(౧౧౭) ౨. కమ్మకథా

౬౩౩. సబ్బం కమ్మం సవిపాకన్తి? ఆమన్తా. సబ్బా చేతనా సవిపాకాతి? న హేవం వత్తబ్బే…పే… సబ్బా చేతనా సవిపాకాతి? ఆమన్తా. విపాకాబ్యాకతా చేతనా సవిపాకాతి? న హేవం వత్తబ్బే…పే… సబ్బా చేతనా సవిపాకాతి? ఆమన్తా. కిరియాబ్యాకతా చేతనా సవిపాకాతి? న హేవం వత్తబ్బే…పే….

సబ్బా చేతనా సవిపాకాతి? ఆమన్తా. కామావచరా విపాకాబ్యాకతా చేతనా సవిపాకాతి? న హేవం వత్తబ్బే…పే… సబ్బా చేతనా సవిపాకాతి? ఆమన్తా. రూపావచరా అరూపావచరా అపరియాపన్నా విపాకాబ్యాకతా చేతనా సవిపాకాతి? న హేవం వత్తబ్బే…పే….

సబ్బా చేతనా సవిపాకాతి? ఆమన్తా. కామావచరా కిరియాబ్యాకతా చేతనా సవిపాకాతి? న హేవం వత్తబ్బే…పే… సబ్బా చేతనా సవిపాకాతి? ఆమన్తా. రూపావచరా అరూపావచరా కిరియాబ్యాకతా చేతనా సవిపాకాతి? న హేవం వత్తబ్బే…పే….

౬౩౪. విపాకాబ్యాకతా చేతనా అవిపాకాతి? ఆమన్తా. హఞ్చి విపాకాబ్యాకతా చేతనా అవిపాకా, నో చ వత రే వత్తబ్బే – ‘‘సబ్బా చేతనా సవిపాకా’’తి.

కిరియాబ్యాకతా చేతనా అవిపాకాతి? ఆమన్తా. హఞ్చి కిరియాబ్యాకతా చేతనా అవిపాకా, నో చ వత రే వత్తబ్బే – ‘‘సబ్బా చేతనా సవిపాకా’’తి.

కామావచరా రూపావచరా అరూపావచరా అపరియాపన్నా విపాకాబ్యాకతా చేతనా అవిపాకాతి? ఆమన్తా. హఞ్చి అపరియాపన్నా విపాకాబ్యాకతా చేతనా అవిపాకా, నో చ వత రే వత్తబ్బే – ‘‘సబ్బా చేతనా సవిపాకా’’తి.

కామావచరా రూపావచరా అరూపావచరా కిరియాబ్యాకతా చేతనా అవిపాకాతి? ఆమన్తా. హఞ్చి అరూపావచరా కిరియాబ్యాకతా చేతనా అవిపాకా, నో చ వత రే వత్తబ్బే – ‘‘సబ్బా చేతనా సవిపాకా’’తి.

౬౩౫. న వత్తబ్బం – ‘‘సబ్బం కమ్మం సవిపాక’’న్తి? ఆమన్తా. నను వుత్తం భగవతా – ‘‘నాహం, భిక్ఖవే, సఞ్చేతనికానం కమ్మానం కతానం ఉపచితానం అప్పటిసంవిదిత్వా బ్యన్తిభావం వదామి, తఞ్చ ఖో దిట్ఠేవ ధమ్మే ఉపపజ్జే [ఉపపజ్జం (అ. ని. ౧౦.౧౭)] వా అపరే వా పరియాయే’’తి [అ. ని. ౧౦.౨౧౭]! అత్థేవ సుత్తన్తోతి? ఆమన్తా. తేన హి సబ్బం కమ్మం సవిపాకన్తి.

కమ్మకథా నిట్ఠితా.