౧. విభఙ్గవారో

హేతుపచ్చయో

౧. పీతిసహగతం ధమ్మం పటిచ్చ పీతిసహగతో ధమ్మో ఉప్పజ్జతి హేతుపచ్చయా – పీతిసహగతం ఏకం ఖన్ధం పటిచ్చ తయో ఖన్ధా, తయో ఖన్ధే పటిచ్చ ఏకో ఖన్ధో, ద్వే ఖన్ధే పటిచ్చ ద్వే ఖన్ధా. పటిసన్ధిక్ఖణే పీతిసహగతం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౧)

పీతిసహగతం ధమ్మం పటిచ్చ సుఖసహగతో ధమ్మో ఉప్పజ్జతి హేతుపచ్చయా – పీతిసహగతం ఏకం ఖన్ధం పటిచ్చ సుఖసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. పటిసన్ధిక్ఖణే పీతిసహగతం ఏకం ఖన్ధం పటిచ్చ సుఖసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౨)

పీతిసహగతం ధమ్మం పటిచ్చ పీతిసహగతో చ సుఖసహగతో చ ధమ్మా ఉప్పజ్జన్తి హేతుపచ్చయా – పీతిసహగతం ఏకం ఖన్ధం పటిచ్చ పీతిసహగతా చ సుఖసహగతా చ తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. పటిసన్ధిక్ఖణే పీతిసహగతం ఏకం ఖన్ధం పటిచ్చ పీతిసహగతా చ సుఖసహగతా చ తయో ఖన్ధా …పే… ద్వే ఖన్ధే పటిచ్చ ద్వే ఖన్ధా. (౩)

౨. సుఖసహగతం ధమ్మం పటిచ్చ సుఖసహగతో ధమ్మో ఉప్పజ్జతి హేతుపచ్చయా – సుఖసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. పటిసన్ధిక్ఖణే సుఖసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౧)

సుఖసహగతం ధమ్మం పటిచ్చ పీతిసహగతో ధమ్మో ఉప్పజ్జతి హేతుపచ్చయా – సుఖసహగతం ఏకం ఖన్ధం పటిచ్చ పీతిసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. పటిసన్ధిక్ఖణే సుఖసహగతం ఏకం ఖన్ధం పటిచ్చ పీతిసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౨)

సుఖసహగతం ధమ్మం పటిచ్చ పీతిసహగతో చ సుఖసహగతో చ ధమ్మా ఉప్పజ్జన్తి హేతుపచ్చయా – సుఖసహగతం ఏకం ఖన్ధం పటిచ్చ పీతిసహగతా చ సుఖసహగతా చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. పటిసన్ధిక్ఖణే సుఖసహగతం ఏకం ఖన్ధం పటిచ్చ పీతిసహగతా చ సుఖసహగతా చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౩)

౩. ఉపేక్ఖాసహగతం ధమ్మం పటిచ్చ ఉపేక్ఖాసహగతో ధమ్మో ఉప్పజ్జతి హేతుపచ్చయా – ఉపేక్ఖాసహగతం ఏకం ఖన్ధం పటిచ్చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. పటిసన్ధిక్ఖణే…పే…. (౧)

పీతిసహగతఞ్చ సుఖసహగతఞ్చ ధమ్మం పటిచ్చ పీతిసహగతో ధమ్మో ఉప్పజ్జతి హేతుపచ్చయా – పీతిసహగతఞ్చ సుఖసహగతఞ్చ ఏకం ఖన్ధం పటిచ్చ పీతిసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. పటిసన్ధిక్ఖణే పీతిసహగతఞ్చ సుఖసహగతఞ్చ ఏకం ఖన్ధం పటిచ్చ పీతిసహగతా తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౧)

పీతిసహగతఞ్చ సుఖసహగతఞ్చ ధమ్మం పటిచ్చ సుఖసహగతో ధమ్మో ఉప్పజ్జతి హేతుపచ్చయా – పీతిసహగతఞ్చ సుఖసహగతఞ్చ ఏకం ఖన్ధం పటిచ్చ సుఖసహగతా ద్వే ఖన్ధా, ద్వే ఖన్ధే పటిచ్చ ఏకో ఖన్ధో. పటిసన్ధిక్ఖణే పీతిసహగతఞ్చ సుఖసహగతఞ్చ ఏకం ఖన్ధం పటిచ్చ సుఖసహగతా ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౨)

పీతిసహగతఞ్చ సుఖసహగతఞ్చ ధమ్మం పటిచ్చ పీతిసహగతో చ సుఖసహగతో చ ధమ్మా ఉప్పజ్జన్తి హేతుపచ్చయా – పీతిసహగతఞ్చ సుఖసహగతఞ్చ ఏకం ఖన్ధం పటిచ్చ పీతిసహగతా చ సుఖసహగతా చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. పటిసన్ధిక్ఖణే పీతిసహగతఞ్చ సుఖసహగతఞ్చ ఏకం ఖన్ధం పటిచ్చ పీతిసహగతా చ సుఖసహగతా చ ద్వే ఖన్ధా, ద్వే ఖన్ధే పటిచ్చ ఏకో ఖన్ధో. (౩)

ఆరమ్మణపచ్చయాది

౪. పీతిసహగతం ధమ్మం పటిచ్చ పీతిసహగతో ధమ్మో ఉప్పజ్జతి ఆరమ్మణపచ్చయా… అధిపతిపచ్చయా… (పటిసన్ధిక్ఖణే నత్థి) అనన్తరపచ్చయా… సమనన్తరపచ్చయా… సహజాతపచ్చయా… అఞ్ఞమఞ్ఞపచ్చయా… నిస్సయపచ్చయా… ఉపనిస్సయపచ్చయా… పురేజాతపచ్చయా… (పురేజాతే పటిసన్ధిక్ఖణే నత్థి) ఆసేవనపచ్చయా… (ఆసేవనే విపాకం నత్థి) కమ్మపచ్చయా… విపాకపచ్చయా… ఆహార…పే… ఇన్ద్రియ… ఝాన… మగ్గ… సమ్పయుత్త… విప్పయుత్త… అత్థి… నత్థి… విగత… అవిగతపచ్చయా.