౧. విభఙ్గవారో

హేతుపచ్చయో

౧. పరిత్తం ధమ్మం పటిచ్చ పరిత్తో ధమ్మో ఉప్పజ్జతి హేతుపచ్చయా – పరిత్తం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే… పటిసన్ధిక్ఖణే పరిత్తం ఏకం ఖన్ధం పటిచ్చ తయో ఖన్ధా కటత్తా చ రూపం…పే… ద్వే ఖన్ధే…పే… ఖన్ధే పటిచ్చ వత్థు, వత్థుం పటిచ్చ ఖన్ధా, ఏకం మహాభూతం పటిచ్చ తయో మహాభూతా…పే… ద్వే మహాభూతే పటిచ్చ చిత్తసముట్ఠానం రూపం…పే…. (౧)

పరిత్తం ధమ్మం పటిచ్చ మహగ్గతో ధమ్మో ఉప్పజ్జతి హేతుపచ్చయా – పటిసన్ధిక్ఖణే వత్థుం పటిచ్చ మహగ్గతా ఖన్ధా. (౨)

పరిత్తం ధమ్మం పటిచ్చ పరిత్తో చ మహగ్గతో చ ధమ్మా ఉప్పజ్జన్తి హేతుపచ్చయా – పటిసన్ధిక్ఖణే వత్థుం పటిచ్చ మహగ్గతా ఖన్ధా, మహాభూతే పటిచ్చ కటత్తారూపం. (౩)

౨. మహగ్గతం ధమ్మం పటిచ్చ మహగ్గతో ధమ్మో ఉప్పజ్జతి హేతుపచ్చయా – మహగ్గతం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧)

మహగ్గతం ధమ్మం పటిచ్చ పరిత్తో ధమ్మో ఉప్పజ్జతి హేతుపచ్చయా – మహగ్గతే ఖన్ధే పటిచ్చ చిత్తసముట్ఠానం రూపం. పటిసన్ధిక్ఖణే మహగ్గతే ఖన్ధే పటిచ్చ కటత్తారూపం. (౨)

మహగ్గతం ధమ్మం పటిచ్చ పరిత్తో చ మహగ్గతో చ ధమ్మా ఉప్పజ్జన్తి హేతుపచ్చయా – మహగ్గతం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… పటిసన్ధిక్ఖణే మహగ్గతం ఏకం ఖన్ధం పటిచ్చ తయో ఖన్ధా కటత్తా చ రూపం…పే… ద్వే ఖన్ధే…పే…. (౩)

౩. అప్పమాణం ధమ్మం పటిచ్చ అప్పమాణో ధమ్మో ఉప్పజ్జతి హేతుపచ్చయా – అప్పమాణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

అప్పమాణం ధమ్మం పటిచ్చ పరిత్తో ధమ్మో ఉప్పజ్జతి హేతుపచ్చయా – అప్పమాణే ఖన్ధే పటిచ్చ చిత్తసముట్ఠానం రూపం. (౨)

అప్పమాణం ధమ్మం పటిచ్చ పరిత్తో చ అప్పమాణో చ ధమ్మా ఉప్పజ్జన్తి హేతుపచ్చయా – అప్పమాణం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

౪. పరిత్తఞ్చ అప్పమాణఞ్చ ధమ్మం పటిచ్చ పరిత్తో ధమ్మో ఉప్పజ్జతి హేతుపచ్చయా – అప్పమాణే ఖన్ధే చ మహాభూతే చ పటిచ్చ చిత్తసముట్ఠానం రూపం. (౧)

పరిత్తఞ్చ మహగ్గతఞ్చ ధమ్మం పటిచ్చ పరిత్తో ధమ్మో ఉప్పజ్జతి హేతుపచ్చయా – మహగ్గతే ఖన్ధే చ మహాభూతే చ పటిచ్చ చిత్తసముట్ఠానం రూపం. పటిసన్ధిక్ఖణే…పే…. (౧)

పరిత్తఞ్చ మహగ్గతఞ్చ ధమ్మం పటిచ్చ మహగ్గతో ధమ్మో ఉప్పజ్జతి హేతుపచ్చయా – పటిసన్ధిక్ఖణే మహగ్గతం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే…పే…. (౨)

పరిత్తఞ్చ మహగ్గతఞ్చ ధమ్మం పటిచ్చ పరిత్తో చ మహగ్గతో చ ధమ్మా ఉప్పజ్జన్తి హేతుపచ్చయా – పటిసన్ధిక్ఖణే మహగ్గతం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే…పే… మహగ్గతే ఖన్ధే చ మహాభూతే చ పటిచ్చ కటత్తారూపం. (౩)

ఆరమ్మణపచ్చయో

౫. పరిత్తం ధమ్మం పటిచ్చ పరిత్తో ధమ్మో ఉప్పజ్జతి ఆరమ్మణపచ్చయా – పరిత్తం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే… వత్థుం పటిచ్చ ఖన్ధా. (౧)

పరిత్తం ధమ్మం పటిచ్చ మహగ్గతో ధమ్మో ఉప్పజ్జతి ఆరమ్మణపచ్చయా – పటిసన్ధిక్ఖణే వత్థుం పటిచ్చ మహగ్గతా ఖన్ధా. (౨)

మహగ్గతం ధమ్మం పటిచ్చ మహగ్గతో ధమ్మో ఉప్పజ్జతి ఆరమ్మణపచ్చయా – మహగ్గతం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే… పటిసన్ధిక్ఖణే…పే…. (౧)

అప్పమాణం ధమ్మం పటిచ్చ అప్పమాణో ధమ్మో ఉప్పజ్జతి ఆరమ్మణపచ్చయా – అప్పమాణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

పరిత్తఞ్చ మహగ్గతఞ్చ ధమ్మం పటిచ్చ మహగ్గతో ధమ్మో ఉప్పజ్జతి ఆరమ్మణపచ్చయా – పటిసన్ధిక్ఖణే మహగ్గతం ఏకం ఖన్ధఞ్చ వత్థుఞ్చ పటిచ్చ తయో ఖన్ధా…పే… ద్వే ఖన్ధే…పే…. (౧)

అధిపతిపచ్చయో

౬. పరిత్తం ధమ్మం పటిచ్చ పరిత్తో ధమ్మో ఉప్పజ్జతి అధిపతిపచ్చయా – పరిత్తం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం, ద్వే ఖన్ధే…పే… ఏకం మహాభూతం పటిచ్చ తయో మహాభూతా…పే… మహాభూతే పటిచ్చ చిత్తసముట్ఠానం రూపం ఉపాదారూపం. (౧)

మహగ్గతం ధమ్మం పటిచ్చ మహగ్గతో ధమ్మో ఉప్పజ్జతి అధిపతిపచ్చయా – మహగ్గతం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

మహగ్గతం ధమ్మం పటిచ్చ పరిత్తో ధమ్మో ఉప్పజ్జతి అధిపతిపచ్చయా – మహగ్గతే ఖన్ధే పటిచ్చ చిత్తసముట్ఠానం రూపం. (౨)

మహగ్గతం ధమ్మం పటిచ్చ పరిత్తో చ మహగ్గతో చ ధమ్మా ఉప్పజ్జన్తి అధిపతిపచ్చయా – మహగ్గతం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

అప్పమాణం ధమ్మం పటిచ్చ అప్పమాణో ధమ్మో ఉప్పజ్జతి అధిపతిపచ్చయా – అప్పమాణం ఏకం ఖన్ధం పటిచ్చ తయో ఖన్ధా…పే… ద్వే ఖన్ధే…పే…. (౧)

అప్పమాణం ధమ్మం పటిచ్చ పరిత్తో ధమ్మో ఉప్పజ్జతి అధిపతిపచ్చయా – అప్పమాణే ఖన్ధే పటిచ్చ చిత్తసముట్ఠానం రూపం. (౨)

అప్పమాణం ధమ్మం పటిచ్చ పరిత్తో చ అప్పమాణో చ ధమ్మా ఉప్పజ్జన్తి అధిపతిపచ్చయా – అప్పమాణం ఏకం ఖన్ధం పటిచ్చ తయో ఖన్ధా చిత్తసముట్ఠానఞ్చ రూపం…పే… ద్వే ఖన్ధే…పే…. (౩)

౭. పరిత్తఞ్చ అప్పమాణఞ్చ ధమ్మం పటిచ్చ పరిత్తో ధమ్మో ఉప్పజ్జతి అధిపతిపచ్చయా – అప్పమాణే ఖన్ధే చ మహాభూతే చ పటిచ్చ చిత్తసముట్ఠానం రూపం. (౧)

పరిత్తఞ్చ మహగ్గతఞ్చ ధమ్మం పటిచ్చ పరిత్తో ధమ్మో ఉప్పజ్జతి అధిపతిపచ్చయా – మహగ్గతే ఖన్ధే చ మహాభూతే చ పటిచ్చ చిత్తసముట్ఠానం రూపం. (౧)

అనన్తరపచ్చయాది

౮. పరిత్తం ధమ్మం పటిచ్చ పరిత్తో ధమ్మో ఉప్పజ్జతి అనన్తరపచ్చయా… సమనన్తరపచ్చయా… సహజాతపచ్చయా (సబ్బేపి మహాభూతా కాతబ్బా)… అఞ్ఞమఞ్ఞపచ్చయా… నిస్సయపచ్చయా… ఉపనిస్సయపచ్చయా … పురేజాతపచ్చయా (తిస్సో పఞ్హా కాతబ్బా)… ఆసేవనపచ్చయా (తిస్సో పఞ్హా కాతబ్బా)… కమ్మపచ్చయా… విపాకపచ్చయా (తేరస పఞ్హా)… ఆహారపచ్చయా… ఇన్ద్రియపచ్చయా… ఝానపచ్చయా… మగ్గపచ్చయా,… సమ్పయుత్తపచ్చయా… విప్పయుత్తపచ్చయా… అత్థిపచ్చయా… నత్థిపచ్చయా… విగతపచ్చయా… అవిగతపచ్చయా.

౧. పచ్చయానులోమం

౨. సఙ్ఖ్యావారో

౯. హేతుయా తేరస, ఆరమ్మణే పఞ్చ, అధిపతియా నవ, అనన్తరే పఞ్చ, సమనన్తరే పఞ్చ, సహజాతే తేరస, అఞ్ఞమఞ్ఞే సత్త, నిస్సయే తేరస, ఉపనిస్సయే పఞ్చ, పురేజాతే తీణి, ఆసేవనే తీణి, కమ్మే తేరస, విపాకే తేరస, ఆహారే ఇన్ద్రియే ఝానే మగ్గే తేరస, సమ్పయుత్తే పఞ్చ, విప్పయుత్తే తేరస, అత్థియా తేరస, నత్థియా పఞ్చ, విగతే పఞ్చ, అవిగతే తేరస.

అనులోమం.