౬. అతీతక్ఖన్ధాదికథా

౧. నసుత్తసాధనం

౨౯౭. అతీతం ఖన్ధాతి? ఆమన్తా. అతీతం అత్థీతి? న హేవం వత్తబ్బే…పే… అతీతం ఆయతనన్తి? ఆమన్తా. అతీతం అత్థీతి? న హేవం వత్తబ్బే…పే… అతీతం ధాతూతి? ఆమన్తా. అతీతం అత్థీతి? న హేవం వత్తబ్బే…పే… అతీతం ఖన్ధా ధాతు ఆయతనన్తి [ఖన్ధధాతుఆయతనన్తి (స్యా.)]? ఆమన్తా. అతీతం అత్థీతి? న హేవం వత్తబ్బే…పే….

అనాగతం ఖన్ధాతి? ఆమన్తా. అనాగతం అత్థీతి? న హేవం వత్తబ్బే…పే… అనాగతం ఆయతనన్తి? ఆమన్తా. అనాగతం అత్థీతి? న హేవం వత్తబ్బే…పే… అనాగతం ధాతూతి? ఆమన్తా. అనాగతం అత్థీతి? న హేవం వత్తబ్బే…పే… అనాగతం ఖన్ధా ధాతు ఆయతనన్తి? ఆమన్తా. అనాగతం అత్థీతి? న హేవం వత్తబ్బే…పే….

పచ్చుప్పన్నం ఖన్ధా పచ్చుప్పన్నం అత్థీతి? ఆమన్తా. అతీతం ఖన్ధా అతీతం అత్థీతి? న హేవం వత్తబ్బే…పే… పచ్చుప్పన్నం ఆయతనం పచ్చుప్పన్నం అత్థీతి? ఆమన్తా. అతీతం ఆయతనం అతీతం అత్థీతి? న హేవం వత్తబ్బే…పే… పచ్చుప్పన్నం ధాతు పచ్చుప్పన్నం అత్థీతి? ఆమన్తా. అతీతం ధాతు అతీతం అత్థీతి? న హేవం వత్తబ్బే…పే… పచ్చుప్పన్నం ఖన్ధా ధాతు ఆయతనం పచ్చుప్పన్నం అత్థీతి? ఆమన్తా. అతీతం ఖన్ధా ధాతు ఆయతనం అతీతం అత్థీతి? న హేవం వత్తబ్బే…పే….

పచ్చుప్పన్నం ఖన్ధా పచ్చుప్పన్నం అత్థీతి? ఆమన్తా. అనాగతం ఖన్ధా అనాగతం అత్థీతి? న హేవం వత్తబ్బే…పే… పచ్చుప్పన్నం ఆయతనం పచ్చుప్పన్నం అత్థీతి? ఆమన్తా. అనాగతం ఆయతనం అనాగతం అత్థీతి? న హేవం వత్తబ్బే…పే… పచ్చుప్పన్నం ధాతు పచ్చుప్పన్నం అత్థీతి? ఆమన్తా. అనాగతం ధాతు అనాగతం అత్థీతి? న హేవం వత్తబ్బే…పే… పచ్చుప్పన్నం ఖన్ధా ధాతు ఆయతనం పచ్చుప్పన్నం అత్థీతి? ఆమన్తా. అనాగతం ఖన్ధా ధాతు ఆయతనం అనాగతం అత్థీతి? న హేవం వత్తబ్బే…పే….

అతీతం ఖన్ధా అతీతం నత్థీతి? ఆమన్తా. పచ్చుప్పన్నం ఖన్ధా పచ్చుప్పన్నం నత్థీతి? న హేవం వత్తబ్బే…పే… అతీతం ఆయతనం అతీతం నత్థీతి? ఆమన్తా. పచ్చుప్పన్నం ఆయతనం పచ్చుప్పన్నం నత్థీతి? న హేవం వత్తబ్బే…పే… అతీతం ధాతు అతీతం నత్థీతి? ఆమన్తా. పచ్చుప్పన్నం ధాతు పచ్చుప్పన్నం నత్థీతి? న హేవం వత్తబ్బే…పే… అతీతం ఖన్ధా ధాతు ఆయతనం అతీతం నత్థీతి? ఆమన్తా. పచ్చుప్పన్నం ఖన్ధా ధాతు ఆయతనం పచ్చుప్పన్నం నత్థీతి? న హేవం వత్తబ్బే…పే….

అనాగతం ఖన్ధా అనాగతం నత్థీతి? ఆమన్తా. పచ్చుప్పన్నం ఖన్ధా పచ్చుప్పన్నం నత్థీతి? న హేవం వత్తబ్బే…పే… అనాగతం ఆయతనం…పే… అనాగతం ధాతు…పే… అనాగతం ఖన్ధా ధాతు ఆయతనం అనాగతం నత్థీతి? ఆమన్తా. పచ్చుప్పన్నం ఖన్ధా ధాతు ఆయతనం పచ్చుప్పన్నం నత్థీతి? న హేవం వత్తబ్బే…పే….

అతీతం రూపం ఖన్ధోతి? ఆమన్తా. అతీతం రూపం అత్థీతి? న హేవం వత్తబ్బే…పే… అతీతం రూపం ఆయతనన్తి? ఆమన్తా. అతీతం రూపం అత్థీతి? న హేవం వత్తబ్బే…పే… అతీతం రూపం ధాతూతి? ఆమన్తా. అతీతం రూపం అత్థీతి? న హేవం వత్తబ్బే…పే… అతీతం రూపం ఖన్ధా ధాతు ఆయతనన్తి? ఆమన్తా. అతీతం రూపం అత్థీతి? న హేవం వత్తబ్బే…పే….

అనాగతం రూపం ఖన్ధోతి? ఆమన్తా. అనాగతం రూపం అత్థీతి? న హేవం వత్తబ్బే…పే… అనాగతం రూపం ఆయతనం…పే… అనాగతం రూపం ధాతు…పే… అనాగతం రూపం ఖన్ధా ధాతు ఆయతనన్తి? ఆమన్తా. అనాగతం రూపం అత్థీతి? న హేవం వత్తబ్బే…పే….

పచ్చుప్పన్నం రూపం ఖన్ధో పచ్చుప్పన్నం రూపం అత్థీతి? ఆమన్తా. అతీతం రూపం ఖన్ధో అతీతం రూపం అత్థీతి? న హేవం వత్తబ్బే…పే… పచ్చుప్పన్నం రూపం ఆయతనం…పే… పచ్చుప్పన్నం రూపం ధాతు…పే… పచ్చుప్పన్నం రూపం ఖన్ధా ధాతు ఆయతనం పచ్చుప్పన్నం రూపం అత్థీతి? ఆమన్తా. అతీతం రూపం ఖన్ధా ధాతు ఆయతనం అతీతం రూపం అత్థీతి? న హేవం వత్తబ్బే…పే….

పచ్చుప్పన్నం రూపం ఖన్ధో పచ్చుప్పన్నం రూపం అత్థీతి? ఆమన్తా. అనాగతం రూపం ఖన్ధో అనాగతం రూపం అత్థీతి? న హేవం వత్తబ్బే…పే… పచ్చుప్పన్నం రూపం ఆయతనం…పే… పచ్చుప్పన్నం రూపం ధాతు…పే… పచ్చుప్పన్నం రూపం ఖన్ధా ధాతు ఆయతనం పచ్చుప్పన్నం రూపం అత్థీతి? ఆమన్తా. అనాగతం రూపం ఖన్ధా ధాతు ఆయతనం అనాగతం రూపం అత్థీతి? న హేవం వత్తబ్బే…పే….

అతీతం రూపం ఖన్ధో అతీతం రూపం నత్థీతి? ఆమన్తా. పచ్చుప్పన్నం రూపం ఖన్ధో పచ్చుప్పన్నం రూపం నత్థీతి? న హేవం వత్తబ్బే…పే… అతీతం రూపం ఆయతనం…పే… అతీతం రూపం ధాతు…పే… అతీతం రూపం ఖన్ధా ధాతు ఆయతనం అతీతం రూపం నత్థీతి? ఆమన్తా. పచ్చుప్పన్నం రూపం ఖన్ధా ధాతు ఆయతనం పచ్చుప్పన్నం రూపం నత్థీతి? న హేవం వత్తబ్బే…పే….

అనాగతం రూపం ఖన్ధో అనాగతం రూపం నత్థీతి? ఆమన్తా. పచ్చుప్పన్నం రూపం ఖన్ధో పచ్చుప్పన్నం రూపం నత్థీతి? న హేవం వత్తబ్బే…పే… అనాగతం రూపం ఆయతనం…పే… అనాగతం రూపం ధాతు…పే… అనాగతం రూపం ఖన్ధా ధాతు ఆయతనం అనాగతం రూపం నత్థీతి? ఆమన్తా. పచ్చుప్పన్నం రూపం ఖన్ధా ధాతు ఆయతనం పచ్చుప్పన్నం రూపం నత్థీతి? న హేవం వత్తబ్బే…పే….

అతీతా వేదనా… అతీతా సఞ్ఞా… అతీతా సఙ్ఖారా… అతీతం విఞ్ఞాణం ఖన్ధోతి? ఆమన్తా. అతీతం విఞ్ఞాణం అత్థీతి? న హేవం వత్తబ్బే…పే… అతీతం విఞ్ఞాణం ఆయతనం …పే… అతీతం విఞ్ఞాణం ధాతు…పే… అతీతం విఞ్ఞాణం ఖన్ధా ధాతు ఆయతనన్తి? ఆమన్తా. అతీతం విఞ్ఞాణం అత్థీతి? న హేవం వత్తబ్బే…పే….

అనాగతం విఞ్ఞాణం ఖన్ధోతి? ఆమన్తా. అనాగతం విఞ్ఞాణం అత్థీతి? న హేవం వత్తబ్బే…పే… అనాగతం విఞ్ఞాణం ఆయతనం…పే… అనాగతం విఞ్ఞాణం ధాతు…పే… అనాగతం విఞ్ఞాణం ఖన్ధా ధాతు ఆయతనన్తి? ఆమన్తా. అనాగతం విఞ్ఞాణం అత్థీతి? న హేవం వత్తబ్బే…పే….

పచ్చుప్పన్నం విఞ్ఞాణం ఖన్ధో పచ్చుప్పన్నం విఞ్ఞాణం అత్థీతి? ఆమన్తా. అతీతం విఞ్ఞాణం ఖన్ధో అతీతం విఞ్ఞాణం అత్థీతి? న హేవం వత్తబ్బే…పే… పచ్చుప్పన్నం విఞ్ఞాణం ఆయతనం…పే… పచ్చుప్పన్నం విఞ్ఞాణం ధాతు…పే… పచ్చుప్పన్నం విఞ్ఞాణం ఖన్ధా ధాతు ఆయతనం పచ్చుప్పన్నం విఞ్ఞాణం అత్థీతి? ఆమన్తా. అతీతం విఞ్ఞాణం ఖన్ధా ధాతు ఆయతనం అతీతం విఞ్ఞాణం అత్థీతి? న హేవం వత్తబ్బే…పే….

పచ్చుప్పన్నం విఞ్ఞాణం ఖన్ధో పచ్చుప్పన్నం విఞ్ఞాణం అత్థీతి? ఆమన్తా. అనాగతం విఞ్ఞాణం ఖన్ధో అనాగతం విఞ్ఞాణం అత్థీతి? న హేవం వత్తబ్బే…పే… పచ్చుప్పన్నం విఞ్ఞాణం ఆయతనం…పే… పచ్చుప్పన్నం విఞ్ఞాణం ధాతు…పే… పచ్చుప్పన్నం విఞ్ఞాణం ఖన్ధా ధాతు ఆయతనం పచ్చుప్పన్నం విఞ్ఞాణం అత్థీతి? ఆమన్తా. అనాగతం విఞ్ఞాణం ఖన్ధా ధాతు ఆయతనం అనాగతం విఞ్ఞాణం అత్థీతి? న హేవం వత్తబ్బే…పే….

అతీతం విఞ్ఞాణం ఖన్ధో అతీతం విఞ్ఞాణం నత్థీతి? ఆమన్తా. పచ్చుప్పన్నం విఞ్ఞాణం ఖన్ధో పచ్చుప్పన్నం విఞ్ఞాణం నత్థీతి? న హేవం వత్తబ్బే…పే… అతీతం విఞ్ఞాణం ఆయతనం…పే… అతీతం విఞ్ఞాణం ధాతు…పే… అతీతం విఞ్ఞాణం ఖన్ధా ధాతు ఆయతనం అతీతం విఞ్ఞాణం నత్థీతి? ఆమన్తా. పచ్చుప్పన్నం విఞ్ఞాణం ఖన్ధా ధాతు ఆయతనం పచ్చుప్పన్నం విఞ్ఞాణం నత్థీతి? న హేవం వత్తబ్బే…పే… అనాగతం విఞ్ఞాణం ఖన్ధో అనాగతం విఞ్ఞాణం నత్థీతి? ఆమన్తా. పచ్చుప్పన్నం విఞ్ఞాణం ఖన్ధో పచ్చుప్పన్నం విఞ్ఞాణం నత్థీతి? న హేవం వత్తబ్బే…పే… అనాగతం విఞ్ఞాణం ఆయతనం…పే… అనాగతం విఞ్ఞాణం ధాతు…పే… అనాగతం విఞ్ఞాణం ఖన్ధా ధాతు ఆయతనం అనాగతం విఞ్ఞాణం నత్థీతి? ఆమన్తా. పచ్చుప్పన్నం విఞ్ఞాణం ఖన్ధా ధాతు ఆయతనం పచ్చుప్పన్నం విఞ్ఞాణం నత్థీతి? న హేవం వత్తబ్బే…పే….

౨. సుత్తసాధనం

౨౯౮. న వత్తబ్బం – ‘‘అతీతానాగతా ఖన్ధా ధాతు ఆయతనం నత్థి చేతే’’తి? ఆమన్తా. నను వుత్తం భగవతా – ‘‘తయోమే, భిక్ఖవే, నిరుత్తిపథా అధివచనపథా పఞ్ఞత్తి…పే… విఞ్ఞూహీతి…పే…’’. అత్థేవ సుత్తన్తోతి? ఆమన్తా. తేన హి న వత్తబ్బం – ‘‘అతీతానాగతా ఖన్ధా ధాతు ఆయతనం నత్థి చేతే’’తి.

అతీతానాగతా ఖన్ధా ధాతు ఆయతనం నత్థి చేతేతి? ఆమన్తా. నను వుత్తం భగవతా – ‘‘యం కిఞ్చి, భిక్ఖవే, రూపం అతీతానాగతపచ్చుప్పన్నం అజ్ఝత్తం వా బహిద్ధా వా ఓళారికం వా సుఖుమం వా హీనం వా పణీతం వా యం దూరే సన్తికే వా, అయం వుచ్చతి రూపక్ఖన్ధో. యా కాచి వేదనా… యా కాచి సఞ్ఞా… యే కేచి సఙ్ఖారా… యం కిఞ్చి విఞ్ఞాణం అతీతానాగతపచ్చుప్పన్నం…పే… అయం వుచ్చతి విఞ్ఞాణక్ఖన్ధో’’తి. అత్థేవ సుత్తన్తోతి? ఆమన్తా. తేన హి న వత్తబ్బం – ‘‘అతీతానాగతా ఖన్ధా ధాతు ఆయతనం నత్థి చేతే’’తి.

అతీతక్ఖన్ధాదికథా నిట్ఠితా.