౧. విభఙ్గవారో

నహేతుపచ్చయో

౬. పీతిసహగతం ధమ్మం పటిచ్చ పీతిసహగతో ధమ్మో ఉప్పజ్జతి నహేతుపచ్చయా – అహేతుకం పీతిసహగతం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౧)

పీతిసహగతం ధమ్మం పటిచ్చ సుఖసహగతో ధమ్మో ఉప్పజ్జతి నహేతుపచ్చయా – అహేతుకం పీతిసహగతం ఏకం ఖన్ధం పటిచ్చ సుఖసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౨)

పీతిసహగతం ధమ్మం పటిచ్చ పీతిసహగతో చ సుఖసహగతో చ ధమ్మా ఉప్పజ్జన్తి నహేతుపచ్చయా – అహేతుకం పీతిసహగతం ఏకం ఖన్ధం పటిచ్చ పీతిసహగతా చ సుఖసహగతా చ తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౩)

౭. సుఖసహగతం ధమ్మం పటిచ్చ సుఖసహగతో ధమ్మో ఉప్పజ్జతి నహేతుపచ్చయా – అహేతుకం సుఖసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౧)

సుఖసహగతం ధమ్మం పటిచ్చ పీతిసహగతో ధమ్మో ఉప్పజ్జతి నహేతుపచ్చయా – అహేతుకం సుఖసహగతం ఏకం ఖన్ధం పటిచ్చ పీతిసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౨)

సుఖసహగతం ధమ్మం పటిచ్చ పీతిసహగతో చ సుఖసహగతో చ ధమ్మా ఉప్పజ్జన్తి నహేతుపచ్చయా – అహేతుకం సుఖసహగతం ఏకం ఖన్ధం పటిచ్చ పీతిసహగతా చ సుఖసహగతా చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౩)

౮. ఉపేక్ఖాసహగతం ధమ్మం పటిచ్చ ఉపేక్ఖాసహగతో ధమ్మో ఉప్పజ్జతి నహేతుపచ్చయా – అహేతుకం ఉపేక్ఖాసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. అహేతుకపటిసన్ధిక్ఖణే ఉపేక్ఖాసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

౯. పీతిసహగతఞ్చ సుఖసహగతఞ్చ ధమ్మం పటిచ్చ పీతిసహగతో ధమ్మో ఉప్పజ్జతి నహేతుపచ్చయా – అహేతుకం పీతిసహగతఞ్చ సుఖసహగతఞ్చ ఏకం ఖన్ధం పటిచ్చ పీతిసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౧)

పీతిసహగతఞ్చ సుఖసహగతఞ్చ ధమ్మం పటిచ్చ సుఖసహగతో ధమ్మో ఉప్పజ్జతి నహేతుపచ్చయా – అహేతుకం పీతిసహగతఞ్చ సుఖసహగతఞ్చ ఏకం ఖన్ధం పటిచ్చ సుఖసహగతా ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౨)

పీతిసహగతఞ్చ సుఖసహగతఞ్చ ధమ్మం పటిచ్చ పీతిసహగతో చ సుఖసహగతో చ ధమ్మా ఉప్పజ్జన్తి నహేతుపచ్చయా – అహేతుకం పీతిసహగతఞ్చ సుఖసహగతఞ్చ ఏకం ఖన్ధం పటిచ్చ పీతిసహగతా చ సుఖసహగతా చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౩)

నఅధిపతి-నఆసేవనపచ్చయా

౧౦. పీతిసహగతం ధమ్మం పటిచ్చ పీతిసహగతో ధమ్మో ఉప్పజ్జతి నఅధిపతిపచ్చయా (నఅధిపతిపటిసన్ధిక్ఖణే పరిపుణ్ణం)… నపురేజాతపచ్చయా… (‘‘అరూపే’’తి నియామేతబ్బం ‘‘పటిసన్ధిక్ఖణే’’తి చ) నపచ్ఛాజాతపచ్చయా… నఆసేవనపచ్చయా.

నకమ్మపచ్చయో

౧౧. పీతిసహగతం ధమ్మం పటిచ్చ పీతిసహగతో ధమ్మో ఉప్పజ్జతి నకమ్మపచ్చయా – పీతిసహగతే ఖన్ధే పటిచ్చ పీతిసహగతా చేతనా.

పీతిసహగతం ధమ్మం పటిచ్చ సుఖసహగతో ధమ్మో ఉప్పజ్జతి నకమ్మపచ్చయా – పీతిసహగతే ఖన్ధే పటిచ్చ సుఖసహగతా చేతనా.

(ఇమినా కారణేన దస పఞ్హా విత్థారేతబ్బా.)

నవిపాకపచ్చయో

౧౨. పీతిసహగతం ధమ్మం పటిచ్చ పీతిసహగతో ధమ్మో ఉప్పజ్జతి నవిపాకపచ్చయా…పే… (పరిపుణ్ణం, పటిసన్ధి నత్థి).

నఝానపచ్చయాది

౧౩. సుఖసహగతం ధమ్మం పటిచ్చ సుఖసహగతో ధమ్మో ఉప్పజ్జతి నఝానపచ్చయా – సుఖసహగతం కాయవిఞ్ఞాణసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౧)

ఉపేక్ఖాసహగతం ధమ్మం పటిచ్చ ఉపేక్ఖాసహగతో ధమ్మో ఉప్పజ్జతి నఝానపచ్చయా – చతువిఞ్ఞాణసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౧)

(నమగ్గపచ్చయా నహేతుపచ్చయసదిసం. మోహో నత్థి. నవిప్పయుత్తపచ్చయా పరిపుణ్ణం అరూపపఞ్హమేవ.)