౧౪. చుద్దసమవగ్గో

(౧౪౪) ౯. అపరియాపన్నకథా

౭౦౯. దిట్ఠిగతం అపరియాపన్నన్తి? ఆమన్తా. మగ్గో ఫలం నిబ్బానం, సోతాపత్తిమగ్గో సోతాపత్తిఫలం, సకదాగామిమగ్గో సకదాగామిఫలం, అనాగామిమగ్గో అనాగామిఫలం, అరహత్తమగ్గో అరహత్తఫలం, సతిపట్ఠానం సమ్మప్పధానం ఇద్ధిపాదో ఇన్ద్రియం బలం బోజ్ఝఙ్గోతి? న హేవం వత్తబ్బే…పే….

౭౧౦. న వత్తబ్బం – ‘‘దిట్ఠిగతం అపరియాపన్న’’న్తి? ఆమన్తా. పుథుజ్జనో ‘‘కామేసు వీతరాగో’’తి వత్తబ్బోతి? ఆమన్తా. ‘‘విగతదిట్ఠియో’’తి వత్తబ్బోతి? న హేవం వత్తబ్బే. తేన హి దిట్ఠిగతం అపరియాపన్నన్తి.

అపరియాపన్నకథా నిట్ఠితా.

చుద్దసమవగ్గో.

తస్సుద్దానం –

అకుసలమూలం పటిసన్దహతి కుసలమూలం, కుసలమూలం పటిసన్దహతి అకుసలమూలం, సళాయతనం ఛవిఞ్ఞాణకాయా, అరియరూపం మహాభూతానం ఉపాదాయ, స్వేవ అనుసయో తం పరియుట్ఠానం, పరియుట్ఠానం చిత్తవిప్పయుత్తం, యథాధాతు తఞ్ఞేవ అనుసేతి, దిట్ఠిగతం అబ్యాకతం, దిట్ఠిగతం అపరియాపన్నన్తి.