(౧౨౭) ౨. కుసలపటిలాభకథా

౬౫౮. కప్పట్ఠో కుసలం చిత్తం న పటిలభేయ్యాతి? ఆమన్తా. కప్పట్ఠో దానం దదేయ్యాతి? ఆమన్తా. హఞ్చి కప్పట్ఠో దానం దదేయ్య, నో చ వత రే వత్తబ్బే – ‘‘కప్పట్ఠో కుసలం చిత్తం న పటిలభేయ్యా’’తి.

కప్పట్ఠో కుసలం చిత్తం న పటిలభేయ్యాతి? ఆమన్తా. కప్పట్ఠో చీవరం దదేయ్య…పే… పిణ్డపాతం దదేయ్య…పే… సేనాసనం దదేయ్య…పే… గిలానపచ్చయభేసజ్జపరిక్ఖారం దదేయ్య … ఖాదనీయం దదేయ్య… భోజనీయం దదేయ్య… పానీయం దదేయ్య… చేతియం వన్దేయ్య… చేతియే మాలం ఆరోపేయ్య… గన్ధం ఆరోపేయ్య… విలేపనం ఆరోపేయ్య…పే… చేతియం అభిదక్ఖిణం [పదక్ఖిణం (పీ.)] కరేయ్యాతి? ఆమన్తా. హఞ్చి కప్పట్ఠో చేతియం అభిదక్ఖిణం కరేయ్య, నో చ వత రే వత్తబ్బే – ‘‘కప్పట్ఠో కుసలం చిత్తం న పటిలభేయ్యా’’తి…పే….

౬౫౯. కప్పట్ఠో కుసలం చిత్తం పటిలభేయ్యాతి? ఆమన్తా. తతో వుట్ఠానం కుసలం చిత్తం పటిలభేయ్యాతి? ఆమన్తా. రూపావచరం…పే… అరూపావచరం…పే… లోకుత్తరం కుసలం చిత్తం పటిలభేయ్యాతి? న హేవం వత్తబ్బే…పే….

కుసలపటిలాభకథా నిట్ఠితా.