౧౬. సోళసమవగ్గో

(౧౬౫) ౧౦. రూపారూపధాతుపరియాపన్నకథా

౭౭౧. రూపరాగో రూపధాతుపరియాపన్నోతి? ఆమన్తా. సమాపత్తేసియో ఉపపత్తేసియో దిట్ఠధమ్మసుఖవిహారో, సమాపత్తేసియేన చిత్తేన ఉపపత్తేసియేన చిత్తేన దిట్ఠధమ్మసుఖవిహారేన చిత్తేన సహగతో సహజాతో సంసట్ఠో సమ్పయుత్తో ఏకుప్పాదో ఏకనిరోధో ఏకవత్థుకో ఏకారమ్మణోతి? న హేవం వత్తబ్బే…పే… నను న సమాపత్తేసియో న ఉపపత్తేసియో న దిట్ఠధమ్మసుఖవిహారో, న సమాపత్తేసియేన చిత్తేన…పే… ఏకవత్థుకో ఏకారమ్మణోతి? ఆమన్తా. హఞ్చి న సమాపత్తేసియో న ఉపపత్తేసియో న దిట్ఠధమ్మసుఖవిహారో, న సమాపత్తేసియేన చిత్తేన…పే… ఏకవత్థుకో ఏకారమ్మణో, నో చ వత రే వత్తబ్బే – ‘‘రూపరాగో రూపధాతుపరియాపన్నో’’తి.

౭౭౨. రూపరాగో రూపధాతుపరియాపన్నోతి? ఆమన్తా. సద్దరాగో సద్దధాతుపరియాపన్నోతి? న హేవం వత్తబ్బే …పే… రూపరాగో రూపధాతుపరియాపన్నోతి? ఆమన్తా. గన్ధరాగో…పే… రసరాగో…పే… ఫోట్ఠబ్బరాగో ఫోట్ఠబ్బధాతుపరియాపన్నోతి? న హేవం వత్తబ్బే…పే….

సద్దరాగో న వత్తబ్బం – ‘‘సద్దధాతుపరియాపన్నో’’తి? ఆమన్తా. రూపరాగో న వత్తబ్బం – ‘‘రూపధాతుపరియాపన్నో’’తి? న హేవం వత్తబ్బే…పే… గన్ధరాగో…పే… రసరాగో…పే… ఫోట్ఠబ్బరాగో న వత్తబ్బం – ‘‘ఫోట్ఠబ్బధాతుపరియాపన్నో’’తి? ఆమన్తా. రూపరాగో న వత్తబ్బం – ‘‘రూపధాతుపరియాపన్నో’’తి? న హేవం వత్తబ్బే…పే….

౭౭౩. అరూపరాగో అరూపధాతుపరియాపన్నోతి? ఆమన్తా. అరూపరాగో న వత్తబ్బం – ‘‘అరూపధాతుపరియాపన్నో’’తి? న హేవం వత్తబ్బే…పే… అరూపరాగో అరూపధాతుపరియాపన్నోతి? ఆమన్తా. సమాపత్తేసియో ఉపపత్తేసియో దిట్ఠధమ్మసుఖవిహారో, సమాపత్తేసియేన చిత్తేన ఉపపత్తేసియేన చిత్తేన దిట్ఠధమ్మసుఖవిహారేన చిత్తేన సహగతో సహజాతో సంసట్ఠో సమ్పయుత్తో ఏకుప్పాదో ఏకనిరోధో ఏకవత్థుకో ఏకారమ్మణోతి? న హేవం వత్తబ్బే…పే… నను న సమాపత్తేసియో న ఉపపత్తేసియో న దిట్ఠధమ్మసుఖవిహారో, న సమాపత్తేసియేన చిత్తేన…పే… ఏకవత్థుకో ఏకారమ్మణోతి? ఆమన్తా. హఞ్చి న సమాపత్తేసియో న ఉపపత్తేసియో న దిట్ఠధమ్మసుఖవిహారో, న సమాపత్తేసియేన చిత్తేన న ఉపపత్తేసియేన చిత్తేన న దిట్ఠధమ్మసుఖవిహారేన చిత్తేన సహగతో సహజాతో సంసట్ఠో సమ్పయుత్తో ఏకుప్పాదో ఏకనిరోధో ఏకవత్థుకో ఏకారమ్మణో, నో చ వత రే వత్తబ్బే – ‘‘అరూపరాగో అరూపధాతుపరియాపన్నో’’తి.

౭౭౪. అరూపరాగో అరూపధాతుపరియాపన్నోతి? ఆమన్తా. సద్దరాగో సద్దధాతుపరియాపన్నోతి? న హేవం వత్తబ్బే…పే… అరూపరాగో అరూపధాతుపరియాపన్నోతి? ఆమన్తా. గన్ధరాగో…పే… రసరాగో…పే… ఫోట్ఠబ్బరాగో ఫోట్ఠబ్బధాతుపరియాపన్నోతి? న హేవం వత్తబ్బే…పే….

సద్దరాగో న వత్తబ్బం – ‘‘సద్దధాతుపరియాపన్నో’’తి? ఆమన్తా. అరూపరాగో న వత్తబ్బం – ‘‘అరూపధాతుపరియాపన్నో’’తి? న హేవం వత్తబ్బే…పే… గన్ధరాగో…పే… రసరాగో…పే… ఫోట్ఠబ్బరాగో న వత్తబ్బం – ‘‘ఫోట్ఠబ్బధాతుపరియాపన్నో’’తి? ఆమన్తా. అరూపరాగో న వత్తబ్బం – ‘‘అరూపధాతుపరియాపన్నో’’తి? న హేవం వత్తబ్బే…పే….

౭౭౫. న వత్తబ్బం – ‘‘రూపరాగో రూపధాతుపరియాపన్నో, అరూపరాగో అరూపధాతుపరియాపన్నో’’తి? ఆమన్తా. నను కామరాగో కామధాతుపరియాపన్నోతి? ఆమన్తా. హఞ్చి కామరాగో కామధాతుపరియాపన్నో, తేన వత రే వత్తబ్బే – ‘‘రూపరాగో రూపధాతుపరియాపన్నో, అరూపరాగో అరూపధాతుపరియాపన్నో’’తి.

రూపరాగో రూపధాతుపరియాపన్నో అరూపరాగో అరూపధాతుపరియాపన్నోతికథా నిట్ఠితా.

రూపారూపధాతుపరియాపన్నకథా నిట్ఠితా.

సోళసమవగ్గో.

తస్సుద్దానం –

చిత్తనిగ్గహో, చిత్తపగ్గహో, సుఖానుప్పదానం, అధిగయ్హ మనసికారో, రూపం హేతు, రూపం సహేతుకం, రూపం కుసలమ్పి అకుసలమ్పి, రూపం విపాకో, అత్థి రూపం రూపావచరం అత్థి రూపం అరూపావచరం, సబ్బే కిలేసా కామధాతుపరియాపన్నాతి.