(౧౩౩) ౮. అసాతరాగకథా

౬౭౪. అత్థి అసాతరాగోతి? ఆమన్తా. దుక్ఖాభినన్దినో సత్తా, అత్థి కేచి దుక్ఖం పత్థేన్తి పిహేన్తి ఏసన్తి గవేసన్తి పరియేసన్తి, దుక్ఖం అజ్ఝోసాయ తిట్ఠన్తీతి? న హేవం వత్తబ్బే…పే… నను సుఖాభినన్దినో సత్తా, అత్థి కేచి సుఖం పత్థేన్తి పిహేన్తి ఏసన్తి గవేసన్తి పరియేసన్తి, సుఖం అజ్ఝోసాయ తిట్ఠన్తీతి? ఆమన్తా. హఞ్చి సుఖాభినన్దినో సత్తా, అత్థి కేచి సుఖం పత్థేన్తి పిహేన్తి ఏసన్తి గవేసన్తి పరియేసన్తి, సుఖం అజ్ఝోసాయ తిట్ఠన్తి, నో చ వత రే వత్తబ్బే – ‘‘అత్థి అసాతరాగో’’తి.

అత్థి అసాతరాగోతి? ఆమన్తా. దుక్ఖాయ వేదనాయ రాగానుసయో అనుసేతి, సుఖాయ వేదనాయ పటిఘానుసయో అనుసేతీతి? న హేవం వత్తబ్బే…పే… నను సుఖాయ వేదనాయ రాగానుసయో అనుసేతి, దుక్ఖాయ వేదనాయ పటిఘానుసయో అనుసేతీతి? ఆమన్తా. హఞ్చి సుఖాయ వేదనాయ రాగానుసయో అనుసేతి, దుక్ఖాయ వేదనాయ పటిఘానుసయో అనుసేతి, నో చ వత రే వత్తబ్బే – ‘‘అత్థి అసాతరాగో’’తి.

౬౭౫. న వత్తబ్బం – ‘‘అత్థి అసాతరాగో’’తి? ఆమన్తా. నను వుత్తం భగవతా – ‘‘సో ఏవం అనురోధవిరోధం సమాపన్నో యం కిఞ్చి వేదనం వేదయతి సుఖం వా దుక్ఖం వా అదుక్ఖమసుఖం వా, సో తం వేదనం అభినన్దతి అభివదతి అజ్ఝోసాయ తిట్ఠతీ’’తి [మ. ని. ౩.౪౦౯ మహాతణ్హాసఙ్ఖయే]! అత్థేవ సుత్తన్తోతి? ఆమన్తా. తేన హి అత్థి అసాతరాగోతి.

అసాతరాగకథా నిట్ఠితా.