౯. చిత్తసంసట్ఠసముట్ఠానం ధమ్మం పచ్చయా చిత్తసంసట్ఠసముట్ఠానో ధమ్మో ఉప్పజ్జతి హేతుపచ్చయా (సంఖిత్తం) తీణి (పటిచ్చవారసదిసా).

నోచిత్తసంసట్ఠసముట్ఠానం ధమ్మం పచ్చయా నోచిత్తసంసట్ఠసముట్ఠానో ధమ్మో ఉప్పజ్జతి హేతుపచ్చయా – చిత్తం పచ్చయా చిత్తసముట్ఠానం రూపం, వత్థుం పచ్చయా చిత్తం; పటిసన్ధిక్ఖణే…పే… (యావ మహాభూతా). (౧)

నోచిత్తసంసట్ఠసముట్ఠానం ధమ్మం పచ్చయా చిత్తసంసట్ఠసముట్ఠానో ధమ్మో ఉప్పజ్జతి హేతుపచ్చయా – చిత్తం పచ్చయా సమ్పయుత్తకా ఖన్ధా, వత్థుం పచ్చయా చిత్తసంసట్ఠసముట్ఠానా ఖన్ధా (పటిసన్ధిక్ఖణే ద్వేపి కాతబ్బా) తీణి. (౩)

౨౯౦. చిత్తసంసట్ఠసముట్ఠానఞ్చ నోచిత్తసంసట్ఠసముట్ఠానఞ్చ ధమ్మం పచ్చయా చిత్తసంసట్ఠసముట్ఠానో ధమ్మో ఉప్పజ్జతి హేతుపచ్చయా – చిత్తసంసట్ఠసముట్ఠానం ఏకం ఖన్ధఞ్చ చిత్తఞ్చ పచ్చయా ద్వే ఖన్ధా, ద్వే ఖన్ధే చ…పే… చిత్తసంసట్ఠసముట్ఠానం ఏకం ఖన్ధఞ్చ వత్థుఞ్చ పచ్చయా ద్వే ఖన్ధా, ద్వే ఖన్ధే చ…పే… (పటిసన్ధిక్ఖణే ద్వేపి కాతబ్బా). (౧)

చిత్తసంసట్ఠసముట్ఠానఞ్చ నోచిత్తసంసట్ఠసముట్ఠానఞ్చ ధమ్మం పచ్చయా నోచిత్తసంసట్ఠసముట్ఠానో ధమ్మో ఉప్పజ్జతి హేతుపచ్చయా – చిత్తసంసట్ఠసముట్ఠానే ఖన్ధే చ చిత్తఞ్చ పచ్చయా నోచిత్తసంసట్ఠసముట్ఠానం రూపం, చిత్తసంసట్ఠసముట్ఠానే ఖన్ధే చ మహాభూతే చ పచ్చయా నోచిత్తసంసట్ఠసముట్ఠానం రూపం, చిత్తసంసట్ఠసముట్ఠానే ఖన్ధే చ వత్థుఞ్చ పచ్చయా చిత్తం (పటిసన్ధిక్ఖణే తీణిపి కాతబ్బా). (౨)

చిత్తసంసట్ఠసముట్ఠానఞ్చ నోచిత్తసంసట్ఠసముట్ఠానఞ్చ ధమ్మం పచ్చయా చిత్తసంసట్ఠసముట్ఠానో చ నోచిత్తసంసట్ఠసముట్ఠానో చ ధమ్మా ఉప్పజ్జన్తి హేతుపచ్చయా – చిత్తసంసట్ఠసముట్ఠానం ఏకం ఖన్ధఞ్చ చిత్తఞ్చ పచ్చయా ద్వే ఖన్ధా చిత్తసంసట్ఠసముట్ఠానఞ్చ రూపం, ద్వే ఖన్ధే…పే… చిత్తసంసట్ఠసముట్ఠానం ఏకం ఖన్ధఞ్చ వత్థుఞ్చ పచ్చయా ద్వే ఖన్ధా చిత్తఞ్చ, ద్వే ఖన్ధే…పే… (పటిసన్ధిక్ఖణే ద్వేపి కాతబ్బా). (౩)

ఆరమ్మణపచ్చయో

౨౯౧. చిత్తసంసట్ఠసముట్ఠానం ధమ్మం పచ్చయా చిత్తసంసట్ఠసముట్ఠానో ధమ్మో ఉప్పజ్జతి ఆరమ్మణపచ్చయా… తీణి (పటిచ్చసదిసా).

నోచిత్తసంసట్ఠసముట్ఠానం ధమ్మం పచ్చయా నోచిత్తసంసట్ఠసముట్ఠానో ధమ్మో ఉప్పజ్జతి ఆరమ్మణపచ్చయా – చక్ఖాయతనం పచ్చయా చక్ఖువిఞ్ఞాణం…పే… కాయాయతనం…పే… వత్థుం పచ్చయా చిత్తం; పటిసన్ధిక్ఖణే…పే…. (౧)

నోచిత్తసంసట్ఠసముట్ఠానం ధమ్మం పచ్చయా చిత్తసంసట్ఠసముట్ఠానో ధమ్మో ఉప్పజ్జతి ఆరమ్మణపచ్చయా – చక్ఖాయతనం పచ్చయా చక్ఖువిఞ్ఞాణసహగతా ఖన్ధా…పే… కాయాయతనం…పే… చిత్తం పచ్చయా సమ్పయుత్తకా ఖన్ధా, వత్థుం పచ్చయా చిత్తసంసట్ఠసముట్ఠానా ఖన్ధా (పటిసన్ధిక్ఖణే ద్వేపి కాతబ్బా). (౨)

నోచిత్తసంసట్ఠసముట్ఠానం ధమ్మం పచ్చయా చిత్తసంసట్ఠసముట్ఠానో చ నోచిత్తసంసట్ఠసముట్ఠానో చ ధమ్మా ఉప్పజ్జన్తి ఆరమ్మణపచ్చయా – చక్ఖాయతనం పచ్చయా చక్ఖువిఞ్ఞాణం సమ్పయుత్తకా చ ఖన్ధా…పే… కాయాయతనం…పే… వత్థుం పచ్చయా చిత్తం సమ్పయుత్తకా చ ఖన్ధా (పటిసన్ధిక్ఖణే ఏకం కాతబ్బం). (౩)

౨౯౨. చిత్తసంసట్ఠసముట్ఠానఞ్చ నోచిత్తసంసట్ఠసముట్ఠానఞ్చ ధమ్మం పచ్చయా చిత్తసంసట్ఠసముట్ఠానో ధమ్మో ఉప్పజ్జతి ఆరమ్మణపచ్చయా – చక్ఖువిఞ్ఞాణసహగతం ఏకం ఖన్ధఞ్చ చక్ఖాయతనఞ్చ చక్ఖువిఞ్ఞాణఞ్చ పచ్చయా ద్వే ఖన్ధా, ద్వే ఖన్ధే…పే… కాయవిఞ్ఞాణసహగతం…పే… చిత్తసంసట్ఠసముట్ఠానం ఏకం ఖన్ధఞ్చ చిత్తఞ్చ పచ్చయా ద్వే ఖన్ధా, ద్వే ఖన్ధే…పే… చిత్తసంసట్ఠసముట్ఠానం ఏకం ఖన్ధఞ్చ వత్థుఞ్చ పచ్చయా ద్వే ఖన్ధా, ద్వే ఖన్ధే…పే… (పటిసన్ధిక్ఖణే ద్వే కాతబ్బా). (౧)

చిత్తసంసట్ఠసముట్ఠానఞ్చ నోచిత్తసంసట్ఠసముట్ఠానఞ్చ ధమ్మం పచ్చయా నోచిత్తసంసట్ఠసముట్ఠానో ధమ్మో ఉప్పజ్జతి ఆరమ్మణపచ్చయా – చక్ఖువిఞ్ఞాణసహగతే ఖన్ధే చ చక్ఖాయతనఞ్చ పచ్చయా చక్ఖువిఞ్ఞాణం …పే… కాయవిఞ్ఞాణసహగతే…పే… చిత్తసంసట్ఠసముట్ఠానే ఖన్ధే చ వత్థుఞ్చ పచ్చయా చిత్తం (పటిసన్ధిక్ఖణే ఏకం కాతబ్బం). (౨)

చిత్తసంసట్ఠసముట్ఠానఞ్చ నోచిత్తసంసట్ఠసముట్ఠానఞ్చ ధమ్మం పచ్చయా చిత్తసంసట్ఠసముట్ఠానో చ నోచిత్తసంసట్ఠసముట్ఠానో చ ధమ్మా ఉప్పజ్జన్తి ఆరమ్మణపచ్చయా – చిత్తసంసట్ఠసముట్ఠానం ఏకం ఖన్ధఞ్చ వత్థుఞ్చ పచ్చయా ద్వే ఖన్ధా చిత్తఞ్చ, ద్వే ఖన్ధే…పే… (పటిసన్ధిక్ఖణే ఏకం కాతబ్బం, సంఖిత్తం). (౩)