౧. విభఙ్గవారో

హేతుపచ్చయో

౮౬. సహేతుకం ధమ్మం సంసట్ఠో సహేతుకో ధమ్మో ఉప్పజ్జతి హేతుపచ్చయా – సహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧)

అహేతుకం ధమ్మం సంసట్ఠో సహేతుకో ధమ్మో ఉప్పజ్జతి హేతుపచ్చయా – విచికిచ్ఛాసహగతం ఉద్ధచ్చసహగతం మోహం సంసట్ఠా విచికిచ్ఛాసహగతా ఉద్ధచ్చసహగతా ఖన్ధా. (౧)

సహేతుకఞ్చ అహేతుకఞ్చ ధమ్మం సంసట్ఠో సహేతుకో ధమ్మో ఉప్పజ్జతి హేతుపచ్చయా – విచికిచ్ఛాసహగతం ఉద్ధచ్చసహగతం ఏకం ఖన్ధఞ్చ మోహఞ్చ సంసట్ఠా తయో ఖన్ధా…పే… ద్వే ఖన్ధే…పే…. (౧)

ఆరమ్మణపచ్చయో

౮౭. సహేతుకం ధమ్మం సంసట్ఠో సహేతుకో ధమ్మో ఉప్పజ్జతి ఆరమ్మణపచ్చయా – సహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧)

సహేతుకం ధమ్మం సంసట్ఠో అహేతుకో ధమ్మో ఉప్పజ్జతి ఆరమ్మణపచ్చయా – విచికిచ్ఛాసహగతే ఉద్ధచ్చసహగతే ఖన్ధే సంసట్ఠో విచికిచ్ఛాసహగతో ఉద్ధచ్చసహగతో మోహో. (౨)

సహేతుకం ధమ్మం సంసట్ఠో సహేతుకో చ అహేతుకో చ ధమ్మా ఉప్పజ్జన్తి ఆరమ్మణపచ్చయా – విచికిచ్ఛాసహగతం ఉద్ధచ్చసహగతం ఏకం ఖన్ధం సంసట్ఠా తయో ఖన్ధా మోహో చ…పే… ద్వే ఖన్ధే…పే…. (౩)

౮౮. అహేతుకం ధమ్మం సంసట్ఠో అహేతుకో ధమ్మో ఉప్పజ్జతి ఆరమ్మణపచ్చయా – అహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧)

అహేతుకం ధమ్మం సంసట్ఠో సహేతుకో ధమ్మో ఉప్పజ్జతి ఆరమ్మణపచ్చయా – విచికిచ్ఛాసహగతం ఉద్ధచ్చసహగతం మోహం సంసట్ఠా విచికిచ్ఛాసహగతా ఉద్ధచ్చసహగతా ఖన్ధా. (౨)

సహేతుకఞ్చ అహేతుకఞ్చ ధమ్మం సంసట్ఠో సహేతుకో ధమ్మో ఉప్పజ్జతి ఆరమ్మణపచ్చయా – విచికిచ్ఛాసహగతం ఉద్ధచ్చసహగతం ఏకం ఖన్ధఞ్చ మోహఞ్చ సంసట్ఠా తయో ఖన్ధా…పే… ద్వే ఖన్ధే…పే…. (౧)

అధిపతిపచ్చయో

౮౯. సహేతుకం ధమ్మం సంసట్ఠో సహేతుకో ధమ్మో ఉప్పజ్జతి అధిపతిపచ్చయా – సహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే…. (౧)

అనన్తరపచ్చయాది

౯౦. సహేతుకం ధమ్మం సంసట్ఠో సహేతుకో ధమ్మో ఉప్పజ్జతి అనన్తరపచ్చయా… సమనన్తరపచ్చయా… సహజాతపచ్చయా…పే… విపాకపచ్చయా – విపాకం సహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే….

అహేతుకం ధమ్మం సంసట్ఠో అహేతుకో ధమ్మో ఉప్పజ్జతి విపాకపచ్చయా – విపాకం అహేతుకం ఏకం ఖన్ధం సంసట్ఠా తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే… ఝానపచ్చయా…పే… అవిగతపచ్చయా.