౧౯. అతీతారమ్మణత్తికం
౧. పటిచ్చవారో
౧. పచ్చయానులోమం
౧. విభఙ్గవారో
హేతుపచ్చయో
౧. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి హేతుపచ్చయా – అతీతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. పటిసన్ధిక్ఖణే అతీతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే పటిచ్చ ద్వే ఖన్ధా. (౧)
౨. అనాగతారమ్మణం ధమ్మం పటిచ్చ అనాగతారమ్మణో ధమ్మో ఉప్పజ్జతి హేతుపచ్చయా – అనాగతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
౩. పచ్చుప్పన్నారమ్మణం ధమ్మం పటిచ్చ పచ్చుప్పన్నారమ్మణో ధమ్మో ఉప్పజ్జతి హేతుపచ్చయా – పచ్చుప్పన్నారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. పటిసన్ధిక్ఖణే పచ్చుప్పన్నారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధా. (౧)
ఆరమ్మణపచ్చయాది
౪. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి ఆరమ్మణపచ్చయా… అధిపతిపచ్చయా (అధిపతియా పటిసన్ధి నత్థి)… అనన్తరపచ్చయా… సమనన్తరపచ్చయా… సహజాతపచ్చయా… అఞ్ఞమఞ్ఞపచ్చయా… నిస్సయపచ్చయా… ఉపనిస్సయపచ్చయా… పురేజాతపచ్చయా… ఆసేవనపచ్చయా (పురేజాతేపి ఆసేవనేపి పటిసన్ధి నత్థి)… కమ్మపచ్చయా… విపాకపచ్చయా (విపాకం అతీతారమ్మణం ఏకం ఖన్ధం, తిస్సోపి పఞ్హా పరిపుణ్ణా. పవత్తిపటిసన్ధి కాతబ్బా)… ఆహారపచ్చయా… ఇన్ద్రియపచ్చయా… ఝానపచ్చయా… మగ్గపచ్చయా… సమ్పయుత్తపచ్చయా… విప్పయుత్తపచ్చయా… అత్థిపచ్చయా… నత్థిపచ్చయా… విగతపచ్చయా… అవిగతపచ్చయా.
౧. పచ్చయానులోమం
౨. సఙ్ఖ్యావారో
౫. హేతుయా తీణి, ఆరమ్మణే తీణి, అధిపతియా తీణి…పే… (సబ్బత్థ తీణి), విగతే తీణి, అవిగతే తీణి (ఏవం గణేతబ్బం).
అనులోమం.
౨. పచ్చయపచ్చనీయం
౧. విభఙ్గవారో
నహేతుపచ్చయో
౬. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి నహేతుపచ్చయా – అహేతుకం అతీతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… అహేతుకపటిసన్ధిక్ఖణే …పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)
౭. అనాగతారమ్మణం ధమ్మం పటిచ్చ అనాగతారమ్మణో ధమ్మో ఉప్పజ్జతి నహేతుపచ్చయా – అహేతుకం అనాగతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)
౮. పచ్చుప్పన్నారమ్మణం ధమ్మం పటిచ్చ పచ్చుప్పన్నారమ్మణో ధమ్మో ఉప్పజ్జతి నహేతుపచ్చయా – అహేతుకం పచ్చుప్పన్నారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… అహేతుకపటిసన్ధిక్ఖణే…పే… విచికిచ్ఛాసహగతే ఉద్ధచ్చసహగతే ఖన్ధే పటిచ్చ విచికిచ్ఛాసహగతో ఉద్ధచ్చసహగతో మోహో. (౧)
నఅధిపతిపచ్చయో
౯. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి నఅధిపతిపచ్చయా (అనులోమసహజాతసదిసం).
నపురేజాతపచ్చయో
౧౦. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి నపురేజాతపచ్చయా – అరూపే అతీతారమ్మణం ఏకం ఖన్ధం పటిచ్చ…పే… ద్వే ఖన్ధే…పే… పటిసన్ధిక్ఖణే…పే…. (౧)
అనాగతారమ్మణం ధమ్మం పటిచ్చ అనాగతారమ్మణో ధమ్మో ఉప్పజ్జతి నపురేజాతపచ్చయా – అరూపే అనాగతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)
పచ్చుప్పన్నారమ్మణం ధమ్మం పటిచ్చ పచ్చుప్పన్నారమ్మణో ధమ్మో ఉప్పజ్జతి నపురేజాతపచ్చయా – పటిసన్ధిక్ఖణే పచ్చుప్పన్నారమ్మణం ఏకం ఖన్ధం పటిచ్చ…పే… ద్వే ఖన్ధే…పే…. (౧)
నపచ్ఛాజాతపచ్చయాది
౧౧. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి నపచ్ఛాజాతపచ్చయా… నఆసేవనపచ్చయా (నఅధిపతిసదిసా)… నకమ్మపచ్చయా – అతీతారమ్మణే ఖన్ధే పటిచ్చ అతీతారమ్మణా చేతనా. (౧)
అనాగతారమ్మణం ధమ్మం పటిచ్చ అనాగతారమ్మణో ధమ్మో ఉప్పజ్జతి నకమ్మపచ్చయా – అనాగతారమ్మణే ఖన్ధే పటిచ్చ అనాగతారమ్మణా చేతనా. (౧)
పచ్చుప్పన్నారమ్మణం ధమ్మం పటిచ్చ పచ్చుప్పన్నారమ్మణో ధమ్మో ఉప్పజ్జతి నకమ్మపచ్చయా – పచ్చుప్పన్నారమ్మణే ఖన్ధే పటిచ్చ పచ్చుప్పన్నారమ్మణా చేతనా. (౧)
నవిపాకపచ్చయో
౧౨. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి నవిపాకపచ్చయా…పే… (నవిపాకే పటిసన్ధి నత్థి).
నఝానపచ్చయో
౧౩. పచ్చుప్పన్నారమ్మణం ధమ్మం పటిచ్చ పచ్చుప్పన్నారమ్మణో ధమ్మో ఉప్పజ్జతి నఝానపచ్చయా – పఞ్చవిఞ్ఞాణసహగతం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)
నమగ్గపచ్చయో
౧౪. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి నమగ్గపచ్చయా – అహేతుకం అతీతారమ్మణం ఏకం ఖన్ధం పటిచ్చ తయో ఖన్ధా…పే… (నహేతుసదిసా తిస్సో పఞ్హా, మోహో నత్థి ).
నవిప్పయుత్తపచ్చయో
౧౫. అతీతారమ్మణం ధమ్మం పటిచ్చ అతీతారమ్మణో ధమ్మో ఉప్పజ్జతి నవిప్పయుత్తపచ్చయా – అరూపే అతీతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)
అనాగతారమ్మణం ధమ్మం పటిచ్చ అనాగతారమ్మణో ధమ్మో ఉప్పజ్జతి నవిప్పయుత్తపచ్చయా – అరూపే అనాగతారమ్మణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)
౨. పచ్చయపచ్చనీయం
౨. సఙ్ఖ్యావారో
౧౬. నహేతుయా తీణి, నఅధిపతియా నపురేజాతే నపచ్ఛాజాతే నఆసేవనే నకమ్మే నవిపాకే తీణి, నఝానే ఏకం, నమగ్గే తీణి, నవిప్పయుత్తే ద్వే (ఏవం గణేతబ్బం).
పచ్చనీయం.
౩. పచ్చయానులోమపచ్చనీయం
హేతుదుకం
౧౭. హేతుపచ్చయా నఅధిపతియా తీణి, నపురేజాతే నపచ్ఛాజాతే నఆసేవనే నకమ్మే నవిపాకే తీణి, నవిప్పయుత్తే ద్వే (ఏవం గణేతబ్బం).
అనులోమపచ్చనీయం.
౪. పచ్చయపచ్చనీయానులోమం
౧౮. నహేతుపచ్చయా ఆరమ్మణే తీణి…పే… (సబ్బత్థ తీణి) అవిగతే తీణి (ఏవం గణేతబ్బం).
పచ్చనీయానులోమం.
పటిచ్చవారో.
౨-౬. సహజాత-పచ్చయ-నిస్సయ-సంసట్ఠ-సమ్పయుత్తవారో
(సహజాతవారోపి పచ్చయవారోపి నిస్సయవారోపి సంసట్ఠవారోపి సమ్పయుత్తవారోపి పటిచ్చవారసదిసా.)
౭. పఞ్హావారో
౧. పచ్చయానులోమం
౧. విభఙ్గవారో
హేతుపచ్చయో
౧౯. అతీతారమ్మణో ధమ్మో అతీతారమ్మణస్స ధమ్మస్స హేతుపచ్చయేన పచ్చయో – అతీతారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. పటిసన్ధిక్ఖణే అతీతారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)
అనాగతారమ్మణో ధమ్మో అనాగతారమ్మణస్స ధమ్మస్స హేతుపచ్చయేన పచ్చయో – అనాగతారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)
పచ్చుప్పన్నారమ్మణో ధమ్మో పచ్చుప్పన్నారమ్మణస్స ధమ్మస్స హేతుపచ్చయేన పచ్చయో – పచ్చుప్పన్నారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. పటిసన్ధిక్ఖణే పచ్చుప్పన్నారమ్మణా హేతూ సమ్పయుత్తకానం ఖన్ధానం హేతుపచ్చయేన పచ్చయో. (౧)
ఆరమ్మణపచ్చయో
౨౦. అతీతారమ్మణో ధమ్మో అతీతారమ్మణస్స ధమ్మస్స ఆరమ్మణపచ్చయేన పచ్చయో – అతీతం విఞ్ఞాణఞ్చాయతనం పచ్చవేక్ఖతి, నేవసఞ్ఞానాసఞ్ఞాయతనం పచ్చవేక్ఖతి. అతీతారమ్మణం అతీతం ఇద్ధివిధఞాణం పచ్చవేక్ఖతి, చేతోపరియఞాణం… పుబ్బేనివాసానుస్సతిఞాణం… యథాకమ్మూపగఞాణం పచ్చవేక్ఖతి. అరియా అతీతారమ్మణే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. అతీతారమ్మణే అతీతే ఖన్ధే అనిచ్చతో దుక్ఖతో అనత్తతో విపస్సతి, అస్సాదేతి అభినన్దతి; తం ఆరబ్భ అతీతారమ్మణో రాగో ఉప్పజ్జతి, దిట్ఠి…పే… విచికిచ్ఛా…పే… ఉద్ధచ్చం…పే… దోమనస్సం ఉప్పజ్జతి. అతీతారమ్మణా అతీతా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
అతీతారమ్మణో ధమ్మో అనాగతారమ్మణస్స ధమ్మస్స ఆరమ్మణపచ్చయేన పచ్చయో – అనాగతం విఞ్ఞాణఞ్చాయతనం పచ్చవేక్ఖతి, నేవసఞ్ఞానాసఞ్ఞాయతనం పచ్చవేక్ఖతి. అతీతారమ్మణం అనాగతం ఇద్ధివిధఞాణం పచ్చవేక్ఖతి, చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం పచ్చవేక్ఖతి. అతీతారమ్మణే అనాగతే ఖన్ధే అనిచ్చతో…పే… విపస్సతి, అస్సాదేతి అభినన్దతి; తం ఆరబ్భ అనాగతారమ్మణో రాగో ఉప్పజ్జతి…పే… దోమనస్సం ఉప్పజ్జతి. అతీతారమ్మణా అనాగతా ఖన్ధా చేతోపరియఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
అతీతారమ్మణో ధమ్మో పచ్చుప్పన్నారమ్మణస్స ధమ్మస్స ఆరమ్మణపచ్చయేన పచ్చయో – చేతోపరియఞాణేన అతీతారమ్మణపచ్చుప్పన్నచిత్తసమఙ్గిస్స చిత్తం జానాతి. అతీతారమ్మణా పచ్చుప్పన్నా ఖన్ధా చేతోపరియఞాణస్స, ఆవజ్జనాయ ఆరమ్మణపచ్చయేన పచ్చయో. (౩)
౨౧. అనాగతారమ్మణో ధమ్మో అనాగతారమ్మణస్స ధమ్మస్స ఆరమ్మణపచ్చయేన పచ్చయో – అనాగతారమ్మణం అనాగతం ఇద్ధివిధఞాణం పచ్చవేక్ఖతి, చేతోపరియఞాణం…పే… అనాగతంసఞాణం…పే… అనాగతారమ్మణే అనాగతే ఖన్ధే అనిచ్చతో…పే… విపస్సతి, అస్సాదేతి అభినన్దతి; తం ఆరబ్భ అనాగతారమ్మణో రాగో ఉప్పజ్జతి…పే… దోమనస్సం ఉప్పజ్జతి. అనాగతారమ్మణా అనాగతా ఖన్ధా చేతోపరియఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
అనాగతారమ్మణో ధమ్మో అతీతారమ్మణస్స ధమ్మస్స ఆరమ్మణపచ్చయేన పచ్చయో – అనాగతారమ్మణం అతీతం ఇద్ధివిధఞాణం పచ్చవేక్ఖతి, చేతోపరియఞాణం… అనాగతంసఞాణం…పే… అరియా అనాగతారమ్మణే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి. పుబ్బే సముదాచిణ్ణే కిలేసే జానన్తి. అనాగతారమ్మణే అతీతే ఖన్ధే అనిచ్చతో…పే… విపస్సతి, అస్సాదేతి అభినన్దతి; తం ఆరబ్భ అతీతారమ్మణో రాగో ఉప్పజ్జతి…పే… దోమనస్సం ఉప్పజ్జతి. అనాగతారమ్మణా అతీతా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
అనాగతారమ్మణో ధమ్మో పచ్చుప్పన్నారమ్మణస్స ధమ్మస్స ఆరమ్మణపచ్చయేన పచ్చయో – చేతోపరియఞాణేన అనాగతారమ్మణపచ్చుప్పన్నచిత్తసమఙ్గిస్స చిత్తం జానాతి. అనాగతారమ్మణా పచ్చుప్పన్నా ఖన్ధా చేతోపరియఞాణస్స, ఆవజ్జనాయ ఆరమ్మణపచ్చయేన పచ్చయో. (౩)
౨౨. పచ్చుప్పన్నారమ్మణో ధమ్మో పచ్చుప్పన్నారమ్మణస్స ధమ్మస్స ఆరమ్మణపచ్చయేన పచ్చయో – చేతోపరియఞాణేన పచ్చుప్పన్నారమ్మణపచ్చుప్పన్నచిత్తసమఙ్గిస్స చిత్తం జానాతి. పచ్చుప్పన్నారమ్మణా పచ్చుప్పన్నా ఖన్ధా చేతోపరియఞాణస్స, ఆవజ్జనాయ ఆరమ్మణపచ్చయేన పచ్చయో. (౧)
పచ్చుప్పన్నారమ్మణో ధమ్మో అతీతారమ్మణస్స ధమ్మస్స ఆరమ్మణపచ్చయేన పచ్చయో – అతీతం దిబ్బం చక్ఖుం పచ్చవేక్ఖతి, దిబ్బం సోతధాతుం పచ్చవేక్ఖతి, పచ్చుప్పన్నారమ్మణం అతీతం ఇద్ధివిధఞాణం పచ్చవేక్ఖతి, చేతోపరియఞాణం పచ్చవేక్ఖతి. అరియా పచ్చుప్పన్నారమ్మణే పహీనే కిలేసే పచ్చవేక్ఖన్తి, విక్ఖమ్భితే కిలేసే పచ్చవేక్ఖన్తి, పుబ్బే సముదాచిణ్ణే కిలేసే జానన్తి. పచ్చుప్పన్నారమ్మణే అతీతే ఖన్ధే అనిచ్చతో…పే… విపస్సతి, అస్సాదేతి అభినన్దతి; తం ఆరబ్భ అతీతారమ్మణో రాగో ఉప్పజ్జతి…పే… దోమనస్సం ఉప్పజ్జతి. పచ్చుప్పన్నారమ్మణా అతీతా ఖన్ధా చేతోపరియఞాణస్స, పుబ్బేనివాసానుస్సతిఞాణస్స, యథాకమ్మూపగఞాణస్స, ఆవజ్జనాయ ఆరమ్మణపచ్చయేన పచ్చయో. (౨)
పచ్చుప్పన్నారమ్మణో ధమ్మో అనాగతారమ్మణస్స ధమ్మస్స ఆరమ్మణపచ్చయేన పచ్చయో – అనాగతం దిబ్బం చక్ఖుం పచ్చవేక్ఖతి, దిబ్బం సోతధాతుం పచ్చవేక్ఖతి, పచ్చుప్పన్నారమ్మణం అనాగతం ఇద్ధివిధఞాణం పచ్చవేక్ఖతి, చేతోపరియఞాణం…పే… పచ్చుప్పన్నారమ్మణే అనాగతే ఖన్ధే అనిచ్చతో…పే… విపస్సతి…పే… తం ఆరబ్భ అనాగతారమ్మణో రాగో ఉప్పజ్జతి…పే… దోమనస్సం ఉప్పజ్జతి. పచ్చుప్పన్నారమ్మణా అనాగతా ఖన్ధా చేతోపరియఞాణస్స, అనాగతంసఞాణస్స, ఆవజ్జనాయ ఆరమ్మణపచ్చయేన పచ్చయో. (౩)
అధిపతిపచ్చయో
౨౩. అతీతారమ్మణో ధమ్మో అతీతారమ్మణస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అతీతం విఞ్ఞాణఞ్చాయతనం గరుం కత్వా పచ్చవేక్ఖతి, నేవసఞ్ఞానాసఞ్ఞాయతనం గరుం కత్వా పచ్చవేక్ఖతి. అతీతారమ్మణం అతీతం ఇద్ధివిధఞాణం గరుం కత్వా పచ్చవేక్ఖతి, చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం గరుం కత్వా పచ్చవేక్ఖతి. అతీతారమ్మణే అతీతే ఖన్ధే గరుం కత్వా అస్సాదేతి అభినన్దతి, తం గరుం కత్వా అతీతారమ్మణో రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – అతీతారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
అతీతారమ్మణో ధమ్మో అనాగతారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – అనాగతం విఞ్ఞాణఞ్చాయతనం గరుం కత్వా…పే… నేవసఞ్ఞానాసఞ్ఞాయతనం …పే… అతీతారమ్మణం అనాగతం ఇద్ధివిధఞాణం గరుం కత్వా…పే… చేతోపరియఞాణం…పే… పుబ్బేనివాసానుస్సతిఞాణం…పే… యథాకమ్మూపగఞాణం…పే… అతీతారమ్మణే అనాగతే ఖన్ధే గరుం కత్వా అస్సాదేతి అభినన్దతి; తం గరుం కత్వా అనాగతారమ్మణో రాగో ఉప్పజ్జతి, దిట్ఠి ఉప్పజ్జతి. (౨)
౨౪. అనాగతారమ్మణో ధమ్మో అనాగతారమ్మణస్స ధమ్మస్స అధిపతిపచ్చయేన పచ్చయో – ఆరమ్మణాధిపతి, సహజాతాధిపతి. ఆరమ్మణాధిపతి – అనాగతారమ్మణం అనాగతం ఇద్ధివిధఞాణం గరుం కత్వా…పే… చేతోపరియఞాణం…పే… అనాగతంసఞాణం గరుం కత్వా పచ్చవేక్ఖతి. అనాగతారమ్మణే అనాగతే ఖన్ధే గరుం కత్వా అస్సాదేతి అభినన్దతి; తం గరుం కత్వా అనాగతారమ్మణో రాగో ఉప్పజ్జతి, దిట్ఠి ఉప్పజ్జతి. సహజాతాధిపతి – అనాగతారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
అనాగతారమ్మణో ధమ్మో అతీతారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – అనాగతారమ్మణం అతీతం ఇద్ధివిధఞాణం గరుం కత్వా…పే… చేతోపరియఞాణం…పే… అనాగతంసఞాణం గరుం కత్వా…పే… అనాగతారమ్మణే అతీతే ఖన్ధే గరుం కత్వా అస్సాదేతి అభినన్దతి; తం గరుం కత్వా అతీతారమ్మణో రాగో ఉప్పజ్జతి, దిట్ఠి ఉప్పజ్జతి. (౨)
౨౫. పచ్చుప్పన్నారమ్మణో ధమ్మో పచ్చుప్పన్నారమ్మణస్స ధమ్మస్స అధిపతిపచ్చయేన పచ్చయో. సహజాతాధిపతి – పచ్చుప్పన్నారమ్మణాధిపతి సమ్పయుత్తకానం ఖన్ధానం అధిపతిపచ్చయేన పచ్చయో. (౧)
పచ్చుప్పన్నారమ్మణో ధమ్మో అతీతారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – అతీతం దిబ్బం చక్ఖుం గరుం కత్వా పచ్చవేక్ఖతి, దిబ్బం సోతధాతుం గరుం కత్వా పచ్చవేక్ఖతి, పచ్చుప్పన్నారమ్మణం అతీతం ఇద్ధివిధఞాణం గరుం కత్వా…పే… చేతోపరియఞాణం గరుం కత్వా…పే… పచ్చుప్పన్నారమ్మణే అతీతే ఖన్ధే గరుం కత్వా అస్సాదేతి అభినన్దతి; తం గరుం కత్వా అతీతారమ్మణో రాగో ఉప్పజ్జతి, దిట్ఠి ఉప్పజ్జతి. (౨)
పచ్చుప్పన్నారమ్మణో ధమ్మో అనాగతారమ్మణస్స ధమ్మస్స అధిపతిపచ్చయేన పచ్చయో. ఆరమ్మణాధిపతి – అనాగతం దిబ్బం చక్ఖుం గరుం కత్వా పచ్చవేక్ఖతి, దిబ్బం సోతధాతుం గరుం కత్వా …పే… పచ్చుప్పన్నారమ్మణం అనాగతం ఇద్ధివిధఞాణం గరుం కత్వా…పే… చేతోపరియఞాణం గరుం కత్వా…పే… పచ్చుప్పన్నారమ్మణే అనాగతే ఖన్ధే గరుం కత్వా అస్సాదేతి అభినన్దతి; తం గరుం కత్వా అనాగతారమ్మణో రాగో ఉప్పజ్జతి, దిట్ఠి ఉప్పజ్జతి. (౩)
అనన్తరపచ్చయో
౨౬. అతీతారమ్మణో ధమ్మో అతీతారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా అతీతారమ్మణా ఖన్ధా పచ్ఛిమానం పచ్ఛిమానం అతీతారమ్మణానం ఖన్ధానం అనన్తరపచ్చయేన పచ్చయో. (౧)
అతీతారమ్మణో ధమ్మో అనాగతారమ్మణస్స ధమ్మస్స అనన్తరపచ్చయేన పచ్చయో – అతీతారమ్మణం భవఙ్గం అనాగతారమ్మణాయ ఆవజ్జనాయ అనన్తరపచ్చయేన పచ్చయో. (౨)
అతీతారమ్మణో ధమ్మో పచ్చుప్పన్నారమ్మణస్స ధమ్మస్స అనన్తరపచ్చయేన పచ్చయో – అతీతారమ్మణం చుతిచిత్తం పచ్చుప్పన్నారమ్మణస్స పటిసన్ధిచిత్తస్స అనన్తరపచ్చయేన పచ్చయో. అతీతారమ్మణం భవఙ్గం పచ్చుప్పన్నారమ్మణాయ ఆవజ్జనాయ అనన్తరపచ్చయేన పచ్చయో. (౩)
౨౭. అనాగతారమ్మణో ధమ్మో అనాగతారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా అనాగతారమ్మణా ఖన్ధా పచ్ఛిమానం పచ్ఛిమానం అనాగతారమ్మణానం ఖన్ధానం అనన్తరపచ్చయేన పచ్చయో. (౧)
అనాగతారమ్మణో ధమ్మో అతీతారమ్మణస్స ధమ్మస్స అనన్తరపచ్చయేన పచ్చయో – అనాగతారమ్మణం ఇద్ధివిధఞాణం అతీతారమ్మణస్స వుట్ఠానస్స…పే… చేతోపరియఞాణం అతీతారమ్మణస్స వుట్ఠానస్స…పే… అనాగతంసఞాణం అతీతారమ్మణస్స వుట్ఠానస్స…పే… అనాగతారమ్మణా ఖన్ధా అతీతారమ్మణస్స వుట్ఠానస్స అనన్తరపచ్చయేన పచ్చయో. (౨)
౨౮. పచ్చుప్పన్నారమ్మణో ధమ్మో పచ్చుప్పన్నారమ్మణస్స ధమ్మస్స అనన్తరపచ్చయేన పచ్చయో – పురిమా పురిమా పచ్చుప్పన్నారమ్మణా ఖన్ధా పచ్ఛిమానం పచ్ఛిమానం పచ్చుప్పన్నారమ్మణానం ఖన్ధానం అనన్తరపచ్చయేన పచ్చయో. పచ్చుప్పన్నారమ్మణం పటిసన్ధిచిత్తం పచ్చుప్పన్నారమ్మణస్స భవఙ్గస్స…పే… పచ్చుప్పన్నారమ్మణం భవఙ్గం పచ్చుప్పన్నారమ్మణస్స భవఙ్గస్స అనన్తరపచ్చయేన పచ్చయో. (౧)
పచ్చుప్పన్నారమ్మణో ధమ్మో అతీతారమ్మణస్స ధమ్మస్స అనన్తరపచ్చయేన పచ్చయో – పచ్చుప్పన్నారమ్మణం పటిసన్ధిచిత్తం అతీతారమ్మణస్స భవఙ్గస్స…పే… పచ్చుప్పన్నారమ్మణం భవఙ్గం అతీతారమ్మణస్స భవఙ్గస్స…పే… పచ్చుప్పన్నారమ్మణా ఖన్ధా అతీతారమ్మణస్స వుట్ఠానస్స అనన్తరపచ్చయేన పచ్చయో. (౨)
సమనన్తరపచ్చయో
౨౯. అతీతారమ్మణో ధమ్మో అతీతారమ్మణస్స ధమ్మస్స సమనన్తరపచ్చయేన పచ్చయో (అనన్తరసదిసం).
సహజాతపచ్చయాది
౩౦. అతీతారమ్మణో ధమ్మో అతీతారమ్మణస్స ధమ్మస్స సహజాతపచ్చయేన పచ్చయో… అఞ్ఞమఞ్ఞపచ్చయేన పచ్చయో… నిస్సయపచ్చయేన పచ్చయో…(తయోపి పచ్చయా పటిచ్చవారసదిసా).
ఉపనిస్సయపచ్చయో
౩౧. అతీతారమ్మణో ధమ్మో అతీతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అతీతారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా అతీతారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౧)
అతీతారమ్మణో ధమ్మో అనాగతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అతీతారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా అనాగతారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౨)
అతీతారమ్మణో ధమ్మో పచ్చుప్పన్నారమ్మణస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – అతీతారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా పచ్చుప్పన్నారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౩)
౩౨. అనాగతారమ్మణో ధమ్మో అనాగతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అనాగతారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా అనాగతారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౧)
అనాగతారమ్మణో ధమ్మో అతీతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – అనాగతారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా అతీతారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౨)
అనాగతారమ్మణో ధమ్మో పచ్చుప్పన్నారమ్మణస్స ధమ్మస్స ఉపనిస్సయపచ్చయేన పచ్చయో. పకతూపనిస్సయో – అనాగతారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా పచ్చుప్పన్నారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౩)
౩౩. పచ్చుప్పన్నారమ్మణో ధమ్మో పచ్చుప్పన్నారమ్మణస్స ధమ్మస్స ఉపనిస్సయపచ్చయేన పచ్చయో – అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చుప్పన్నారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా పచ్చుప్పన్నారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౧)
పచ్చుప్పన్నారమ్మణో ధమ్మో అతీతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, అనన్తరూపనిస్సయో, పకతూపనిస్సయో…పే…. పకతూపనిస్సయో – పచ్చుప్పన్నారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా అతీతారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౨)
పచ్చుప్పన్నారమ్మణో ధమ్మో అనాగతారమ్మణస్స ధమ్మస్స ఉపనిస్సయపచ్చయేన పచ్చయో – ఆరమ్మణూపనిస్సయో, పకతూపనిస్సయో…పే…. పకతూపనిస్సయో – పచ్చుప్పన్నారమ్మణా అనిచ్చానుపస్సనా, దుక్ఖానుపస్సనా, అనత్తానుపస్సనా అనాగతారమ్మణాయ అనిచ్చానుపస్సనాయ, దుక్ఖానుపస్సనాయ, అనత్తానుపస్సనాయ ఉపనిస్సయపచ్చయేన పచ్చయో. (౩)
ఆసేవనపచ్చయో
౩౪. అతీతారమ్మణో ధమ్మో అతీతారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా అతీతారమ్మణా ఖన్ధా పచ్ఛిమానం పచ్ఛిమానం అతీతారమ్మణానం ఖన్ధానం ఆసేవనపచ్చయేన పచ్చయో. (౧)
అనాగతారమ్మణో ధమ్మో అనాగతారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా అనాగతారమ్మణా ఖన్ధా పచ్ఛిమానం పచ్ఛిమానం అనాగతారమ్మణానం ఖన్ధానం ఆసేవనపచ్చయేన పచ్చయో. (౧)
పచ్చుప్పన్నారమ్మణో ధమ్మో పచ్చుప్పన్నారమ్మణస్స ధమ్మస్స ఆసేవనపచ్చయేన పచ్చయో – పురిమా పురిమా పచ్చుప్పన్నారమ్మణా ఖన్ధా పచ్ఛిమానం పచ్ఛిమానం పచ్చుప్పన్నారమ్మణానం ఖన్ధానం ఆసేవనపచ్చయేన పచ్చయో. (౧)
కమ్మపచ్చయో
౩౫. అతీతారమ్మణో ధమ్మో అతీతారమ్మణస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – అతీతారమ్మణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. పటిసన్ధిక్ఖణే…పే…. నానాక్ఖణికా – అతీతారమ్మణా చేతనా విపాకానం అతీతారమ్మణానం ఖన్ధానం కమ్మపచ్చయేన పచ్చయో. (౧)
అతీతారమ్మణో ధమ్మో అనాగతారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – అతీతారమ్మణా చేతనా విపాకానం అనాగతారమ్మణానం ఖన్ధానం కమ్మపచ్చయేన పచ్చయో. (౨)
అతీతారమ్మణో ధమ్మో పచ్చుప్పన్నారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – అతీతారమ్మణా చేతనా విపాకానం పచ్చుప్పన్నారమ్మణానం ఖన్ధానం కమ్మపచ్చయేన పచ్చయో. (౩)
౩౬. అనాగతారమ్మణో ధమ్మో అనాగతారమ్మణస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – అనాగతారమ్మణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. నానాక్ఖణికా – అనాగతారమ్మణా చేతనా విపాకానం అనాగతారమ్మణానం ఖన్ధానం కమ్మపచ్చయేన పచ్చయో. (౧)
అనాగతారమ్మణో ధమ్మో అతీతారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – అనాగతారమ్మణా చేతనా విపాకానం అతీతారమ్మణానం ఖన్ధానం కమ్మపచ్చయేన పచ్చయో. (౨)
అనాగతారమ్మణో ధమ్మో పచ్చుప్పన్నారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – అనాగతారమ్మణా చేతనా విపాకానం పచ్చుప్పన్నారమ్మణానం ఖన్ధానం కమ్మపచ్చయేన పచ్చయో. (౩)
౩౭. పచ్చుప్పన్నారమ్మణో ధమ్మో పచ్చుప్పన్నారమ్మణస్స ధమ్మస్స కమ్మపచ్చయేన పచ్చయో – సహజాతా, నానాక్ఖణికా. సహజాతా – పచ్చుప్పన్నారమ్మణా చేతనా సమ్పయుత్తకానం ఖన్ధానం కమ్మపచ్చయేన పచ్చయో. పటిసన్ధిక్ఖణే…పే… నానాక్ఖణికా – పచ్చుప్పన్నారమ్మణా చేతనా విపాకానం పచ్చుప్పన్నారమ్మణానం ఖన్ధానం కమ్మపచ్చయేన పచ్చయో. (౧)
పచ్చుప్పన్నారమ్మణో ధమ్మో అతీతారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – పచ్చుప్పన్నారమ్మణా చేతనా విపాకానం అతీతారమ్మణానం ఖన్ధానం కమ్మపచ్చయేన పచ్చయో. (౨)
పచ్చుప్పన్నారమ్మణో ధమ్మో అనాగతారమ్మణస్స ధమ్మస్స కమ్మపచ్చయేన పచ్చయో. నానాక్ఖణికా – పచ్చుప్పన్నారమ్మణా చేతనా విపాకానం అనాగతారమ్మణానం ఖన్ధానం కమ్మపచ్చయేన పచ్చయో. (౩)
విపాకపచ్చయాది
౩౮. అతీతారమ్మణో ధమ్మో అతీతారమ్మణస్స ధమ్మస్స విపాకపచ్చయేన పచ్చయో… ఆహారపచ్చయేన పచ్చయో… ఇన్ద్రియపచ్చయేన పచ్చయో… ఝానపచ్చయేన పచ్చయో… మగ్గపచ్చయేన పచ్చయో… సమ్పయుత్తపచ్చయేన పచ్చయో… అత్థిపచ్చయేన పచ్చయో… నత్థిపచ్చయేన పచ్చయో… విగతపచ్చయేన పచ్చయో… అవిగతపచ్చయేన పచ్చయో.
౧. పచ్చయానులోమం
౨. సఙ్ఖ్యావారో
సుద్ధం
౩౯. హేతుయా తీణి, ఆరమ్మణే నవ, అధిపతియా సత్త, అనన్తరే సత్త, సమనన్తరే సత్త, సహజాతే అఞ్ఞమఞ్ఞే నిస్సయే తీణి, ఉపనిస్సయే నవ, ఆసేవనే తీణి, కమ్మే నవ, విపాకే తీణి, ఆహారే తీణి, ఇన్ద్రియే ఝానే మగ్గే సమ్పయుత్తే తీణి, అత్థియా తీణి, నత్థియా సత్త, విగతే సత్త, అవిగతే తీణి (ఏవం గణేతబ్బం).
అనులోమం.
పచ్చనీయుద్ధారో
౪౦. అతీతారమ్మణో ధమ్మో అతీతారమ్మణస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౧)
అతీతారమ్మణో ధమ్మో అనాగతారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౨)
అతీతారమ్మణో ధమ్మో పచ్చుప్పన్నారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౩)
౪౧. అనాగతారమ్మణో ధమ్మో అనాగతారమ్మణస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౧)
అనాగతారమ్మణో ధమ్మో అతీతారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౨)
అనాగతారమ్మణో ధమ్మో పచ్చుప్పన్నారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౩)
౪౨. పచ్చుప్పన్నారమ్మణో ధమ్మో పచ్చుప్పన్నారమ్మణస్స ధమ్మస్స ఆరమ్మణపచ్చయేన పచ్చయో… సహజాతపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౧)
పచ్చుప్పన్నారమ్మణో ధమ్మో అతీతారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౨)
పచ్చుప్పన్నారమ్మణో ధమ్మో అనాగతారమ్మణస్స ధమ్మస్స ఆరమ్మణపచ్చయేన పచ్చయో… ఉపనిస్సయపచ్చయేన పచ్చయో… కమ్మపచ్చయేన పచ్చయో. (౩)
౨. పచ్చయపచ్చనీయం
౨. సఙ్ఖ్యావారో
౪౩. నహేతుయా నవ, నఆరమ్మణే నవ, నఅధిపతియా నవ, నఅనన్తరే నవ, నసమనన్తరే నవ (సంఖిత్తం, సబ్బత్థ నవ), నోవిగతే నవ, నోఅవిగతే నవ (ఏవం గణేతబ్బం).
పచ్చనీయం.
౩. పచ్చయానులోమపచ్చనీయం
హేతుదుకం
౪౪. హేతుపచ్చయా నఆరమ్మణే తీణి, నఅధిపతియా నఅనన్తరే నసమనన్తరే నఉపనిస్సయే నపురేజాతే నపచ్ఛాజాతే నఆసేవనే నకమ్మే నవిపాకే తీణి (సబ్బత్థ తీణి, సంఖిత్తం), నోనత్థియా నోవిగతే తీణి (ఏవం గణేతబ్బం).
అనులోమపచ్చనీయం.
౪. పచ్చయపచ్చనీయానులోమం
నహేతుదుకం
౪౫. నహేతుపచ్చయా ఆరమ్మణే నవ, అధిపతియా సత్త, అనన్తరే సత్త, సమనన్తరే సత్త, సహజాతే తీణి, అఞ్ఞమఞ్ఞే తీణి, నిస్సయే తీణి, ఉపనిస్సయే నవ, ఆసేవనే తీణి, కమ్మే నవ, విపాకే తీణి, ఆహారే ఇన్ద్రియే ఝానే మగ్గే సమ్పయుత్తే అత్థియా తీణి, నత్థియా సత్త, విగతే సత్త, అవిగతే తీణి (ఏవం గణేతబ్బం).
పచ్చనీయానులోమం.
పఞ్హావారో.
అతీతారమ్మణత్తికం నిట్ఠితం.