౧౮. అట్ఠారసమవగ్గో

(౧౮౦) ౪. గన్ధజాతికథా

౮౦౯. బుద్ధస్స భగవతో ఉచ్చారపస్సావో అతివియ అఞ్ఞే గన్ధజాతే అధిగ్గణ్హాతీతి? ఆమన్తా. భగవా గన్ధభోజీతి? న హేవం వత్తబ్బే…పే… నను భగవా ఓదనకుమ్మాసం భుఞ్జతీతి? ఆమన్తా. హఞ్చి భగవా ఓదనకుమ్మాసం భుఞ్జతి, నో చ వత రే వత్తబ్బే – ‘‘బుద్ధస్స భగవతో ఉచ్చారపస్సావో అతివియ అఞ్ఞే గన్ధజాతే అధిగ్గణ్హాతీ’’తి.

బుద్ధస్స భగవతో ఉచ్చారపస్సావో అతివియ అఞ్ఞే గన్ధజాతే అధిగ్గణ్హాతీతి? ఆమన్తా. అత్థి కేచి బుద్ధస్స భగవతో ఉచ్చారపస్సావం న్హాయన్తి విలిమ్పన్తి ఉచ్ఛాదేన్తి [ఉచ్చారేన్తి (సీ. పీ. క.)] పేళాయ పటిసామేన్తి కరణ్డాయ నిక్ఖిపన్తి ఆపణే పసారేన్తి, తేన చ గన్ధేన గన్ధకరణీయం కరోన్తీతి? న హేవం వత్తబ్బే…పే….

గన్ధజాతికథా నిట్ఠితా.