౧౫. పన్నరసమవగ్గో

(౧౪౬) ౨. అఞ్ఞమఞ్ఞపచ్చయకథా

౭౧౮. అవిజ్జాపచ్చయావ సఙ్ఖారా, న వత్తబ్బం – ‘‘సఙ్ఖారపచ్చయాపి అవిజ్జా’’తి? ఆమన్తా. నను అవిజ్జా సఙ్ఖారేన సహజాతాతి? ఆమన్తా. హఞ్చి అవిజ్జా సఙ్ఖారేన సహజాతా, తేన వత రే వత్తబ్బే – ‘‘అవిజ్జాపచ్చయాపి సఙ్ఖారా, సఙ్ఖారపచ్చయాపి అవిజ్జా’’తి.

తణ్హాపచ్చయావ ఉపాదానం, న వత్తబ్బం – ‘‘ఉపాదానపచ్చయాపి తణ్హా’’తి? ఆమన్తా. నను తణ్హా ఉపాదానేన సహజాతాతి? ఆమన్తా. హఞ్చి తణ్హా ఉపాదానేన సహజాతా, తేన వత రే వత్తబ్బే – ‘‘తణ్హాపచ్చయాపి ఉపాదానం, ఉపాదానపచ్చయాపి తణ్హా’’తి.

౭౧౯. ‘‘జరామరణపచ్చయా, భిక్ఖవే, జాతి, జాతిపచ్చయా భవో’’తి – అత్థేవ సుత్తన్తోతి? నత్థి. తేన హి అవిజ్జాపచ్చయావ సఙ్ఖారా, న వత్తబ్బం – ‘‘సఙ్ఖారపచ్చయాపి అవిజ్జా’’తి. తణ్హాపచ్చయావ ఉపాదానం, న వత్తబ్బం – ‘‘ఉపాదానపచ్చయాపి తణ్హా’’తి.

‘‘విఞ్ఞాణపచ్చయా, భిక్ఖవే, నామరూపం, నామరూపపచ్చయాపి విఞ్ఞాణ’’న్తి [దీ. ని. ౨.౫౮, థోకం పన విసదిసం] – అత్థేవ సుత్తన్తోతి? ఆమన్తా. తేన హి అవిజ్జాపచ్చయాపి సఙ్ఖారా, సఙ్ఖారపచ్చయాపి అవిజ్జా; తణ్హాపచ్చయాపి ఉపాదానం, ఉపాదానపచ్చయాపి తణ్హాతి.

అఞ్ఞమఞ్ఞపచ్చయకథా నిట్ఠితా.