౧. విభఙ్గవారో

హేతుపచ్చయో

౨౫౭. చిత్తసహభూ ధమ్మో చిత్తసహభుస్స ధమ్మస్స హేతుపచ్చయేన పచ్చయో – చిత్తసహభూ హేతూ సమ్పయుత్తకానం ఖన్ధానం చిత్తసహభూనం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే…పే…. (౧)

చిత్తసహభూ ధమ్మో నోచిత్తసహభుస్స ధమ్మస్స హేతుపచ్చయేన పచ్చయో – చిత్తసహభూ హేతూ చిత్తస్స నోచిత్తసహభూనం చిత్తసముట్ఠానానఞ్చ రూపానం హేతుపచ్చయేన పచ్చయో; పటిసన్ధిక్ఖణే చిత్తసహభూ హేతూ చిత్తస్స కటత్తా చ రూపానం హేతుపచ్చయేన పచ్చయో. (౨)

చిత్తసహభూ ధమ్మో చిత్తసహభుస్స చ నోచిత్తసహభుస్స చ ధమ్మస్స హేతుపచ్చయేన పచ్చయో; చిత్తసహభూ హేతూ సమ్పయుత్తకానం ఖన్ధానం చిత్తస్స చ చిత్తసహభూనఞ్చ నోచిత్తసహభూనఞ్చ చిత్తసముట్ఠానానం రూపానం హేతుపచ్చయేన పచ్చయో. (౩)

ఆరమ్మణపచ్చయో

౨౫౮. చిత్తసహభూ ధమ్మో చిత్తసహభుస్స ధమ్మస్స ఆరమ్మణపచ్చయేన పచ్చయో… నవ (చిత్తసముట్ఠానదుకసదిసం, నిన్నానాకరణం).

అధిపతిపచ్చయో

౨౫౯. చిత్తసహభూ ధమ్మో చిత్తసహభుస్స ధమ్మస్స అధిపతిపచ్చయేన పచ్చయో… తీణి (ఆరమ్మణాధిపతిపి సహజాతాధిపతిపి కాతబ్బా).

నోచిత్తసహభూ ధమ్మో నోచిత్తసహభుస్స ధమ్మస్స అధిపతిపచ్చయేన పచ్చయో… తీణి (ఆరమ్మణాధిపతిపి సహజాతాధిపతిపి ఇమేసమ్పి తిణ్ణం కాతబ్బా. నవపి పఞ్హా చిత్తసముట్ఠానదుకసదిసా. అన్తే తీణి ఆరమ్మణాధిపతియేవ).

అనన్తరపచ్చయాది

౨౬౦. చిత్తసహభూ ధమ్మో చిత్తసహభుస్స ధమ్మస్స అనన్తరపచ్చయేన పచ్చయో… నవ (చిత్తసముట్ఠానదుకసదిసం, నిన్నానాకరణం)… సమనన్తరపచ్చయేన పచ్చయో… నవ (పటిచ్చసదిసా) … సహజాతపచ్చయేన పచ్చయో… నవ (పటిచ్చసదిసా)… అఞ్ఞమఞ్ఞపచ్చయేన పచ్చయో… నవ (పటిచ్చసదిసా)… నిస్సయపచ్చయేన పచ్చయో… నవ (పచ్చయవారసదిసా)… ఉపనిస్సయపచ్చయేన పచ్చయో… నవ (చిత్తసముట్ఠానదుకసదిసా).

పురేజాతపచ్చయో

౨౬౧. నోచిత్తసహభూ ధమ్మో నోచిత్తసహభుస్స ధమ్మస్స పురేజాతపచ్చయేన పచ్చయో – ఆరమ్మణపురేజాతం, వత్థుపురేజాతం… తీణి (నోచిత్తసహభూ మూలంయేవ లబ్భతి, చిత్తసముట్ఠానదుకసదిసా. తీణిపి నిన్నానాకరణం).

పచ్ఛాజాతాసేవనపచ్చయా

౨౬౨. చిత్తసహభూ ధమ్మో నోచిత్తసహభుస్స ధమ్మస్స పచ్ఛాజాతపచ్చయేన పచ్చయో – పచ్ఛాజాతా చిత్తసహభూ ఖన్ధా పురేజాతస్స ఇమస్స నోచిత్తసహభుస్స కాయస్స పచ్ఛాజాతపచ్చయేన పచ్చయో. (౧)

నోచిత్తసహభూ ధమ్మో నోచిత్తసహభుస్స ధమ్మస్స పచ్ఛాజాతపచ్చయేన పచ్చయో…పే…. (౧)

చిత్తసహభూ చ నోచిత్తసహభూ చ ధమ్మా నోచిత్తసహభుస్స ధమ్మస్స పచ్ఛాజాతపచ్చయేన పచ్చయో (సంఖిత్తం)… ఆసేవనపచ్చయేన పచ్చయో… నవ.

కమ్మపచ్చయో

౨౬౩. చిత్తసహభూ ధమ్మో చిత్తసహభుస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – చిత్తసహభూ చేతనా సమ్పయుత్తకానం ఖన్ధానం చిత్తసహభూనం చిత్తసముట్ఠానానఞ్చ రూపానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – చిత్తసహభూ చేతనా విపాకానం చిత్తసహభూనం ఖన్ధానం కమ్మపచ్చయేన పచ్చయో. (౧)

చిత్తసహభూ ధమ్మో నోచిత్తసహభుస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – చిత్తసహభూ చేతనా చిత్తస్స నోచిత్తసహభూనం చిత్తసముట్ఠానానఞ్చ రూపానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – చిత్తసహభూ చేతనా విపాకస్స చిత్తస్స కటత్తా చ రూపానం కమ్మపచ్చయేన పచ్చయో. (౨)

చిత్తసహభూ ధమ్మో చిత్తసహభుస్స చ నోచిత్తసహభుస్స చ ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – చిత్తసహభూ చేతనా సమ్పయుత్తకానం ఖన్ధానం చిత్తస్స చ చిత్తసహభూనఞ్చ నోచిత్తసహభూనఞ్చ చిత్తసముట్ఠానానఞ్చ రూపానం కమ్మపచ్చయేన పచ్చయో; పటిసన్ధిక్ఖణే…పే…. నానాక్ఖణికా – చిత్తసహభూ చేతనా విపాకానం ఖన్ధానం చిత్తస్స కటత్తా చ రూపానం కమ్మపచ్చయేన పచ్చయో. (౩)

విపాకపచ్చయాది

౨౬౪. చిత్తసహభూ ధమ్మో చిత్తసహభుస్స ధమ్మస్స విపాకపచ్చయేన పచ్చయో (చిత్తసముట్ఠానదుకసదిసం)… ఆహారపచ్చయేన పచ్చయో… నవ (చిత్తసముట్ఠానదుకసదిసా. ఇమమ్పి ఏకం కబళీకారఆహారసదిసం). చిత్తసహభూ ధమ్మో చిత్తసహభుస్స ధమ్మస్స ఇన్ద్రియపచ్చయేన పచ్చయో… నవ (చిత్తసముట్ఠానదుకసదిసం, నిన్నానాకరణం)… ఝానపచ్చయేన పచ్చయో… తీణి… మగ్గపచ్చయేన పచ్చయో… తీణి… సమ్పయుత్తపచ్చయేన పచ్చయో… పఞ్చ.

విప్పయుత్తపచ్చయో

౨౬౫. చిత్తసహభూ ధమ్మో చిత్తసహభుస్స ధమ్మస్స విప్పయుత్తపచ్చయేన పచ్చయో. సహజాతా – చిత్తసహభూ ఖన్ధా చిత్తసహభూనం చిత్తసముట్ఠానానం రూపానం విప్పయుత్తపచ్చయేన పచ్చయో. (౧)

చిత్తసహభూ ధమ్మో నోచిత్తసహభుస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం. సహజాతా – చిత్తసహభూ ఖన్ధా నోచిత్తసహభూనం చిత్తసముట్ఠానానం రూపానం విప్పయుత్తపచ్చయేన పచ్చయో; పటిసన్ధిక్ఖణే…పే…. పచ్ఛాజాతా – చిత్తసహభూ ఖన్ధా పురేజాతస్స ఇమస్స నోచిత్తసహభుస్స కాయస్స విప్పయుత్తపచ్చయేన పచ్చయో. (౨)

చిత్తసహభూ ధమ్మో చిత్తసహభుస్స చ నోచిత్తసహభుస్స చ ధమ్మస్స విప్పయుత్తపచ్చయేన పచ్చయో. సహజాతా – చిత్తసహభూ ఖన్ధా చిత్తసహభూనఞ్చ నోచిత్తసహభూనఞ్చ చిత్తసముట్ఠానానం రూపానం విప్పయుత్తపచ్చయేన పచ్చయో. (౩)

౨౬౬. నోచిత్తసహభూ ధమ్మో నోచిత్తసహభుస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం, పచ్ఛాజాతం. సహజాతం – చిత్తం నోచిత్తసహభూనం చిత్తసముట్ఠానానం రూపానం విప్పయుత్తపచ్చయేన పచ్చయో; పటిసన్ధిక్ఖణే చిత్తం కటత్తారూపానం విప్పయుత్తపచ్చయేన పచ్చయో; చిత్తం వత్థుస్స విప్పయుత్తపచ్చయేన పచ్చయో; వత్థు చిత్తస్స విప్పయుత్తపచ్చయేన పచ్చయో. పురేజాతం – చక్ఖాయతనం చక్ఖువిఞ్ఞాణస్స విప్పయుత్తపచ్చయేన పచ్చయో…పే… కాయాయతనం…పే… వత్థు చిత్తస్స విప్పయుత్తపచ్చయేన పచ్చయో. పచ్ఛాజాతం – చిత్తం పురేజాతస్స ఇమస్స నోచిత్తసహభుస్స కాయస్స విప్పయుత్తపచ్చయేన పచ్చయో. (౧)

నోచిత్తసహభూ ధమ్మో చిత్తసహభుస్స ధమ్మస్స విప్పయుత్తపచ్చయేన పచ్చయో – సహజాతం, పురేజాతం. సహజాతం – చిత్తం చిత్తసహభూనం చిత్తసముట్ఠానానం రూపానం విప్పయుత్తపచ్చయేన పచ్చయో. పురేజాతం – చక్ఖాయతనం చక్ఖువిఞ్ఞాణసహగతానం ఖన్ధానం విప్పయుత్తపచ్చయేన పచ్చయో…పే… కాయాయతనం…పే… వత్థు చిత్తసహభూనం ఖన్ధానం విప్పయుత్తపచ్చయేన పచ్చయో. (౨)

నోచిత్తసహభూ ధమ్మో చిత్తసహభుస్స చ నోచిత్తసహభుస్స చ ధమ్మస్స విప్పయుత్తపచ్చయేన పచ్చయో – సహజాతం, పురేజాతం. సహజాతం – చిత్తం చిత్తసహభూనఞ్చ నోచిత్తసహభూనఞ్చ చిత్తసముట్ఠానానం రూపానం విప్పయుత్తపచ్చయేన పచ్చయో; పటిసన్ధిక్ఖణే…పే…. వత్థుపురేజాతం – చక్ఖాయతనం చక్ఖువిఞ్ఞాణస్స సమ్పయుత్తకానఞ్చ రూపానం విప్పయుత్తపచ్చయేన పచ్చయో…పే… కాయాయతనం…పే… వత్థు చిత్తస్స సమ్పయుత్తకానఞ్చ ఖన్ధానం విప్పయుత్తపచ్చయేన పచ్చయో. (౩)

౨౬౭. చిత్తసహభూ చ నోచిత్తసహభూ చ ధమ్మా చిత్తసహభుస్స ధమ్మస్స విప్పయుత్తపచ్చయేన పచ్చయో. సహజాతా – చిత్తసహభూ ఖన్ధా చ చిత్తఞ్చ చిత్తసహభూనం చిత్తసముట్ఠానానం రూపానం విప్పయుత్తపచ్చయేన పచ్చయో. (౧)

చిత్తసహభూ చ నోచిత్తసహభూ చ ధమ్మా నోచిత్తసహభుస్స ధమ్మస్స విప్పయుత్తపచ్చయేన పచ్చయో – సహజాతం, పచ్ఛాజాతం. సహజాతా – చిత్తసహభూ ఖన్ధా చ చిత్తఞ్చ నోచిత్తసహభూనం చిత్తసముట్ఠానానం రూపానం విప్పయుత్తపచ్చయేన పచ్చయో; పటిసన్ధిక్ఖణే …పే…. పచ్ఛాజాతా – చిత్తసహభూ ఖన్ధా చ చిత్తఞ్చ పురేజాతస్స ఇమస్స నోచిత్తసహభుస్స కాయస్స విప్పయుత్తపచ్చయేన పచ్చయో. (౨)

చిత్తసహభూ చ నోచిత్తసహభూ చ ధమ్మా చిత్తసహభుస్స చ నోచిత్తసహభుస్స చ ధమ్మస్స విప్పయుత్తపచ్చయేన పచ్చయో – చిత్తసహభూ ఖన్ధా చ చిత్తఞ్చ చిత్తసహభూనఞ్చ నోచిత్తసహభూనఞ్చ చిత్తసముట్ఠానానం రూపానం విప్పయుత్తపచ్చయేన పచ్చయో. (౩)

అత్థిపచ్చయో

౨౬౮. చిత్తసహభూ ధమ్మో చిత్తసహభుస్స ధమ్మస్స అత్థిపచ్చయేన పచ్చయో – చిత్తసహభూ ఏకో ఖన్ధో…పే… (పటిచ్చసదిసం). (౧)

చిత్తసహభూ ధమ్మో నోచిత్తసహభుస్స ధమ్మస్స అత్థిపచ్చయేన పచ్చయో – సహజాతం, పచ్ఛాజాతం (సంఖిత్తం). (౨)

చిత్తసహభూ ధమ్మో చిత్తసహభుస్స చ నోచిత్తసహభుస్స చ ధమ్మస్స అత్థిపచ్చయేన పచ్చయో – చిత్తసహభూ ఏకో ఖన్ధో…పే… (పటిచ్చసదిసం). (౩)

నోచిత్తసహభూ ధమ్మో నోచిత్తసహభుస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం (సంఖిత్తం). (౧)

నోచిత్తసహభూ ధమ్మో చిత్తసహభుస్స ధమ్మస్స అత్థిపచ్చయేన పచ్చయో – సహజాతం, పురేజాతం (సంఖిత్తం. (౨)

నోచిత్తసహభూ ధమ్మో చిత్తసహభుస్స చ నోచిత్తసహభుస్స చ ధమ్మస్స అత్థిపచ్చయేన పచ్చయో – సహజాతం, పురేజాతం (సంఖిత్తం). (౩)

౨౬౯. చిత్తసహభూ చ నోచిత్తసహభూ చ ధమ్మా చిత్తసహభుస్స ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – చక్ఖువిఞ్ఞాణసహగతో ఏకో ఖన్ధో చ చక్ఖాయతనఞ్చ చక్ఖువిఞ్ఞాణఞ్చ ద్విన్నం ఖన్ధానం…పే… ద్వే ఖన్ధా చ…పే… (సబ్బం పటిసన్ధియం కాతబ్బం, సహజాతం పురేజాతమ్పి). (౧)

చిత్తసహభూ చ నోచిత్తసహభూ చ ధమ్మా నోచిత్తసహభుస్స ధమ్మస్స అత్థిపచ్చయేన పచ్చయో – సహజాతం, పురేజాతం, పచ్ఛాజాతం, ఆహారం, ఇన్ద్రియం. సహజాతా – చక్ఖువిఞ్ఞాణసహగతా ఖన్ధా చక్ఖాయతనఞ్చ చక్ఖువిఞ్ఞాణస్స అత్థిపచ్చయేన పచ్చయో…పే… కాయవిఞ్ఞాణసహగతా…పే… చిత్తసహభూ ఖన్ధా చ చిత్తఞ్చ నోచిత్తసహభూనం చిత్తసముట్ఠానానం రూపానం అత్థిపచ్చయేన పచ్చయో. సహజాతా – చిత్తసహభూ ఖన్ధా చ వత్థు చ చిత్తస్స అత్థిపచ్చయేన పచ్చయో. సహజాతా – చిత్తసహభూ ఖన్ధా చ మహాభూతా చ నోచిత్తసహభూనం చిత్తసముట్ఠానానం రూపానం అత్థిపచ్చయేన పచ్చయో (పటిసన్ధిక్ఖణే తీణిపి కాతబ్బా). పచ్ఛాజాతా – చిత్తసహభూ ఖన్ధా చ చిత్తఞ్చ పురేజాతస్స ఇమస్స నోచిత్తసహభుస్స కాయస్స అత్థిపచ్చయేన పచ్చయో. పచ్ఛాజాతా – చిత్తసహభూ ఖన్ధా చ కబళీకారో ఆహారో చ ఇమస్స నోచిత్తసహభుస్స కాయస్స అత్థిపచ్చయేన పచ్చయో. పచ్ఛాజాతా – చిత్తసహభూ ఖన్ధా చ రూపజీవితిన్ద్రియఞ్చ కటత్తారూపానం అత్థిపచ్చయేన పచ్చయో. (౨)

చిత్తసహభూ చ నోచిత్తసహభూ చ ధమ్మా చిత్తసహభుస్స చ నోచిత్తసహభుస్స చ ధమ్మస్స అత్థిపచ్చయేన పచ్చయో – సహజాతం, పురేజాతం. సహజాతో – చక్ఖువిఞ్ఞాణసహగతో ఏకో ఖన్ధో చ చక్ఖాయతనం చ…పే… (పచ్చయవారసదిసం). (౩)