౧. విభఙ్గవారో

హేతుపచ్చయో

౧౪౪. చిత్తసమ్పయుత్తం ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి హేతుపచ్చయా – చిత్తసమ్పయుత్తం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో; పటిసన్ధిక్ఖణే…పే…. (౧)

చిత్తసమ్పయుత్తం ధమ్మం పటిచ్చ చిత్తవిప్పయుత్తో ధమ్మో ఉప్పజ్జతి హేతుపచ్చయా – చిత్తసమ్పయుత్తే ఖన్ధే పటిచ్చ చిత్తసముట్ఠానం రూపం; పటిసన్ధిక్ఖణే…పే…. (౨)

చిత్తసమ్పయుత్తం ధమ్మం పటిచ్చ చిత్తసమ్పయుత్తో చ చిత్తవిప్పయుత్తో చ ధమ్మా ఉప్పజ్జన్తి హేతుపచ్చయా – చిత్తసమ్పయుత్తం ఏకం ఖన్ధం పటిచ్చ ద్వే ఖన్ధా చిత్తసముట్ఠానఞ్చ రూపం, ద్వే ఖన్ధే…పే… పటిసన్ధిక్ఖణే…పే…. (౩)

౧౪౫. చిత్తవిప్పయుత్తం ధమ్మం పటిచ్చ చిత్తవిప్పయుత్తో ధమ్మో ఉప్పజ్జతి హేతుపచ్చయా – ఏకం మహాభూతం…పే… మహాభూతే పటిచ్చ చిత్తసముట్ఠానం రూపం…పే… పటిసన్ధిక్ఖణే…పే… ఏకం మహాభూతం…పే… మహాభూతే పటిచ్చ కటత్తారూపం ఉపాదారూపం. (౧)

చిత్తవిప్పయుత్తం ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి హేతుపచ్చయా – పటిసన్ధిక్ఖణే వత్థుం పటిచ్చ చిత్తసమ్పయుత్తకా ఖన్ధా. (౨)

చిత్తవిప్పయుత్తం ధమ్మం పటిచ్చ చిత్తసమ్పయుత్తో చ చిత్తవిప్పయుత్తో చ ధమ్మా ఉప్పజ్జన్తి హేతుపచ్చయా – పటిసన్ధిక్ఖణే వత్థుం పటిచ్చ చిత్తసమ్పయుత్తకా ఖన్ధా, మహాభూతే పటిచ్చ కటత్తారూపం. (౩)

౧౪౬. చిత్తసమ్పయుత్తఞ్చ చిత్తవిప్పయుత్తఞ్చ ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి హేతుపచ్చయా – పటిసన్ధిక్ఖణే చిత్తసమ్పయుత్తం ఏకం ఖన్ధఞ్చ వత్థుఞ్చ పటిచ్చ ద్వే ఖన్ధా, ద్వే ఖన్ధే చ…పే…. (౧)

చిత్తసమ్పయుత్తఞ్చ చిత్తవిప్పయుత్తఞ్చ ధమ్మం పటిచ్చ చిత్తవిప్పయుత్తో ధమ్మో ఉప్పజ్జతి హేతుపచ్చయా – చిత్తసమ్పయుత్తే ఖన్ధే చ మహాభూతే చ పటిచ్చ చిత్తసముట్ఠానం రూపం; పటిసన్ధిక్ఖణే చిత్తసమ్పయుత్తే ఖన్ధే చ మహాభూతే చ పటిచ్చ కటత్తారూపం. (౨)

చిత్తసమ్పయుత్తఞ్చ చిత్తవిప్పయుత్తఞ్చ ధమ్మం పటిచ్చ చిత్తసమ్పయుత్తో చ చిత్తవిప్పయుత్తో చ ధమ్మా ఉప్పజ్జన్తి హేతుపచ్చయా – పటిసన్ధిక్ఖణే చిత్తసమ్పయుత్తం ఏకం ఖన్ధఞ్చ వత్థుఞ్చ పటిచ్చ ద్వే ఖన్ధా, ద్వే ఖన్ధే చ…పే… చిత్తసమ్పయుత్తే ఖన్ధే చ మహాభూతే చ పటిచ్చ కటత్తారూపం. (౩)

ఆరమ్మణపచ్చయో

౧౪౭. చిత్తసమ్పయుత్తం ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి ఆరమ్మణపచ్చయా – చిత్తసమ్పయుత్తం ఏకం ఖన్ధం పటిచ్చ ద్వే ఖన్ధా, ద్వే ఖన్ధే…పే… పటిసన్ధిక్ఖణే…పే…. (౧)

చిత్తవిప్పయుత్తం ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి ఆరమ్మణపచ్చయా – పటిసన్ధిక్ఖణే వత్థుం పటిచ్చ చిత్తసమ్పయుత్తకా ఖన్ధా. (౧)

చిత్తసమ్పయుత్తఞ్చ చిత్తవిప్పయుత్తఞ్చ ధమ్మం పటిచ్చ చిత్తసమ్పయుత్తో ధమ్మో ఉప్పజ్జతి ఆరమ్మణపచ్చయా – పటిసన్ధిక్ఖణే చిత్తసమ్పయుత్తం ఏకం ఖన్ధఞ్చ వత్థుఞ్చ పటిచ్చ ద్వే ఖన్ధా, ద్వే ఖన్ధే చ…పే… (సంఖిత్తం). (౧)