౧. విభఙ్గవారో

నహేతుపచ్చయో

౧౭. అనిదస్సనసప్పటిఘం ధమ్మం పటిచ్చ అనిదస్సనసప్పటిఘో ధమ్మో ఉప్పజ్జతి నహేతుపచ్చయా – అనిదస్సనసప్పటిఘం ఏకం మహాభూతం పటిచ్చ ద్వే మహాభూతా, ద్వే మహాభూతే పటిచ్చ ఏకం మహాభూతం. అనిదస్సనసప్పటిఘే మహాభూతే పటిచ్చ అనిదస్సనసప్పటిఘం చిత్తసముట్ఠానం రూపం కటత్తారూపం ఉపాదారూపం. ఫోట్ఠబ్బాయతనం పటిచ్చ చక్ఖాయతనం…పే… రసాయతనం. బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం అనిదస్సనసప్పటిఘం ఏకం మహాభూతం పటిచ్చ ద్వే మహాభూతా, ద్వే మహాభూతే పటిచ్చ ఏకం మహాభూతం, మహాభూతే పటిచ్చ…పే….

(అనిదస్సనసప్పటిఘమూలకే ఇమినా కారణేన సత్తపి పఞ్హా విభజితబ్బా.)

౧౮. అనిదస్సనఅప్పటిఘం ధమ్మం పటిచ్చ అనిదస్సనఅప్పటిఘో ధమ్మో ఉప్పజ్జతి నహేతుపచ్చయా – అహేతుకం అనిదస్సనఅప్పటిఘం ఏకం ఖన్ధం పటిచ్చ తయో ఖన్ధా అనిదస్సనఅప్పటిఘఞ్చ చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే అనిదస్సనఅప్పటిఘం ఏకం ఖన్ధం పటిచ్చ తయో ఖన్ధా అనిదస్సనఅప్పటిఘఞ్చ కటత్తారూపం…పే… ఖన్ధే పటిచ్చ వత్థు, వత్థుం పటిచ్చ ఖన్ధా. ఆపోధాతుం పటిచ్చ అనిదస్సనఅప్పటిఘం చిత్తసముట్ఠానం రూపం కటత్తారూపం ఉపాదారూపం. ఆపోధాతుం పటిచ్చ ఇత్థిన్ద్రియం…పే… కబళీకారో ఆహారో. బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం ఆపోధాతుం పటిచ్చ అనిదస్సనఅప్పటిఘం కటత్తారూపం ఉపాదారూపం. విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో.

(అనిదస్సనఅప్పటిఘమూలకా ఇమినా కారణేన సత్త పఞ్హా విభజితబ్బా.)

౧౯. అనిదస్సనసప్పటిఘఞ్చ అనిదస్సనఅప్పటిఘఞ్చ ధమ్మం పటిచ్చ సనిదస్సనసప్పటిఘో ధమ్మో ఉప్పజ్జతి నహేతుపచ్చయా – అహేతుకే అనిదస్సనఅప్పటిఘే ఖన్ధే చ మహాభూతే చ పటిచ్చ సనిదస్సనసప్పటిఘం చిత్తసముట్ఠానం రూపం. అహేతుకపటిసన్ధిక్ఖణే అనిదస్సనఅప్పటిఘే ఖన్ధే చ మహాభూతే చ పటిచ్చ సనిదస్సనసప్పటిఘం కటత్తారూపం. అనిదస్సనసప్పటిఘే మహాభూతే చ ఆపోధాతుఞ్చ పటిచ్చ సనిదస్సనసప్పటిఘం చిత్తసముట్ఠానం రూపం కటత్తారూపం ఉపాదారూపం. ఫోట్ఠబ్బాయతనఞ్చ ఆపోధాతుఞ్చ పటిచ్చ రూపాయతనం. బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం అనిదస్సనసప్పటిఘే మహాభూతే చ ఆపోధాతుఞ్చ పటిచ్చ సనిదస్సనసప్పటిఘం కటత్తారూపం ఉపాదారూపం.

(ఇమినా కారణేన సత్త పఞ్హా విత్థారేతబ్బా అసమ్మోహన్తేన.)

నఆరమ్మణపచ్చయో

౨౦. అనిదస్సనసప్పటిఘం ధమ్మం పటిచ్చ అనిదస్సనసప్పటిఘో ధమ్మో ఉప్పజ్జతి నఆరమ్మణపచ్చయా – అనిదస్సనసప్పటిఘం ఏకం మహాభూతం పటిచ్చ ద్వే మహాభూతా, ద్వే మహాభూతే పటిచ్చ ఏకం మహాభూతం. అనిదస్సనసప్పటిఘే మహాభూతే పటిచ్చ అనిదస్సనసప్పటిఘం చిత్తసముట్ఠానం రూపం కటత్తారూపం ఉపాదారూపం. ఫోట్ఠబ్బాయతనం పటిచ్చ చక్ఖాయతనం…పే… రసాయతనం. బాహిరం… ఆహారసముట్ఠానం…, ఉతుసముట్ఠానం… అసఞ్ఞసత్తానం అనిదస్సనసప్పటిఘం ఏకం మహాభూతం పటిచ్చ ద్వే మహాభూతా, ద్వే మహాభూతే పటిచ్చ ఏకం మహాభూతం…పే….

(అనిదస్సనసప్పటిఘమూలకా ఇమినా కారణేన సత్తపి పఞ్హా విత్థారేతబ్బా.)

౨౧. అనిదస్సనఅప్పటిఘం ధమ్మం పటిచ్చ అనిదస్సనఅప్పటిఘో ధమ్మో ఉప్పజ్జతి నఆరమ్మణపచ్చయా – అనిదస్సనఅప్పటిఘే ఖన్ధే పటిచ్చ అనిదస్సనఅప్పటిఘం చిత్తసముట్ఠానం రూపం. పటిసన్ధిక్ఖణే అనిదస్సనఅప్పటిఘే ఖన్ధే పటిచ్చ అనిదస్సనఅప్పటిఘం కటత్తారూపం. ఖన్ధే పటిచ్చ వత్థు…పే… ఆపోధాతుం పటిచ్చ అనిదస్సనఅప్పటిఘం చిత్తసముట్ఠానం రూపం కటత్తారూపం ఉపాదారూపం. ఆపోధాతుం పటిచ్చ ఇత్థిన్ద్రియం…పే… కబళీకారో ఆహారో. బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం ఆపోధాతుం పటిచ్చ అనిదస్సనఅప్పటిఘం కటత్తారూపం ఉపాదారూపం.

(అనిదస్సనఅప్పటిఘమూలకే ఇమినా కారణేన సత్తపి పఞ్హా విత్థారేతబ్బా.)

౨౨. అనిదస్సనసప్పటిఘఞ్చ అనిదస్సనఅప్పటిఘఞ్చ ధమ్మం పటిచ్చ సనిదస్సనసప్పటిఘో ధమ్మో ఉప్పజ్జతి నఆరమ్మణపచ్చయా – అనిదస్సనఅప్పటిఘే ఖన్ధే చ మహాభూతే చ పటిచ్చ సనిదస్సనసప్పటిఘం చిత్తసముట్ఠానం రూపం. పటిసన్ధిక్ఖణే అనిదస్సనఅప్పటిఘే ఖన్ధే చ మహాభూతే చ పటిచ్చ సనిదస్సనసప్పటిఘం కటత్తారూపం. అనిదస్సనసప్పటిఘే మహాభూతే చ ఆపోధాతుఞ్చ పటిచ్చ సనిదస్సనసప్పటిఘం చిత్తసముట్ఠానం రూపం కటత్తారూపం ఉపాదారూపం. ఫోట్ఠబ్బాయతనఞ్చ ఆపోధాతుఞ్చ పటిచ్చ రూపాయతనం. బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం అనిదస్సనసప్పటిఘే మహాభూతే చ ఆపోధాతుఞ్చ పటిచ్చ సనిదస్సనసప్పటిఘం కటత్తారూపం ఉపాదారూపం.

(ఘటనే ఇమినా కారణేన సత్తపి పఞ్హా విభజితబ్బా.)

నఅధిపతిపచ్చయాది

౨౩. అనిదస్సనసప్పటిఘం ధమ్మం పటిచ్చ అనిదస్సనసప్పటిఘో ధమ్మో ఉప్పజ్జతి నఅధిపతిపచ్చయా (సహజాతసదిసం)… నఅనన్తరపచ్చయా… నసమనన్తరపచ్చయా… నఅఞ్ఞమఞ్ఞపచ్చయా – అనిదస్సనసప్పటిఘే మహాభూతే పటిచ్చ అనిదస్సనసప్పటిఘం చిత్తసముట్ఠానం రూపం కటత్తారూపం ఉపాదారూపం. ఫోట్ఠబ్బాయతనం పటిచ్చ చక్ఖాయతనం…పే… రసాయతనం… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం మహాభూతే పటిచ్చ అనిదస్సనసప్పటిఘం కటత్తారూపం ఉపాదారూపం.

(ఇమినా కారణేన ఏకవీస పఞ్హా విభజితబ్బా.)

నఉపనిస్సయపచ్చయా… నపురేజాతపచ్చయా… నపచ్ఛాజాతపచ్చయా… నఆసేవనపచ్చయా… నకమ్మపచ్చయా – బాహిరం… ఆహారసముట్ఠానం… ఉతుసముట్ఠానం… అనిదస్సనసప్పటిఘం ఏకం మహాభూతం పటిచ్చ ద్వే మహాభూతా, ద్వే మహాభూతే పటిచ్చ ఏకం మహాభూతం. అనిదస్సనసప్పటిఘే మహాభూతే పటిచ్చ అనిదస్సనసప్పటిఘం ఉపాదారూపం (కమ్మం విభజిత్వా నకమ్మేనేవ ఏకవీస పఞ్హా కాతబ్బా), నవిపాకపచ్చయా (పటిసన్ధిపి కటత్తాపి నత్థి, పఞ్చవోకారేయేవ కాతబ్బా), నఆహారపచ్చయా – బాహిరం… ఉతుసముట్ఠానం… అసఞ్ఞసత్తానం…పే… (ఇమినా కారణేన విభజితబ్బా ఏకవీసాపి).

నఇన్ద్రియపచ్చయాది

౨౪. అనిదస్సనసప్పటిఘం ధమ్మం పటిచ్చ అనిదస్సనసప్పటిఘో ధమ్మో ఉప్పజ్జతి నఇన్ద్రియపచ్చయా – బాహిరం… ఆహారసముట్ఠానం… ఉతుసముట్ఠానం… అనిదస్సనసప్పటిఘం ఏకం మహాభూతం…పే… అసఞ్ఞసత్తానం మహాభూతే పటిచ్చ రూపజీవితిన్ద్రియం (సంఖిత్తం, సబ్బే పఞ్హా విభజితబ్బా)… నఝానపచ్చయా – బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం ఏకం మహాభూతం (సంఖిత్తం, సత్తపి పఞ్హా విభజితబ్బా).

అనిదస్సనఅప్పటిఘం ధమ్మం పటిచ్చ అనిదస్సనఅప్పటిఘో ధమ్మో ఉప్పజ్జతి నఝానపచ్చయా – పఞ్చవిఞ్ఞాణసహగతం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం ఆపోధాతుం పటిచ్చ అనిదస్సనఅప్పటిఘం కటత్తారూపం ఉపాదారూపం.

(ఏవం సత్తపి పఞ్హా విభజితబ్బా.)

౨౫. అనిదస్సనసప్పటిఘఞ్చ అనిదస్సనఅప్పటిఘఞ్చ ధమ్మం పటిచ్చ సనిదస్సనసప్పటిఘో ధమ్మో ఉప్పజ్జతి నఝానపచ్చయా – బాహిరం… ఆహారసముట్ఠానం… ఉతుసముట్ఠానం…, అసఞ్ఞసత్తానం…పే… అనిదస్సనసప్పటిఘే మహాభూతే చ ఆపోధాతుఞ్చ పటిచ్చ సనిదస్సనసప్పటిఘం కటత్తారూపం ఉపాదారూపం.

(ఏవం సత్తపి పఞ్హా విభజితబ్బా), నమగ్గపచ్చయా… (నహేతుసదిసం కాతబ్బం. పరిపుణ్ణం. మోహో నత్థి). నసమ్పయుత్తపచ్చయా… నవిప్పయుత్తపచ్చయా (పరిపుణ్ణం)… నోనత్థిపచ్చయా… నోవిగతపచ్చయా.