౯. హేవత్థికథా

౩౦౪. అతీతం అత్థీతి? హేవత్థి, హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో, నత్థట్ఠో అత్థట్ఠో, అత్థిభావో నత్థిభావో, నత్థిభావో అత్థిభావో, అత్థీతి వా నత్థీతి వా, నత్థీతి వా అత్థీతి వా ఏసేసే ఏకట్ఠే సమే సమభాగే తజ్జాతేతి? న హేవం వత్తబ్బే…పే….

అనాగతం అత్థీతి? హేవత్థి, హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో, నత్థట్ఠో అత్థట్ఠో, అత్థిభావో నత్థిభావో, నత్థిభావో అత్థిభావో, అత్థీతి వా నత్థీతి వా, నత్థీతి వా అత్థీతి వా ఏసేసే ఏకట్ఠే సమే సమభాగే తజ్జాతేతి? న హేవం వత్తబ్బే…పే….

పచ్చుప్పన్నం అత్థీతి? హేవత్థి, హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో…పే… సమే సమభాగే తజ్జాతేతి? న హేవం వత్తబ్బే…పే….

౩౦౫. అతీతం హేవత్థి, హేవ నత్థీతి? ఆమన్తా. కిన్తత్థి, కిన్తి నత్థీతి? అతీతం అతీతన్తి హేవత్థి, అతీతం అనాగతన్తి హేవ నత్థి, అతీతం పచ్చుప్పన్నన్తి హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో, నత్థట్ఠో అత్థట్ఠో, అత్థిభావో నత్థిభావో, నత్థిభావో అత్థిభావో, అత్థీతి వా నత్థీతి వా, నత్థీతి వా అత్థీతి వా ఏసేసే ఏకట్ఠే సమే సమభాగే తజ్జాతేతి? న హేవం వత్తబ్బే…పే….

అనాగతం హేవత్థి, హేవ నత్థీతి? ఆమన్తా. కిన్తత్థి, కిన్తి నత్థీతి? అనాగతం అనాగతన్తి హేవత్థి, అనాగతం అతీతన్తి హేవ నత్థి, అనాగతం పచ్చుప్పన్నన్తి హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో, నత్థట్ఠో అత్థట్ఠో…పే… సమే సమభాగే తజ్జాతేతి? న హేవం వత్తబ్బే…పే….

పచ్చుప్పన్నం హేవత్థి, హేవ నత్థీతి? ఆమన్తా. కిన్తత్థి, కిన్తి నత్థీతి? పచ్చుప్పన్నం పచ్చుప్పన్నన్తి హేవత్థి, పచ్చుప్పన్నం అతీతన్తి హేవ నత్థి, పచ్చుప్పన్నం అనాగతన్తి హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో…పే… సమే సమభాగే తజ్జాతేతి? న హేవం వత్తబ్బే…పే….

న వత్తబ్బం – ‘‘అతీతం హేవత్థి, హేవ నత్థి; అనాగతం హేవత్థి, హేవ నత్థి; పచ్చుప్పన్నం హేవత్థి, హేవ నత్థీ’’తి? ఆమన్తా. అతీతం అనాగతన్తి హేవత్థి, అతీతం పచ్చుప్పన్నన్తి హేవత్థి, అనాగతం అతీతన్తి హేవత్థి, అనాగతం పచ్చుప్పన్నన్తి హేవత్థి, పచ్చుప్పన్నం అతీతన్తి హేవత్థి, పచ్చుప్పన్నం అనాగతన్తి హేవత్థీతి? న హేవం వత్తబ్బే.…పే…. తేన హి అతీతం హేవత్థి హేవ నత్థి, అనాగతం హేవత్థి హేవ నత్థి, పచ్చుప్పన్నం హేవత్థి, హేవ నత్థీతి.

౩౦౬. రూపం అత్థీతి? హేవత్థి, హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో, నత్థట్ఠో అత్థట్ఠో, అత్థిభావో నత్థిభావో, నత్థిభావో అత్థిభావో, అత్థీతి వా నత్థీతి వా, నత్థీతి వా అత్థీతి వా ఏసేసే ఏకట్ఠే సమే సమభాగే తజ్జాతేతి? న హేవం వత్తబ్బే…పే….

వేదనా… సఞ్ఞా… సఙ్ఖారా… విఞ్ఞాణం అత్థీతి? హేవత్థి, హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో…పే… సమే సమభాగే తజ్జాతేతి? న హేవం వత్తబ్బే…పే….

రూపం హేవత్థి, హేవ నత్థీతి? ఆమన్తా. కిన్తత్థి, కిన్తి నత్థీతి? రూపం రూపన్తి హేవత్థి, రూపం వేదనాతి హేవం నత్థి…పే… రూపం సఞ్ఞాతి హేవ నత్థి…పే… రూపం సఙ్ఖారాతి హేవ నత్థి…పే… రూపం విఞ్ఞాణన్తి హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో…పే… సమే సమభాగే తజ్జాతేతి? న హేవం వత్తబ్బే…పే….

వేదనా… సఞ్ఞా… సఙ్ఖారా… విఞ్ఞాణం హేవత్థి, హేవ నత్థీతి? ఆమన్తా. కిన్తత్థి, కిన్తి నత్థీతి? విఞ్ఞాణం విఞ్ఞాణన్తి హేవత్థి. విఞ్ఞాణం రూపన్తి హేవ నత్థి…పే… విఞ్ఞాణం వేదనాతి హేవ నత్థి…పే… విఞ్ఞాణం సఞ్ఞాతి హేవ నత్థి…పే… విఞ్ఞాణం సఙ్ఖారాతి హేవ నత్థీతి. సేవత్థి, సేవ నత్థీతి? న హేవం వత్తబ్బే…పే… సేవత్థి, సేవ నత్థీతి? ఆమన్తా. అత్థట్ఠో నత్థట్ఠో…పే… సమే సమభాగే తజ్జాతేతి? న హేవం వత్తబ్బే…పే….

న వత్తబ్బం – ‘‘రూపం హేవత్థి, హేవ నత్థీతి; వేదనా… సఞ్ఞా… సఙ్ఖారా… విఞ్ఞాణం హేవత్థి, హేవ నత్థీతి? ఆమన్తా. రూపం వేదనాతి హేవత్థి…పే… రూపం సఞ్ఞాతి హేవత్థి…పే… రూపం సఙ్ఖారాతి హేవత్థి…పే… రూపం విఞ్ఞాణన్తి హేవత్థి… వేదనా… సఞ్ఞా … సఙ్ఖారా… విఞ్ఞాణం రూపన్తి హేవత్థి… విఞ్ఞాణం వేదనాతి హేవత్థి… విఞ్ఞాణం సఞ్ఞాతి హేవత్థి… విఞ్ఞాణం సఙ్ఖారాతి హేవత్థీతి? న హేవం వత్తబ్బే…పే… తేన హి రూపం హేవత్థి, హేవ నత్థి; వేదనా… సఞ్ఞా… సఙ్ఖారా… విఞ్ఞాణం హేవత్థి, హేవ నత్థీతి.

హేవత్థికథా నిట్ఠితా.

తస్సుద్దానం –

ఉపలబ్భో పరిహాని, బ్రహ్మచరియవాసో ఓధిసో;

పరిఞ్ఞా కామరాగప్పహానం, సబ్బత్థివాదో ఆయతనం;

అతీతానాగతో సుభఙ్గో [అతీతానాగతేసు భాగో (స్యా.)], సబ్బే ధమ్మా సతిపట్ఠానా.

హేవత్థి హేవ నత్థీతి.

పఠమవగ్గో

మహావగ్గో.