౧౪. చుద్దసమవగ్గో

(౧౪౨) ౭. పరియాపన్నకథా

౭౦౩. రూపరాగో రూపధాతుం అనుసేతి, రూపధాతుపరియాపన్నోతి? ఆమన్తా. సమాపత్తేసియో ఉపపత్తేసియో దిట్ఠధమ్మసుఖవిహారో, సమాపత్తేసియేన చిత్తేన ఉపపత్తేసియేన చిత్తేన దిట్ఠధమ్మసుఖవిహారేన చిత్తేన సహగతో సహజాతో సంసట్ఠో సమ్పయుత్తో ఏకుప్పాదో ఏకనిరోధో ఏకవత్థుకో ఏకారమ్మణోతి? న హేవం వత్తబ్బే…పే… నను న సమాపత్తేసియో న ఉపపత్తేసియో న దిట్ఠధమ్మసుఖవిహారో, న సమాపత్తేసియేన చిత్తేన న ఉపపత్తేసియేన చిత్తేన న దిట్ఠధమ్మసుఖవిహారేన చిత్తేన సహగతో సహజాతో సంసట్ఠో సమ్పయుత్తో ఏకుప్పాదో ఏకనిరోధో ఏకవత్థుకో ఏకారమ్మణోతి? ఆమన్తా. హఞ్చి న సమాపత్తేసియో న ఉపపత్తేసియో న దిట్ఠధమ్మసుఖవిహారో…పే… ఏకారమ్మణో, నో చ వత రే వత్తబ్బే – ‘‘రూపరాగో రూపధాతుం అనుసేతి, రూపధాతుపరియాపన్నో’’తి…పే….

రూపరాగో రూపధాతుం అనుసేతి, రూపధాతుపరియాపన్నోతి? ఆమన్తా. సద్దరాగో సద్దధాతుం అనుసేతి, సద్దధాతుపరియాపన్నోతి? న హేవం వత్తబ్బే…పే… రూపరాగో రూపధాతుం అనుసేతి, రూపధాతుపరియాపన్నోతి? ఆమన్తా. గన్ధరాగో…పే… రసరాగో…పే… ఫోట్ఠబ్బరాగో ఫోట్ఠబ్బధాతుం అనుసేతి, ఫోట్ఠబ్బధాతుపరియాపన్నోతి? న హేవం వత్తబ్బే…పే….

సద్దరాగో సద్దధాతుం అనుసేతి, న వత్తబ్బం – ‘‘సద్దధాతుపరియాపన్నో’’తి? ఆమన్తా. రూపరాగో రూపధాతుం అనుసేతి, న వత్తబ్బం – ‘‘రూపధాతుపరియాపన్నో’’తి? న హేవం వత్తబ్బే…పే… గన్ధరాగో…పే… రసరాగో…పే… ఫోట్ఠబ్బరాగో ఫోట్ఠబ్బధాతుం అనుసేతి, న వత్తబ్బం – ‘‘ఫోట్ఠబ్బధాతుపరియాపన్నో’’తి? ఆమన్తా. రూపరాగో రూపధాతుం అనుసేతి, న వత్తబ్బం – ‘‘రూపధాతుపరియాపన్నో’’తి? న హేవం వత్తబ్బే…పే….

౭౦౪. అరూపరాగో అరూపధాతుం అనుసేతి, అరూపధాతుపరియాపన్నోతి? ఆమన్తా. సమాపత్తేసియో ఉపపత్తేసియో దిట్ఠధమ్మసుఖవిహారో, సమాపత్తేసియేన చిత్తేన ఉపపత్తేసియేన చిత్తేన దిట్ఠధమ్మసుఖవిహారేన చిత్తేన సహగతో సహజాతో సంసట్ఠో సమ్పయుత్తో ఏకుప్పాదో ఏకనిరోధో ఏకవత్థుకో ఏకారమ్మణోతి? న హేవం వత్తబ్బే…పే…. నను న సమాపత్తేసియో న ఉపపత్తేసియో న దిట్ఠధమ్మసుఖవిహారో, న సమాపత్తేసియేన చిత్తేన…పే… ఏకారమ్మణోతి? ఆమన్తా. హఞ్చి న సమాపత్తేసియో న ఉపపత్తేసియో…పే… ఏకారమ్మణో, నో చ వత రే వత్తబ్బే – ‘‘అరూపరాగో అరూపధాతుం అనుసేతి, అరూపధాతుపరియాపన్నో’’తి.

అరూపరాగో అరూపధాతుం అనుసేతి, అరూపధాతుపరియాపన్నోతి? ఆమన్తా. సద్దరాగో సద్దధాతుం అనుసేతి, సద్దధాతుపరియాపన్నోతి? న హేవం వత్తబ్బే…పే… అరూపరాగో అరూపధాతుం అనుసేతి, అరూపధాతుపరియాపన్నోతి? ఆమన్తా. గన్ధరాగో…పే… రసరాగో…పే… ఫోట్ఠబ్బరాగో ఫోట్ఠబ్బధాతుం అనుసేతి, ఫోట్ఠబ్బధాతుపరియాపన్నోతి? న హేవం వత్తబ్బే…పే….

సద్దరాగో సద్దధాతుం అనుసేతి, న వత్తబ్బం – ‘‘సద్దధాతుపరియాపన్నో’’తి? ఆమన్తా. అరూపరాగో అరూపధాతుం అనుసేతి, న వత్తబ్బం – ‘‘అరూపధాతుపరియాపన్నో’’తి, న హేవం వత్తబ్బే…పే… గన్ధరాగో…పే… రసరాగో…పే… ఫోట్ఠబ్బరాగో ఫోట్ఠబ్బధాతుం అనుసేతి, న వత్తబ్బం – ‘‘ఫోట్ఠబ్బధాతుపరియాపన్నో’’తి? ఆమన్తా. అరూపరాగో అరూపధాతుం అనుసేతి, న వత్తబ్బం – ‘‘అరూపధాతుపరియాపన్నో’’తి? న హేవం వత్తబ్బే…పే….

౭౦౫. న వత్తబ్బం – ‘‘రూపరాగో రూపధాతుం అనుసేతి రూపధాతుపరియాపన్నో, అరూపరాగో అరూపధాతుం అనుసేతి అరూపధాతుపరియాపన్నో’’తి? ఆమన్తా. నను కామరాగో కామధాతుం అనుసేతి, కామధాతుపరియాపన్నోతి? ఆమన్తా. హఞ్చి కామరాగో కామధాతుం అనుసేతి కామధాతుపరియాపన్నో, తేన వత రే వత్తబ్బే – ‘‘రూపరాగో రూపధాతుం అనుసేతి రూపధాతుపరియాపన్నో, అరూపరాగో అరూపధాతుం అనుసేతి అరూపధాతుపరియాపన్నో’’తి.

పరియాపన్నకథా నిట్ఠితా.