(౧౩౬) ౧. కుసలాకుసలపటిసన్దహనకథా

౬౮౬. అకుసలమూలం పటిసన్దహతి కుసలమూలన్తి? ఆమన్తా. యా అకుసలస్స ఉప్పాదాయ ఆవట్టనా…పే… పణిధి, సావ కుసలస్స ఉప్పాదాయ ఆవట్టనా…పే… పణిధీతి? న హేవం వత్తబ్బే…పే….

అకుసలమూలం పటిసన్దహతి కుసలమూలం, న వత్తబ్బం – ‘‘యా అకుసలస్స ఉప్పాదాయ ఆవట్టనా…పే… పణిధి, సావ కుసలస్స ఉప్పాదాయ ఆవట్టనా…పే… పణిధీ’’తి? ఆమన్తా. కుసలం అనావట్టేన్తస్స [అనావట్టన్తస్స (సీ. పీ. క.), అనావజ్జన్తస్స (స్యా. కం.)] ఉప్పజ్జతి …పే… అప్పణిదహన్తస్స ఉప్పజ్జతీతి? న హేవం వత్తబ్బే…పే… నను కుసలం ఆవట్టేన్తస్స ఉప్పజ్జతి…పే… పణిదహన్తస్స ఉప్పజ్జతీతి? ఆమన్తా. హఞ్చి కుసలం ఆవట్టేన్తస్స ఉప్పజ్జతి…పే… పణిదహన్తస్స ఉప్పజ్జతి, నో చ వత రే వత్తబ్బే – ‘‘అకుసలమూలం పటిసన్దహతి కుసలమూల’’న్తి.

౬౮౭. అకుసలమూలం పటిసన్దహతి కుసలమూలన్తి? ఆమన్తా. అకుసలమూలం అయోనిసో మనసికరోతో ఉప్పజ్జతీతి? ఆమన్తా. కుసలం అయోనిసో మనసికరోతో ఉప్పజ్జతీతి? న హేవం వత్తబ్బే…పే… నను కుసలం యోనిసో మనసికరోతో ఉప్పజ్జతీతి? ఆమన్తా. హఞ్చి కుసలం యోనిసో మనసికరోతో ఉప్పజ్జతి, నో చ వత రే వత్తబ్బే – ‘‘అకుసలమూలం పటిసన్దహతి కుసలమూల’’న్తి.

అకుసలమూలం పటిసన్దహతి కుసలమూలన్తి? ఆమన్తా. కామసఞ్ఞాయ అనన్తరా నేక్ఖమ్మసఞ్ఞా ఉప్పజ్జతి, బ్యాపాదసఞ్ఞాయ అనన్తరా అబ్యాపాదసఞ్ఞా ఉప్పజ్జతి, విహింసాసఞ్ఞాయ అనన్తరా అవిహింసాసఞ్ఞా ఉప్పజ్జతి, బ్యాపాదస్స అనన్తరా మేత్తా ఉప్పజ్జతి, విహింసాయ అనన్తరా కరుణా ఉప్పజ్జతి, అరతియా అనన్తరా ముదితా ఉప్పజ్జతి, పటిఘస్స అనన్తరా ఉపేక్ఖా ఉప్పజ్జతీతి? న హేవం వత్తబ్బే…పే….

౬౮౮. కుసలమూలం పటిసన్దహతి అకుసలమూలన్తి? ఆమన్తా. యా కుసలస్స ఉప్పాదాయ ఆవట్టనా…పే… పణిధి, సావ అకుసలస్స ఉప్పాదాయ ఆవట్టనా…పే… పణిధీతి? న హేవం వత్తబ్బే…పే….

కుసలమూలం పటిసన్దహతి అకుసలమూలం, న వత్తబ్బం – ‘‘యా కుసలస్స ఉప్పాదాయ ఆవట్టనా…పే… పణిధి, సావ అకుసలస్స ఉప్పాదాయ ఆవట్టనా…పే… పణిధీ’’తి? ఆమన్తా. అకుసలం అనావట్టేన్తస్స ఉప్పజ్జతి…పే… అప్పణిదహన్తస్స ఉప్పజ్జతీతి? న హేవం వత్తబ్బే…పే… నను అకుసలం ఆవట్టేన్తస్స ఉప్పజ్జతి…పే… పణిదహన్తస్స ఉప్పజ్జతీతి? ఆమన్తా. హఞ్చి అకుసలం ఆవట్టేన్తస్స ఉప్పజ్జతి…పే… పణిదహన్తస్స ఉప్పజ్జతి, నో చ వత రే వత్తబ్బే – ‘‘కుసలమూలం పటిసన్దహతి అకుసలమూల’’న్తి.

౬౮౯. కుసలమూలం పటిసన్దహతి అకుసలమూలన్తి? ఆమన్తా. కుసలం యోనిసో మనసికరోతో ఉప్పజ్జతీతి? ఆమన్తా. అకుసలం యోనిసో మనసికరోతో ఉప్పజ్జతీతి? న హేవం వత్తబ్బే…పే… నను అకుసలం అయోనిసో మనసికరోతో ఉప్పజ్జతీతి? ఆమన్తా. హఞ్చి అకుసలం అయోనిసో మనసికరోతో ఉప్పజ్జతి, నో చ వత రే వత్తబ్బే – ‘‘కుసలమూలం పటిసన్దహతి అకుసలమూల’’న్తి.

కుసలమూలం పటిసన్దహతి అకుసలమూలన్తి? ఆమన్తా. నేక్ఖమ్మసఞ్ఞాయ అనన్తరా కామసఞ్ఞా ఉప్పజ్జతి, అబ్యాపాదసఞ్ఞాయ అనన్తరా బ్యాపాదసఞ్ఞా ఉప్పజ్జతి, అవిహింసాసఞ్ఞాయ అనన్తరా విహింసాసఞ్ఞా ఉప్పజ్జతి, మేత్తాయ అనన్తరా బ్యాపాదో ఉప్పజ్జతి, కరుణాయ అనన్తరా విహింసా ఉప్పజ్జతి, ముదితాయ అనన్తరా అరతి ఉప్పజ్జతి, ఉపేక్ఖాయ అనన్తరా పటిఘం ఉప్పజ్జతీతి? న హేవం వత్తబ్బే…పే….

౬౯౦. న వత్తబ్బం – ‘‘అకుసలమూలం పటిసన్దహతి కుసలమూలం, కుసలమూలం పటిసన్దహతి అకుసలమూల’’న్తి? ఆమన్తా. నను యస్మింయేవ వత్థుస్మిం రజ్జతి తస్మిఞ్ఞేవ వత్థుస్మిం విరజ్జతి, యస్మింయేవ వత్థుస్మిం విరజ్జతి తస్మిఞ్ఞేవ వత్థుస్మిం రజ్జతీతి? ఆమన్తా. హఞ్చి యస్మిఞ్ఞేవ వత్థుస్మిం రజ్జతి తస్మిఞ్ఞేవ వత్థుస్మిం విరజ్జతి, యస్మిఞ్ఞేవ వత్థుస్మిం విరజ్జతి తస్మిఞ్ఞేవ వత్థుస్మిం రజ్జతి, తేన వత రే వత్తబ్బే – ‘‘అకుసలమూలం పటిసన్దహతి కుసలమూలం, కుసలమూలం పటిసన్దహతి అకుసలమూల’’న్తి.

కుసలాకుసలపటిసన్దహనకథా నిట్ఠితా.