౨౧. అజ్ఝత్తారమ్మణత్తికం

౧. పటిచ్చవారో

౧. పచ్చయానులోమం

౧. విభఙ్గవారో

హేతుపచ్చయో

౧. అజ్ఝత్తారమ్మణం ధమ్మం పటిచ్చ అజ్ఝత్తారమ్మణో ధమ్మో ఉప్పజ్జతి హేతుపచ్చయా – అజ్ఝత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే అజ్ఝత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

బహిద్ధారమ్మణం ధమ్మం పటిచ్చ బహిద్ధారమ్మణో ధమ్మో ఉప్పజ్జతి హేతుపచ్చయా – బహిద్ధారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే బహిద్ధారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

ఆరమ్మణపచ్చయాది

౨. అజ్ఝత్తారమ్మణం ధమ్మం పటిచ్చ అజ్ఝత్తారమ్మణో ధమ్మో ఉప్పజ్జతి ఆరమ్మణపచ్చయా…పే… అవిగతపచ్చయా (సంఖిత్తం).

౧. పచ్చయానులోమం

౨. సఙ్ఖ్యావారో

౩. హేతుపచ్చయా ఆరమ్మణే ద్వే (సంఖిత్తం, సబ్బత్థ ద్వే), అవిగతే ద్వే (ఏవం గణేతబ్బం).

అనులోమం.

౨. పచ్చయపచ్చనీయం

౧. విభఙ్గవారో

నహేతుపచ్చయో

౪. అజ్ఝత్తారమ్మణం ధమ్మం పటిచ్చ అజ్ఝత్తారమ్మణో ధమ్మో ఉప్పజ్జతి నహేతుపచ్చయా – అహేతుకం అజ్ఝత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… అహేతుకపటిసన్ధిక్ఖణే అజ్ఝత్తారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

బహిద్ధారమ్మణం ధమ్మం పటిచ్చ బహిద్ధారమ్మణో ధమ్మో ఉప్పజ్జతి నహేతుపచ్చయా – అహేతుకం బహిద్ధారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… అహేతుకపటిసన్ధిక్ఖణే…పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

నఅధిపతిపచ్చయాది

౫. అజ్ఝత్తారమ్మణం ధమ్మం పటిచ్చ అజ్ఝత్తారమ్మణో ధమ్మో ఉప్పజ్జతి నఅధిపతిపచ్చయా … (అనులోమసహజాతసదిసం, నిన్నానాకరణం) నపురేజాతపచ్చయా – అరూపే అజ్ఝత్తారమ్మణం ఏకం ఖన్ధం పటిచ్చ…పే… పటిసన్ధిక్ఖణే…పే…. (౧)

౬. బహిద్ధారమ్మణం ధమ్మం పటిచ్చ బహిద్ధారమ్మణో ధమ్మో ఉప్పజ్జతి నపురేజాతపచ్చయా – అరూపే బహిద్ధారమ్మణం ఏకం ఖన్ధం పటిచ్చ తయో ఖన్ధా…పే…. పటిసన్ధిక్ఖణే…పే… నపచ్ఛాజాతపచ్చయా… నఆసేవనపచ్చయా… (సహజాతసదిసం) నకమ్మపచ్చయా – అజ్ఝత్తారమ్మణే ఖన్ధే పటిచ్చ అజ్ఝత్తారమ్మణా చేతనా.

బహిద్ధారమ్మణం ధమ్మం పటిచ్చ బహిద్ధారమ్మణో ధమ్మో ఉప్పజ్జతి నకమ్మపచ్చయా – బహిద్ధారమ్మణే ఖన్ధే పటిచ్చ బహిద్ధారమ్మణా చేతనా.

నవిపాకపచ్చయాది

౭. అజ్ఝత్తారమ్మణం ధమ్మం పటిచ్చ అజ్ఝత్తారమ్మణో ధమ్మో ఉప్పజ్జతి నవిపాకపచ్చయా (పటిసన్ధి నత్థి)… నఝానపచ్చయా…పే… పఞ్చవిఞ్ఞాణసహగతం అజ్ఝత్తారమ్మణం ఏకం…పే…. (౧)

బహిద్ధారమ్మణం ధమ్మం పటిచ్చ బహిద్ధారమ్మణో ధమ్మో ఉప్పజ్జతి నఝానపచ్చయా – పఞ్చవిఞ్ఞాణసహగతం బహిద్ధారమ్మణం ఏకం ఖన్ధం పటిచ్చ తయో ఖన్ధా…పే… నమగ్గపచ్చయా (నహేతుసదిసో. మోహో నత్థి)… నవిప్పయుత్తపచ్చయా – అరూపే అజ్ఝత్తారమ్మణం ఏకం ఖన్ధం పటిచ్చ తయో ఖన్ధా…పే…. (౧)

బహిద్ధారమ్మణం ధమ్మం పటిచ్చ బహిద్ధారమ్మణో ధమ్మో ఉప్పజ్జతి నవిప్పయుత్తపచ్చయా – అరూపే బహిద్ధారమ్మణం ఏకం ఖన్ధం పటిచ్చ తయో ఖన్ధా…పే…. (౧)

౨. పచ్చయపచ్చనీయం

౨. సఙ్ఖ్యావారో

౮. నహేతుయా ద్వే, నఅధిపతియా ద్వే, నపురేజాతే ద్వే, నపచ్ఛాజాతే ద్వే, నఆసేవనే నకమ్మే నవిపాకే నఝానే నమగ్గే నవిప్పయుత్తే ద్వే (ఏవం గణేతబ్బం).

పచ్చనీయం.

౩. పచ్చయానులోమపచ్చనీయం

౯. హేతుపచ్చయా నఅధిపతియా ద్వే…పే… నవిపాకే ద్వే, నవిప్పయుత్తే ద్వే (ఏవం గణేతబ్బం).

అనులోమపచ్చనీయం.

౪. పచ్చయపచ్చనీయానులోమం

౧౦. నహేతుపచ్చయా ఆరమ్మణే ద్వే, అనన్తరే ద్వే, సమనన్తరే ద్వే…పే… మగ్గే ద్వే…పే… అవిగతే ద్వే (ఏవం గణేతబ్బం).

పచ్చనీయానులోమం.

పటిచ్చవారో.

౨-౬. సహజాత-పచ్చయ-నిస్సయ-సంసట్ఠ-సమ్పయుత్తవారో

(సహజాతవారోపి పచ్చయవారోపి నిస్సయవారోపి సంసట్ఠవారోపి సమ్పయుత్తవారోపి పటిచ్చవారసదిసా.)

౭. పఞ్హావారో

౧. పచ్చయానులోమం

౧. విభఙ్గవారో

హేతుపచ్చయో

౧౧. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స హేతుపచ్చయేన పచ్చయో – అజ్ఝత్తారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. పటిసన్ధిక్ఖణే అజ్ఝత్తారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)

బహిద్ధారమ్మణో ధమ్మో బహిద్ధారమ్మణస్స ధమ్మస్స హేతుపచ్చయేన పచ్చయో – బహిద్ధారమ్మణా హేతూ సమ్పయుత్తకానం ఖన్ధానం…పే… పటిసన్ధిక్ఖణే…పే…. (౧)

ఆరమ్మణపచ్చయో

౧౨. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స ఆరమ్మణపచ్చయేన పచ్చయో – అజ్ఝత్తం విఞ్ఞాణఞ్చాయతనం పచ్చవేక్ఖతి, నేవసఞ్ఞానాసఞ్ఞాయతనం పచ్చవేక్ఖతి, అజ్ఝత్తారమ్మణం అజ్ఝత్తం దిబ్బం చక్ఖుం పచ్చవేక్ఖతి, దిబ్బం సోతధాతుం…పే… ఇద్ధివిధఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం పచ్చవేక్ఖతి. అరియా అజ్ఝత్తారమ్మణే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. అజ్ఝత్తారమ్మణే అజ్ఝత్తే ఖన్ధే అనిచ్చతో…పే… విపస్సతి, అస్సాదేతి అభినన్దతి, తం ఆరబ్భ అజ్ఝత్తారమ్మణో రాగో ఉప్పజ్జతి…పే… దోమనస్సం ఉప్పజ్జతి. అజ్ఝత్తారమ్మణా అజ్ఝత్తా ఖన్ధా పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

అజ్ఝత్తారమ్మణో ధమ్మో బహిద్ధారమ్మణస్స ధమ్మస్స ఆరమ్మణపచ్చయేన పచ్చయో – బహిద్ధా విఞ్ఞాణఞ్చాయతనం పచ్చవేక్ఖతి, నేవసఞ్ఞానాసఞ్ఞాయతనం పచ్చవేక్ఖతి. అజ్ఝత్తారమ్మణం బహిద్ధా దిబ్బం చక్ఖుం పచ్చవేక్ఖతి, దిబ్బం సోతధాతుం…పే… ఇద్ధివిధఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం పచ్చవేక్ఖతి, అజ్ఝత్తారమ్మణే బహిద్ధా ఖన్ధే అనిచ్చతో దుక్ఖతో అనత్తతో విపస్సతి…పే… చేతోపరియఞాణేన అజ్ఝత్తారమ్మణబహిద్ధాచిత్తసమఙ్గిస్స చిత్తం జానాతి, అజ్ఝత్తారమ్మణా బహిద్ధా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)

౧౩. బహిద్ధారమ్మణో ధమ్మో బహిద్ధారమ్మణస్స ధమ్మస్స ఆరమ్మణపచ్చయేన పచ్చయో – బహిద్ధారమ్మణం బహిద్ధా దిబ్బం చక్ఖుం పచ్చవేక్ఖతి, దిబ్బం సోతధాతుం పచ్చవేక్ఖతి. ఇద్ధివిధఞాణం…పే… చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అనాగతంసఞాణం పచ్చవేక్ఖతి. బహిద్ధారమ్మణే బహిద్ధా ఖన్ధే అనిచ్చతో దుక్ఖతో అనత్తతో విపస్సతి…పే… చేతోపరియఞాణేన బహిద్ధారమ్మణబహిద్ధాచిత్తసమఙ్గిస్స చిత్తం జానాతి. బహిద్ధారమ్మణా బహిద్ధా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)

బహిద్ధారమ్మణో ధమ్మో అజ్ఝత్తారమ్మణస్స ధమ్మస్స ఆరమ్మణపచ్చయేన పచ్చయో – దానం దత్వా సీలం సమాదియిత్వా ఉపోసథకమ్మం కత్వా తం పచ్చవేక్ఖతి, పుబ్బే సుచిణ్ణాని పచ్చవేక్ఖతి, ఝానా వుట్ఠహిత్వా ఝానం పచ్చవేక్ఖతి. అరియా మగ్గా వుట్ఠహిత్వా మగ్గం పచ్చవేక్ఖన్తి, ఫలం పచ్చవేక్ఖన్తి, బహిద్ధారమ్మణే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. బహిద్ధారమ్మణం అజ్ఝత్తం దిబ్బం చక్ఖుం పచ్చవేక్ఖతి, దిబ్బం సోతధాతుం… ఇద్ధివిధఞాణం… చేతోపరియఞాణం… పుబ్బేనివాసానుస్సతిఞాణం… యథాకమ్మూపగఞాణం… అనాగతంసఞాణం… బహిద్ధారమ్మణే అజ్ఝత్తే ఖన్ధే అనిచ్చతో…పే… విపస్సతి, అస్సాదేతి అభినన్దతి, తం ఆరబ్భ అజ్ఝత్తారమ్మణో రాగో ఉప్పజ్జతి…పే… దోమనస్సం ఉప్పజ్జతి. బహిద్ధారమ్మణా అజ్ఝత్తా ఖన్ధా ఇద్ధివిధఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)

అధిపతిపచ్చయో

౧౪. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అజ్ఝత్తం విఞ్ఞాణఞ్చాయతనం గరుం కత్వా పచ్చవేక్ఖతి, నేవసఞ్ఞానాసఞ్ఞాయతనం గరుం కత్వా పచ్చవేక్ఖతి. అజ్ఝత్తారమ్మణం అజ్ఝత్తం దిబ్బం చక్ఖుం గరుం కత్వా…పే… దిబ్బం సోతధాతుం…పే… ఇద్ధివిధఞాణం… పుబ్బేనివాసానుస్సతిఞాణం… యథాకమ్మూపగఞాణం… అనాగతంసఞాణం గరుం కత్వా…పే… అజ్ఝత్తారమ్మణే అజ్ఝత్తే ఖన్ధే గరుం కత్వా అస్సాదేతి అభినన్దతి, తం గరుం కత్వా అజ్ఝత్తారమ్మణో రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – అజ్ఝత్తారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

౧౫. బహిద్ధారమ్మణో ధమ్మో బహిద్ధారమ్మణస్స ధమ్మస్స అధిపతిపచ్చయేన పచ్చయో. సహజాతాధిపతి – బహిద్ధారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)

బహిద్ధారమ్మణో ధమ్మో అజ్ఝత్తారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – దానం దత్వా సీలం సమాదియిత్వా ఉపోసథకమ్మం కత్వా తం గరుం కత్వా పచ్చవేక్ఖతి, పుబ్బే సుచిణ్ణాని…పే… ఝానా వుట్ఠహిత్వా…పే… అరియా మగ్గా వుట్ఠహిత్వా మగ్గం… ఫలం గరుం కత్వా పచ్చవేక్ఖన్తి. బహిద్ధారమ్మణం అజ్ఝత్తం దిబ్బం చక్ఖుం గరుం కత్వా…పే… దిబ్బం సోతధాతుం… ఇద్ధివిధఞాణం… చేతోపరియఞాణం… పుబ్బేనివాసానుస్సతిఞాణం… యథాకమ్మూపగఞాణం… అనాగతంసఞాణం గరుం కత్వా పచ్చవేక్ఖతి, బహిద్ధారమ్మణే అజ్ఝత్తే ఖన్ధే గరుం కత్వా అస్సాదేతి అభినన్దతి, తం గరుం కత్వా అజ్ఝత్తారమ్మణో రాగో ఉప్పజ్జతి, దిట్ఠి ఉప్పజ్జతి. (౨)

అనన్తరపచ్చయో

౧౬. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా అజ్ఝత్తారమ్మణా ఖన్ధా పచ్ఛిమానం పచ్ఛిమానం అజ్ఝత్తారమ్మణానం ఖన్ధానం అనన్తరపచ్చయేన పచ్చయో. (౧)

అజ్ఝత్తారమ్మణో ధమ్మో బహిద్ధారమ్మణస్స ధమ్మస్స అనన్తరపచ్చయేన పచ్చయో – అజ్ఝత్తారమ్మణం చుతిచిత్తం బహిద్ధారమ్మణస్స ఉపపత్తిచిత్తస్స అనన్తరపచ్చయేన పచ్చయో. అజ్ఝత్తారమ్మణం భవఙ్గం బహిద్ధారమ్మణాయ ఆవజ్జనాయ అనన్తరపచ్చయేన పచ్చయో. అజ్ఝత్తారమ్మణా ఖన్ధా బహిద్ధారమ్మణస్స వుట్ఠానస్స అనన్తరపచ్చయేన పచ్చయో. అజ్ఝత్తారమ్మణం అనులోమం గోత్రభుస్స… అనులోమం వోదానస్స… అనులోమం ఫలసమాపత్తియా… నిరోధా వుట్ఠహన్తస్స… నేవసఞ్ఞానాసఞ్ఞాయతనం ఫలసమాపత్తియా అనన్తరపచ్చయేన పచ్చయో. (౨)

౧౭. బహిద్ధారమ్మణో ధమ్మో బహిద్ధారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా బహిద్ధారమ్మణా ఖన్ధా పచ్ఛిమానం పచ్ఛిమానం బహిద్ధారమ్మణానం ఖన్ధానం అనన్తరపచ్చయేన పచ్చయో. బహిద్ధారమ్మణం అనులోమం గోత్రభుస్స… అనులోమం వోదానస్స… గోత్రభు మగ్గస్స… వోదానం మగ్గస్స… మగ్గో ఫలస్స… ఫలం ఫలస్స… అనులోమం ఫలసమాపత్తియా అనన్తరపచ్చయేన పచ్చయో. (౧)

బహిద్ధారమ్మణో ధమ్మో అజ్ఝత్తారమ్మణస్స ధమ్మస్స అనన్తరపచ్చయేన పచ్చయో – బహిద్ధారమ్మణం చుతిచిత్తం అజ్ఝత్తారమ్మణస్స ఉపపత్తిచిత్తస్స అనన్తరపచ్చయేన పచ్చయో. బహిద్ధారమ్మణం భవఙ్గం అజ్ఝత్తారమ్మణాయ ఆవజ్జనాయ అనన్తరపచ్చయేన పచ్చయో. బహిద్ధారమ్మణా ఖన్ధా అజ్ఝత్తారమ్మణస్స వుట్ఠానస్స అనన్తరపచ్చయేన పచ్చయో. (౨)

సమనన్తరపచ్చయాది

౧౮. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స సమనన్తరపచ్చయేన పచ్చయో…పే… సహజాతపచ్చయేన పచ్చయో… అఞ్ఞమఞ్ఞపచ్చయేన పచ్చయో… నిస్సయపచ్చయేన పచ్చయో.

ఉపనిస్సయపచ్చయో

౧౯. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అజ్ఝత్తారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా, అజ్ఝత్తారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౧)

అజ్ఝత్తారమ్మణో ధమ్మో బహిద్ధారమ్మణస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – అజ్ఝత్తారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా బహిద్ధారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౨)

౨౦. బహిద్ధారమ్మణో ధమ్మో బహిద్ధారమ్మణస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – బహిద్ధారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా బహిద్ధారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౧)

బహిద్ధారమ్మణో ధమ్మో అజ్ఝత్తారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – బహిద్ధారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా అజ్ఝత్తారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౨)

ఆసేవనపచ్చయో

౨౧. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా అజ్ఝత్తారమ్మణా ఖన్ధా పచ్ఛిమానం పచ్ఛిమానం అజ్ఝత్తారమ్మణానం ఖన్ధానం ఆసేవనపచ్చయేన పచ్చయో. (౧)

అజ్ఝత్తారమ్మణో ధమ్మో బహిద్ధారమ్మణస్స ధమ్మస్స ఆసేవనపచ్చయేన పచ్చయో – అజ్ఝత్తారమ్మణం అనులోమం గోత్రభుస్స, అనులోమం వోదానస్స ఆసేవనపచ్చయేన పచ్చయో. (౨)

బహిద్ధారమ్మణో ధమ్మో బహిద్ధారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా బహిద్ధారమ్మణా ఖన్ధా పచ్ఛిమానం పచ్ఛిమానం బహిద్ధారమ్మణానం ఖన్ధానం ఆసేవనపచ్చయేన పచ్చయో. బహిద్ధారమ్మణం అనులోమం గోత్రభుస్స… అనులోమం వోదానస్స… గోత్రభు మగ్గస్స… వోదానం మగ్గస్స ఆసేవనపచ్చయేన పచ్చయో. (౧)

కమ్మపచ్చయో

౨౨. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – అజ్ఝత్తారమ్మణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. పటిసన్ధిక్ఖణే…పే…. నానాక్ఖణికా – అజ్ఝత్తారమ్మణా చేతనా విపాకానం అజ్ఝత్తారమ్మణానం ఖన్ధానం కమ్మపచ్చయేన పచ్చయో. (౧)

అజ్ఝత్తారమ్మణో ధమ్మో బహిద్ధారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – అజ్ఝత్తారమ్మణా చేతనా విపాకానం బహిద్ధారమ్మణానం ఖన్ధానం కమ్మపచ్చయేన పచ్చయో. (౨)

బహిద్ధారమ్మణో ధమ్మో బహిద్ధారమ్మణస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – బహిద్ధారమ్మణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. పటిసన్ధిక్ఖణే…పే…. నానాక్ఖణికా – బహిద్ధారమ్మణా చేతనా విపాకానం బహిద్ధారమ్మణానం ఖన్ధానం కమ్మపచ్చయేన పచ్చయో. (౧)

బహిద్ధారమ్మణో ధమ్మో అజ్ఝత్తారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – బహిద్ధారమ్మణా చేతనా విపాకానం అజ్ఝత్తారమ్మణానం ఖన్ధానం కమ్మపచ్చయేన పచ్చయో. (౨)

విపాకపచ్చయాది

౨౩. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స విపాకపచ్చయేన పచ్చయో…పే… ఆహారపచ్చయేన పచ్చయో… ఇన్ద్రియపచ్చయేన పచ్చయో… ఝానపచ్చయేన పచ్చయో … మగ్గపచ్చయేన పచ్చయో… సమ్పయుత్తపచ్చయేన పచ్చయో… అత్థిపచ్చయేన పచ్చయో… నత్థిపచ్చయేన పచ్చయో…విగతపచ్చయేన పచ్చయో… అవిగతపచ్చయేన పచ్చయో.

౧. పచ్చయానులోమం

౨. సఙ్ఖ్యావారో

సుద్ధం

౨౪. హేతుయా ద్వే, ఆరమ్మణే చత్తారి, అధిపతియా తీణి, అనన్తరే చత్తారి, సమనన్తరే చత్తారి, సహజాతే ద్వే, అఞ్ఞమఞ్ఞే ద్వే, నిస్సయే ద్వే, ఉపనిస్సయే చత్తారి, ఆసేవనే తీణి, కమ్మే చత్తారి, విపాకే ద్వే …పే… (సబ్బత్థ ద్వే ), సమ్పయుత్తే ద్వే, అత్థియా ద్వే, నత్థియా చత్తారి, విగతే చత్తారి, అవిగతే ద్వే (ఏవం గణేతబ్బం).

అనులోమం.

పచ్చనీయుద్ధారో

౨౫. అజ్ఝత్తారమ్మణో ధమ్మో అజ్ఝత్తారమ్మణస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౧)

అజ్ఝత్తారమ్మణో ధమ్మో బహిద్ధారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౨)

బహిద్ధారమ్మణో ధమ్మో బహిద్ధారమ్మణస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౧)

బహిద్ధారమ్మణో ధమ్మో అజ్ఝత్తారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౨)

౨. పచ్చయపచ్చనీయం

౨. సఙ్ఖ్యావారో

౨౬. నహేతుయా చత్తారి, నఆరమ్మణే చత్తారి, నఅధిపతియా చత్తారి, నఅనన్తరే చత్తారి (సంఖిత్తం, సబ్బత్థ చత్తారి), నపురేజాతే నపచ్ఛాజాతే నఆసేవనే…పే… నవిప్పయుత్తే చత్తారి…పే… నోఅవిగతే చత్తారి (ఏవం గణేతబ్బం).

పచ్చనీయం.

౩. పచ్చయానులోమపచ్చనీయం

౨౭. హేతుపచ్చయా నఆరమ్మణే ద్వే, నఅధిపతియా ద్వే, నఅనన్తరే నసమనన్తరే నఉపనిస్సయే నఆసేవనే నకమ్మే…పే… నోనత్థియా నోవిగతే ద్వే (సబ్బత్థ ద్వే. ఏవం గణేతబ్బం).

అనులోమపచ్చనీయం.

౪. పచ్చయపచ్చనీయానులోమం

౨౮. నహేతుపచ్చయా ఆరమ్మణే చత్తారి, అధిపతియా తీణి, అనన్తరే చత్తారి, సమనన్తరే చత్తారి, సహజాతే అఞ్ఞమఞ్ఞే నిస్సయే ద్వే, ఉపనిస్సయే చత్తారి, ఆసేవనే తీణి, కమ్మే చత్తారి, విపాకే ద్వే…పే… సమ్పయుత్తే ద్వే, అత్థియా ద్వే, నత్థియా చత్తారి, విగతే చత్తారి, అవిగతే ద్వే (ఏవం గణేతబ్బం).

పచ్చనీయానులోమం.

పఞ్హావారో.

అజ్ఝత్తారమ్మణత్తికం నిట్ఠితం.