౧. విభఙ్గవారో

నహేతుపచ్చయో

౭. అజ్ఝత్తం ధమ్మం పటిచ్చ అజ్ఝత్తో ధమ్మో ఉప్పజ్జతి నహేతుపచ్చయా – అహేతుకం అజ్ఝత్తం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా. ఏకం మహాభూతం…పే… ఆహారసముట్ఠానం… ఉతుసముట్ఠానం… అసఞ్ఞసత్తానం ఏకం మహాభూతం…పే… మహాభూతే పటిచ్చ కటత్తారూపం ఉపాదారూపం. విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

బహిద్ధా ధమ్మం పటిచ్చ బహిద్ధా ధమ్మో ఉప్పజ్జతి నహేతుపచ్చయా – అహేతుకం బహిద్ధా ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… అహేతుకపటిసన్ధిక్ఖణే…పే… ఖన్ధే పటిచ్చ వత్థు, వత్థుం పటిచ్చ ఖన్ధా. ఏకం మహాభూతం పటిచ్చ…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం ఏకం మహాభూతం పటిచ్చ…పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)

నఆరమ్మణపచ్చయో

౮. అజ్ఝత్తం ధమ్మం పటిచ్చ అజ్ఝత్తో ధమ్మో ఉప్పజ్జతి నఆరమ్మణపచ్చయా – అజ్ఝత్తే ఖన్ధే పటిచ్చ చిత్తసముట్ఠానం రూపం. పటిసన్ధిక్ఖణే అజ్ఝత్తే ఖన్ధే పటిచ్చ కటత్తారూపం. ఖన్ధే పటిచ్చ వత్థు…పే… ఏకం మహాభూతం పటిచ్చ…పే… ఆహారసముట్ఠానం… ఉతుసముట్ఠానం… అసఞ్ఞసత్తానం ఏకం మహాభూతం పటిచ్చ…పే…. (౧)

బహిద్ధా ధమ్మం పటిచ్చ బహిద్ధా ధమ్మో ఉప్పజ్జతి నఆరమ్మణపచ్చయా – బహిద్ధా ఖన్ధే పటిచ్చ చిత్తసముట్ఠానం రూపం. పటిసన్ధిక్ఖణే బహిద్ధా ఖన్ధే పటిచ్చ కటత్తారూపం. ఖన్ధే పటిచ్చ వత్థు…పే… ఏకం మహాభూతం…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే…. (౧)

నఅధిపతిపచ్చయాది

౯. అజ్ఝత్తం ధమ్మం పటిచ్చ అజ్ఝత్తో ధమ్మో ఉప్పజ్జతి నఅధిపతిపచ్చయా…పే… (అనులోమసహజాతసదిసం, నిన్నానాకరణం) నఅనన్తరపచ్చయా… నసమనన్తరపచ్చయా … నఅఞ్ఞమఞ్ఞపచ్చయా … నఉపనిస్సయపచ్చయా, నపురేజాతపచ్చయా – అరూపే అజ్ఝత్తం ఏకం ఖన్ధం పటిచ్చ…పే… అజ్ఝత్తే ఖన్ధే పటిచ్చ చిత్తసముట్ఠానం రూపం. పటిసన్ధిక్ఖణే అజ్ఝత్తం ఏకం ఖన్ధం పటిచ్చ తయో ఖన్ధా కటత్తా చ రూపం…పే… ద్వే ఖన్ధే…పే… ఖన్ధే పటిచ్చ వత్థు, వత్థుం పటిచ్చ ఖన్ధా. ఏకం మహాభూతం పటిచ్చ…పే… ఆహారసముట్ఠానం… ఉతుసముట్ఠానం… అసఞ్ఞసత్తానం…పే….

౧౦. బహిద్ధా ధమ్మం పటిచ్చ బహిద్ధా ధమ్మో ఉప్పజ్జతి నపురేజాతపచ్చయా – అరూపే బహిద్ధా ఏకం ఖన్ధం పటిచ్చ…పే… ద్వే ఖన్ధే…పే… బహిద్ధా ఖన్ధే పటిచ్చ చిత్తసముట్ఠానం రూపం. పటిసన్ధిక్ఖణే (పరిపుణ్ణం) ఏకం మహాభూతం…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే….

నపచ్ఛాజాతపచ్చయాది

౧౧. అజ్ఝత్తం ధమ్మం పటిచ్చ అజ్ఝత్తో ధమ్మో ఉప్పజ్జతి నపచ్ఛాజాతపచ్చయా, నఆసేవనపచ్చయా, నకమ్మపచ్చయా – అజ్ఝత్తే ఖన్ధే పటిచ్చ అజ్ఝత్తా చేతనా. ఆహారసముట్ఠానం… ఉతుసముట్ఠానం…పే…. (౧)

బహిద్ధా ధమ్మం పటిచ్చ బహిద్ధా ధమ్మో ఉప్పజ్జతి నకమ్మపచ్చయా – బహిద్ధా ఖన్ధే పటిచ్చ బహిద్ధా చేతనా. బాహిరం… ఆహారసముట్ఠానం… ఉతుసముట్ఠానం…. (౧)

నవిపాకపచ్చయాది

౧౨. అజ్ఝత్తం ధమ్మం పటిచ్చ అజ్ఝత్తో ధమ్మో ఉప్పజ్జతి నవిపాకపచ్చయా (పటిసన్ధి నత్థి), నఆహారపచ్చయా – ఉతుసముట్ఠానం… అసఞ్ఞసత్తానం…పే…. (౧)

బహిద్ధా ధమ్మం పటిచ్చ బహిద్ధా ధమ్మో ఉప్పజ్జతి నఆహారపచ్చయా – బాహిరం… ఉతుసముట్ఠానం… అసఞ్ఞసత్తానం…పే…. (౧)

అజ్ఝత్తం ధమ్మం పటిచ్చ అజ్ఝత్తో ధమ్మో ఉప్పజ్జతి నఇన్ద్రియపచ్చయా – ఆహారసముట్ఠానం… ఉతుసముట్ఠానం… అసఞ్ఞసత్తానం… మహాభూతే పటిచ్చ రూపజీవితిన్ద్రియం. (౧)

బహిద్ధా ధమ్మం పటిచ్చ బహిద్ధా ధమ్మో ఉప్పజ్జతి నఇన్ద్రియపచ్చయా – బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం… మహాభూతే పటిచ్చ రూపజీవితిన్ద్రియం. (౧)

నఝానపచ్చయో

౧౩. అజ్ఝత్తం ధమ్మం పటిచ్చ అజ్ఝత్తో ధమ్మో ఉప్పజ్జతి నఝానపచ్చయా – పఞ్చవిఞ్ఞాణసహగతం…పే… ఆహారసముట్ఠానం… ఉతుసముట్ఠానం… అసఞ్ఞసత్తానం…పే…. (౧)

బహిద్ధా ధమ్మం పటిచ్చ బహిద్ధా ధమ్మో ఉప్పజ్జతి నఝానపచ్చయా – పఞ్చవిఞ్ఞాణసహగతం…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే…. (౧)

నమగ్గపచ్చయాది

౧౪. అజ్ఝత్తం ధమ్మం పటిచ్చ అజ్ఝత్తో ధమ్మో ఉప్పజ్జతి నమగ్గపచ్చయా… (నహేతుసదిసం. మోహో నత్థి) నసమ్పయుత్తపచ్చయా… నవిప్పయుత్తపచ్చయా – అరూపే…పే… ఆహారసముట్ఠానం… ఉతుసముట్ఠానం… అసఞ్ఞసత్తానం…పే…. (౧)

బహిద్ధా ధమ్మం పటిచ్చ బహిద్ధా ధమ్మో ఉప్పజ్జతి నవిప్పయుత్తపచ్చయా – అరూపే…పే… బాహిరం… ఆహారసముట్ఠానం… ఉతుసముట్ఠానం… అసఞ్ఞసత్తానం…పే… నోనత్థిపచ్చయా, నోవిగతపచ్చయా.