౨౦. వీసతిమవగ్గో
(౧౯౪) ౧. అసఞ్చిచ్చకథా
౮౫౭. అసఞ్చిచ్చ మాతరం జీవితా వోరోపేత్వా ఆనన్తరికో హోతీతి? ఆమన్తా. అసఞ్చిచ్చ పాణం హన్త్వా పాణాతిపాతీ హోతీతి? న హేవం వత్తబ్బే…పే… అసఞ్చిచ్చ మాతరం జీవితా వోరోపేత్వా ఆనన్తరికో హోతీతి? ఆమన్తా. అసఞ్చిచ్చ అదిన్నం ఆదియిత్వా…పే… ముసా భణిత్వా ముసావాదీ హోతీతి? న హేవం వత్తబ్బే…పే….
అసఞ్చిచ్చ పాణం హన్త్వా పాణాతిపాతీ న హోతీతి? ఆమన్తా. అసఞ్చిచ్చ మాతరం జీవితా వోరోపేత్వా ఆనన్తరికో న హోతీతి? న హేవం వత్తబ్బే…పే… అసఞ్చిచ్చ అదిన్నం ఆదియిత్వా…పే… ముసా భణిత్వా ముసావాదీ న హోతీతి? ఆమన్తా. అసఞ్చిచ్చ మాతరం జీవితా వోరోపేత్వా ఆనన్తరికో న హోతీతి? న హేవం వత్తబ్బే…పే….
౮౫౮. అసఞ్చిచ్చ మాతరం జీవితా వోరోపేత్వా ఆనన్తరికో హోతీతి? ఆమన్తా. ‘‘అసఞ్చిచ్చ మాతరం జీవితా వోరోపేత్వా ఆనన్తరికో హోతీ’’తి – అత్థేవ సుత్తన్తోతి? నత్థి. ‘‘సఞ్చిచ్చ మాతరం జీవితా వోరోపేత్వా ఆనన్తరికో హోతీ’’తి – అత్థేవ సుత్తన్తోతి? ఆమన్తా. హఞ్చి ‘‘సఞ్చిచ్చ మాతరం జీవితా వోరోపేత్వా ఆనన్తరికో హోతీ’’తి – అత్థేవ సుత్తన్తో, నో చ వత రే వత్తబ్బే – ‘‘అసఞ్చిచ్చ మాతరం జీవితా వోరోపేత్వా ఆనన్తరికో హోతీ’’తి.
౮౫౯. న వత్తబ్బం – ‘‘మాతుఘాతకో ఆనన్తరికో’’తి? ఆమన్తా. నను మాతా జీవితా వోరోపితాతి? ఆమన్తా. హఞ్చి మాతా జీవితా వోరోపితా, తేన వత రే వత్తబ్బే – ‘‘మాతుఘాతకో ఆనన్తరికో’’తి.
న వత్తబ్బం – ‘‘పితుఘాతకో ఆనన్తరికో’’తి? ఆమన్తా. నను పితా జీవితా వోరోపితోతి? ఆమన్తా. హఞ్చి పితా జీవితా వోరోపితో, తేన వత రే వత్తబ్బే – ‘‘పితుఘాతకో ఆనన్తరికో’’తి.
న వత్తబ్బం – ‘‘అరహన్తఘాతకో ఆనన్తరికో’’తి? ఆమన్తా. నను అరహా జీవితా వోరోపితోతి? ఆమన్తా. హఞ్చి అరహా జీవితా వోరోపితో, తేన వత రే వత్తబ్బే – ‘‘అరహన్తఘాతకో ఆనన్తరికో’’తి.
న వత్తబ్బం – ‘‘రుహిరుప్పాదకో ఆనన్తరికో’’తి? ఆమన్తా. నను తథాగతస్స లోహితం ఉప్పాదితన్తి? ఆమన్తా. హఞ్చి తథాగతస్స లోహితం ఉప్పాదితం, తేన వత రే వత్తబ్బే – ‘‘రుహిరుప్పాదకో ఆనన్తరికో’’తి.
౮౬౦. సఙ్ఘభేదకో ఆనన్తరికోతి? ఆమన్తా. సబ్బే సఙ్ఘభేదకా ఆనన్తరికాతి? న హేవం వత్తబ్బే…పే… సబ్బే సఙ్ఘభేదకా ఆనన్తరికాతి? ఆమన్తా. ధమ్మసఞ్ఞీ సఙ్ఘభేదకో ఆనన్తరికోతి? న హేవం వత్తబ్బే…పే….
౮౬౧. ధమ్మసఞ్ఞీ సఙ్ఘభేదకో ఆనన్తరికోతి? ఆమన్తా. నను వుత్తం భగవతా – ‘‘అత్థుపాలి, సఙ్ఘభేదకో ఆపాయికో నేరయికో కప్పట్ఠో అతేకిచ్ఛో; అత్థుపాలి, సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో’’తి! అత్థేవ సుత్తన్తోతి? ఆమన్తా. తేన హి న వత్తబ్బం – ‘‘ధమ్మసఞ్ఞీ సఙ్ఘభేదకో ఆనన్తరికో’’తి.
౮౬౨. న వత్తబ్బం – ‘‘ధమ్మసఞ్ఞీ సఙ్ఘభేదకో ఆనన్తరికో’’తి? ఆమన్తా. నను వుత్తం భగవతా –
‘‘ఆపాయికో నేరయికో, కప్పట్ఠో సఙ్ఘభేదకో;
వగ్గరతో అధమ్మట్ఠో, యోగక్ఖేమా పధంసతి;
సఙ్ఘం సమగ్గం భేత్వాన, కప్పం నిరయమ్హి పచ్చతీ’’తి [చూళవ. ౩౫౪; అ. ని. ౧౦.౩౯; ఇతివు. ౧౮].
అత్థేవ సుత్తన్తోతి? ఆమన్తా. తేన హి సఙ్ఘభేదకో ఆనన్తరికోతి.
అసఞ్చిచ్చకథా నిట్ఠితా.
౨౦. వీసతిమవగ్గో
(౧౯౫) ౨. ఞాణకథా
౮౬౩. నత్థి పుథుజ్జనస్స ఞాణన్తి? ఆమన్తా. నత్థి పుథుజ్జనస్స పఞ్ఞా పజాననా విచయో పవిచయో ధమ్మవిచయో సల్లక్ఖణా ఉపలక్ఖణా పచ్చుపలక్ఖణాతి? న హేవం వత్తబ్బే…పే… నను అత్థి పుథుజ్జనస్స పఞ్ఞా పజాననా విచయో…పే… పచ్చుపలక్ఖణాతి? ఆమన్తా. హఞ్చి అత్థి పుథుజ్జనస్స పఞ్ఞా పజాననా విచయో…పే… పచ్చుపలక్ఖణా, నో చ వత రే వత్తబ్బే – ‘‘నత్థి పుథుజ్జనస్స ఞాణ’’న్తి.
౮౬౪. నత్థి పుథుజ్జనస్స ఞాణన్తి? ఆమన్తా. పుథుజ్జనో పఠమం ఝానం సమాపజ్జేయ్యాతి? ఆమన్తా. హఞ్చి పుథుజ్జనో పఠమం ఝానం సమాపజ్జేయ్య, నో చ వత రే వత్తబ్బే – ‘‘నత్థి పుథుజ్జనస్స ఞాణ’’న్తి.
పుథుజ్జనో దుతియం ఝానం…పే… తతియం ఝానం…పే… చతుత్థం ఝానం…పే… ఆకాసానఞ్చాయతనం సమాపజ్జేయ్య, విఞ్ఞాణఞ్చాయతనం ఆకిఞ్చఞ్ఞాయతనం నేవసఞ్ఞానాసఞ్ఞాయతనం సమాపజ్జేయ్య, పుథుజ్జనో దానం దదేయ్య …పే… చీవరం దదేయ్య, పిణ్డపాతం దదేయ్య, సేనాసనం దదేయ్య, గిలానపచ్చయభేసజ్జపరిక్ఖారం దదేయ్యాతి? ఆమన్తా. హఞ్చి పుథుజ్జనో గిలానపచ్చయభేసజ్జపరిక్ఖారం దదేయ్య, నో చ వత రే వత్తబ్బే – నత్థి పుథుజ్జనస్స ఞాణ’’న్తి.
౮౬౫. అత్థి పుథుజ్జనస్స ఞాణన్తి? ఆమన్తా. పుథుజ్జనో తేన ఞాణేన దుక్ఖం పరిజానాతి, సముదయం పజహతి, నిరోధం సచ్ఛికరోతి, మగ్గం భావేతీతి? న హేవం వత్తబ్బే…పే….
ఞాణకథా నిట్ఠితా.
౨౦. వీసతిమవగ్గో
(౧౯౬) ౩. నిరయపాలకథా
౮౬౬. నత్థి నిరయేసు నిరయపాలాతి? ఆమన్తా. నత్థి నిరయేసు కమ్మకారణాతి? న హేవం వత్తబ్బే…పే… అత్థి నిరయేసు కమ్మకారణాతి? ఆమన్తా. అత్థి నిరయేసు నిరయపాలాతి? న హేవం వత్తబ్బే…పే….
అత్థి మనుస్సేసు కమ్మకారణా, అత్థి చ కారణికాతి? ఆమన్తా. అత్థి నిరయేసు కమ్మకారణా, అత్థి చ కారణికాతి? న హేవం వత్తబ్బే…పే… అత్థి నిరయేసు కమ్మకారణా, నత్థి చ కారణికాతి? ఆమన్తా. అత్థి మనుస్సేసు కమ్మకారణా, నత్థి చ కారణికాతి? న హేవం వత్తబ్బే…పే….
౮౬౭. అత్థి నిరయేసు నిరయపాలాతి? ఆమన్తా. నను వుత్తం భగవతా –
‘‘న వేస్సభూ నోపి చ పేత్తిరాజా,
సోమో యమో వేస్సవణో చ రాజా;
సకాని కమ్మాని హనన్తి తత్థ, ఇతో పణున్నం [పణుణ్ణం (స్యా. క.), పనున్నం (సీ.)] పరలోకపత్త’’న్తి.
అత్థేవ సుత్తన్తోతి? ఆమన్తా. తేన హి నత్థి నిరయేసు నిరయపాలాతి.
౮౬౮. నత్థి నిరయేసు నిరయపాలాతి? ఆమన్తా. నను వుత్తం భగవతా – ‘‘తమేనం, భిక్ఖవే, నిరయపాలా పఞ్చవిధబన్ధనం నామ కారణం కారేన్తి [కరోన్తి (మ. ని. ౩.౨౫౦; అ. ని. ౩.౩౬)] – తత్తం అయోఖీలం హత్థే గమేన్తి, తత్తం అయోఖీలం దుతియే హత్థే గమేన్తి, తత్తం అయోఖీలం పాదే గమేన్తి, తత్తం అయోఖీలం దుతియే పాదే గమేన్తి, తత్తం అయోఖీలం మజ్ఝేఉరస్మిం గమేన్తి; సో తత్థ దుక్ఖా తిబ్బా కటుకా వేదనా వేదేతి; న చ తావ కాలం కరోతి యావ న తం పాపకమ్మం బ్యన్తీహోతీ’’తి [మ. ని. ౩.౨౫౦; అ. ని. ౩.౩౬]! అత్థేవ సుత్తన్తోతి? ఆమన్తా. తేన హి అత్థి నిరయేసు నిరయపాలాతి.
నత్థి నిరయేసు నిరయపాలాతి? ఆమన్తా. నను వుత్తం భగవతా – ‘‘తమేనం, భిక్ఖవే, నిరయపాలా సంవేసేత్వా కుఠారీహి [కుధారీహి (సబ్బత్థ)] తచ్ఛన్తి…పే… తమేనం, భిక్ఖవే, నిరయపాలా ఉద్ధమ్పాదం అధోసిరం ఠపేత్వా వాసీహి తచ్ఛన్తి…పే… తమేనం, భిక్ఖవే, నిరయపాలా రథే యోజేత్వా ఆదిత్తాయ పథవియా సమ్పజ్జలితాయ సజోతిభూతాయ [సఞ్జోతిభూతాయ (స్యా.)] సారేన్తిపి పచ్చాసారేన్తిపి…పే… తమేనం, భిక్ఖవే, నిరయపాలా మహన్తం అఙ్గారపబ్బతం ఆదిత్తం సమ్పజ్జలితం సజోతిభూతం ఆరోపేన్తిపి ఓరోపేన్తిపి…పే… తమేనం, భిక్ఖవే, నిరయపాలా ఉద్ధమ్పాదం అధోసిరం గహేత్వా తత్తాయ లోహకుమ్భియా పక్ఖిపన్తి ఆదిత్తాయ సమ్పజ్జలితాయ సజోతిభూతాయ. సో తత్థ ఫేణుద్దేహకం పచ్చతి, సో తత్థ ఫేణుద్దేహకం పచ్చమానో సకిమ్పి ఉద్ధం గచ్ఛతి, సకిమ్పి అధో గచ్ఛతి, సకిమ్పి తిరియం గచ్ఛతి. సో తత్థ దుక్ఖా తిబ్బా కటుకా వేదనా వేదయతి, న చ తావ కాలం కరోతి యావ న తం పాపకమ్మం బ్యన్తీహోతి. తమేనం, భిక్ఖవే, నిరయపాలా మహానిరయే పక్ఖిపన్తి! సో ఖో పన, భిక్ఖవే, మహానిరయో –
‘‘చతుక్కణ్ణో చతుద్వారో, విభత్తో భాగసో మితో;
అయోపాకారపరియన్తో, అయసా పటికుజ్జితో.
‘‘తస్స అయోమయా భూమి, జలితా తేజసా యుతా;
సమన్తా యోజనసతం, ఫరిత్వా తిట్ఠతి సబ్బదా’’తి [మ. ని. ౩.౨౫౦; అ. ని. ౩.౩౬; పే. వ. ౭౧].
అత్థేవ సుత్తన్తోతి? ఆమన్తా. తేన హి అత్థి నిరయేసు నిరయపాలాతి.
నిరయపాలకథా నిట్ఠితా.
౨౦. వీసతిమవగ్గో
(౧౯౭) ౪. తిరచ్ఛానకథా
౮౬౯. అత్థి దేవేసు తిరచ్ఛానగతాతి? ఆమన్తా. అత్థి తిరచ్ఛానగతేసు దేవాతి? న హేవం వత్తబ్బే…పే… అత్థి దేవేసు తిరచ్ఛానగతాతి? ఆమన్తా. దేవలోకో తిరచ్ఛానయోనీతి? న హేవం వత్తబ్బే…పే… అత్థి దేవేసు తిరచ్ఛానగతాతి? ఆమన్తా. అత్థి తత్థ కీటా పటఙ్గా మకసా మక్ఖికా అహీ విచ్ఛికా సతపదీ గణ్డుప్పాదాతి [గణ్డుపాదాతి (స్యా. కం. పీ.)]? న హేవం వత్తబ్బే…పే….
౮౭౦. నత్థి దేవేసు తిరచ్ఛానగతాతి? ఆమన్తా. నను అత్థి తత్థ ఏరావణో నామ హత్థినాగో సహస్సయుత్తం దిబ్బం యానన్తి? ఆమన్తా. హఞ్చి అత్థి తత్థ ఏరావణో నామ హత్థినాగో సహస్సయుత్తం దిబ్బం యానం, తేన వత రే వత్తబ్బే – ‘‘అత్థి దేవేసు తిరచ్ఛానగతా’’తి.
౮౭౧. అత్థి దేవేసు తిరచ్ఛానగతాతి? ఆమన్తా. అత్థి తత్థ హత్థిబన్ధా అస్సబన్ధా [హత్థిభణ్డా అస్సభణ్డా (?)] యావసికా కారణికా భత్తకారకాతి? న హేవం వత్తబ్బే. తేన హి నత్థి దేవేసు తిరచ్ఛానగతాతి.
తిరచ్ఛానకథా నిట్ఠితా.
౨౦. వీసతిమవగ్గో
(౧౯౮) ౫. మగ్గకథా
౮౭౨. పఞ్చఙ్గికో మగ్గోతి? ఆమన్తా. నను అట్ఠఙ్గికో మగ్గో వుత్తో భగవతా, సేయ్యథిదం – సమ్మాదిట్ఠి…పే… సమ్మాసమాధీతి? ఆమన్తా. హఞ్చి అట్ఠఙ్గికో మగ్గో వుత్తో భగవతా, సేయ్యథిదం – సమ్మాదిట్ఠి …పే… సమ్మాసమాధి, నో చ వత రే వత్తబ్బే – ‘‘పఞ్చఙ్గికో మగ్గో’’తి.
పఞ్చఙ్గికో మగ్గోతి? ఆమన్తా. నను వుత్తం భగవతా –
‘‘మగ్గానం అట్ఠఙ్గికో సేట్ఠో, సచ్చానం చతురో పదా;
విరాగో సేట్ఠో ధమ్మానం, ద్విపదానఞ్చ చక్ఖుమా’’తి [ధ. ప. ౨౭౩ ధమ్మపదే].
అత్థేవ సుత్తన్తోతి? ఆమన్తా. తేన హి అట్ఠఙ్గికో మగ్గోతి.
౮౭౩. సమ్మావాచా మగ్గఙ్గం, సా చ న మగ్గోతి? ఆమన్తా. సమ్మాదిట్ఠి మగ్గఙ్గం, సా చ న మగ్గోతి? న హేవం వత్తబ్బే…పే… సమ్మావాచా మగ్గఙ్గం, సా చ న మగ్గోతి? ఆమన్తా. సమ్మాసఙ్కప్పో…పే… సమ్మావాయామో…పే… సమ్మాసతి…పే… సమ్మాసమాధి మగ్గఙ్గం, సో చ న మగ్గోతి? న హేవం వత్తబ్బే…పే….
సమ్మాకమ్మన్తో…పే… సమ్మాఆజీవో మగ్గఙ్గం, సో చ న మగ్గోతి? ఆమన్తా. సమ్మాదిట్ఠి…పే… సమ్మాసమాధి మగ్గఙ్గం, సో చ న మగ్గోతి? న హేవం వత్తబ్బే…పే….
సమ్మాదిట్ఠి మగ్గఙ్గం, సా చ మగ్గోతి? ఆమన్తా. సమ్మావాచా మగ్గఙ్గం, సా చ మగ్గోతి? న హేవం వత్తబ్బే…పే… సమ్మాదిట్ఠి మగ్గఙ్గం, సా చ మగ్గోతి? ఆమన్తా. సమ్మాకమ్మన్తో…పే… సమ్మాఆజీవో మగ్గఙ్గం, సో చ మగ్గోతి? న హేవం వత్తబ్బే…పే….
సమ్మాసఙ్కప్పో…పే… సమ్మావాయామో…పే… సమ్మాసతి…పే… సమ్మాసమాధి మగ్గఙ్గం, సో చ మగ్గోతి? ఆమన్తా. సమ్మావాచా…పే… సమ్మాకమ్మన్తో…పే… సమ్మాఆజీవో మగ్గఙ్గం, సో చ మగ్గోతి? న హేవం వత్తబ్బే…పే….
౮౭౪. అరియో అట్ఠఙ్గికో మగ్గోతి? ఆమన్తా. నను వుత్తం భగవతా – ‘‘పుబ్బేవ ఖో పనస్స కాయకమ్మం వచీకమ్మం ఆజీవో సుపరిసుద్ధో హోతి; ఏవమస్సాయం అరియో అట్ఠఙ్గికో మగ్గో భావనాపారిపూరిం గచ్ఛతీ’’తి [మ. ని. ౩.౪౩౧]! అత్థేవ సుత్తన్తోతి? ఆమన్తా. తేన హి పఞ్చఙ్గికో మగ్గోతి.
౮౭౫. పఞ్చఙ్గికో మగ్గోతి? ఆమన్తా. నను వుత్తం భగవతా – ‘‘యస్మిం ఖో, సుభద్ద, ధమ్మవినయే అరియో అట్ఠఙ్గికో మగ్గో న ఉపలబ్భతి, సమణోపి తత్థ న ఉపలబ్భతి, దుతియోపి తత్థ సమణో న ఉపలబ్భతి, తతియోపి తత్థ సమణో న ఉపలబ్భతి, చతుత్థోపి తత్థ సమణో న ఉపలబ్భతి. యస్మిఞ్చ ఖో, సుభద్ద, ధమ్మవినయే అరియో అట్ఠఙ్గికో మగ్గో ఉపలబ్భతి, సమణోపి తత్థ ఉపలబ్భతి, దుతియోపి…పే… తతియోపి…పే… చతుత్థోపి తత్థ సమణో ఉపలబ్భతి. ఇమస్మిం ఖో, సుభద్ద, ధమ్మవినయే అరియో అట్ఠఙ్గికో మగ్గో ఉపలబ్భతి. ఇధేవ, సుభద్ద, సమణో, ఇధ దుతియో సమణో, ఇధ తతియో సమణో, ఇధ చతుత్థో సమణో. సుఞ్ఞా పరప్పవాదా సమణేభి అఞ్ఞేహీ’’తి [దీ. ని. ౨.౨౧౪]! అత్థేవ సుత్తన్తోతి? ఆమన్తా. తేన హి అట్ఠఙ్గికో మగ్గోతి.
మగ్గకథా నిట్ఠితా.
౨౦. వీసతిమవగ్గో
(౧౯౯) ౬. ఞాణకథా
౮౭౬. ద్వాదసవత్థుకం ఞాణం లోకుత్తరన్తి? ఆమన్తా. ద్వాదస లోకుత్తరఞాణానీతి? న హేవం వత్తబ్బే…పే… ద్వాదస లోకుత్తరఞాణానీతి? ఆమన్తా. ద్వాదస సోతాపత్తిమగ్గాతి? న హేవం వత్తబ్బే…పే… ద్వాదస సోతాపత్తిమగ్గాతి? ఆమన్తా. ద్వాదస సోతాపత్తిఫలానీతి? న హేవం వత్తబ్బే…పే… ద్వాదస సకదాగామిమగ్గా…పే… అనాగామిమగ్గా…పే… అరహత్తమగ్గాతి? న హేవం వత్తబ్బే…పే… ద్వాదస అరహత్తమగ్గాతి? ఆమన్తా. ద్వాదస అరహత్తఫలానీతి? న హేవం వత్తబ్బే…పే….
౮౭౭. న వత్తబ్బం – ‘‘ద్వాదసవత్థుకం ఞాణం లోకుత్తర’’న్తి? ఆమన్తా. నను వుత్తం భగవతా – ‘‘ఇదం దుక్ఖం అరియసచ్చ’’న్తి మే, భిక్ఖవే, పుబ్బే అననుస్సుతేసు ధమ్మేసు చక్ఖుం ఉదపాది, ఞాణం ఉదపాది, పఞ్ఞా ఉదపాది, విజ్జా ఉదపాది, ఆలోకో ఉదపాది. ‘తం ఖో పనిదం దుక్ఖం అరియసచ్చం పరిఞ్ఞేయ్య’న్తి మే, భిక్ఖవే…పే… పరిఞ్ఞాతన్తి మే, భిక్ఖవే…పే… ‘ఇదం దుక్ఖసముదయం [దుక్ఖసముదయో (స్యా. కం. పీ.)] అరియసచ్చ’న్తి మే, భిక్ఖవే…పే… ‘తం ఖో పనిదం దుక్ఖసముదయం అరియసచ్చం పహాతబ్బ’న్తి మే, భిక్ఖవే…పే… పహీనన్తి మే, భిక్ఖవే…పే… ‘ఇదం దుక్ఖనిరోధం [దుక్ఖనిరోధా (స్యా. కం. పీ.)] అరియసచ్చ’న్తి మే, భిక్ఖవే…పే… ‘తం ఖో పనిదం దుక్ఖనిరోధం అరియసచ్చం సచ్ఛికాతబ్బ’న్తి మే, భిక్ఖవే…పే… సచ్ఛికతన్తి మే, భిక్ఖవే…పే… ‘ఇదం దుక్ఖనిరోధగామినీ పటిపదా అరియసచ్చ’న్తి మే, భిక్ఖవే…పే… ‘తం ఖో పనిదం దుక్ఖనిరోధగామినీ పటిపదా అరియసచ్చం భావేతబ్బ’న్తి మే, భిక్ఖవే…పే… భావితన్తి మే, భిక్ఖవే, పుబ్బే అననుస్సుతేసు ధమ్మేసు చక్ఖుం ఉదపాది…పే… ఆలోకో ఉదపాదీ’’తి [మహావ. ౧౫; సం. ని. ౫.౧౦౮౧; పటి. మ. ౨.౩౦]! అత్థేవ సుత్తన్తోతి? ఆమన్తా. తేన హి ద్వాదసవత్థుకం ఞాణం లోకుత్తరన్తి.
ఞాణకథా నిట్ఠితా.
వీసతిమవగ్గో.
తస్సుద్దానం –
మాతుఘాతకో ఆనన్తరికో పితుఘాతకో ఆనన్తరికో అరహన్తఘాతకో ఆనన్తరికో రుహిరుప్పాదకో ఆనన్తరికో సఙ్ఘభేదకో ఆనన్తరికో, నత్థి పుథుజ్జనస్స ఞాణం, నత్థి నిరయేసు నిరయపాలా, అత్థి దేవేసు తిరచ్ఛానగతా, పఞ్చఙ్గికో మగ్గో, ద్వాదసవత్థుకం ఞాణం లోకుత్తరన్తి.
చతుత్థో పణ్ణాసకో.
తస్సుద్దానం –
నిగ్గహో, పుఞ్ఞసఞ్చయో, అట్ఠాసి, అతీతేన చ మాతుఘాతకో.