౧౦. దసమవగ్గో

(౧౦౩) ౯. సమాదానహేతుకథా

౫౯౮. సమాదానహేతుకం సీలం వడ్ఢతీతి? ఆమన్తా. సమాదానహేతుకో ఫస్సో వడ్ఢతి, వేదనా వడ్ఢతి, సఞ్ఞా వడ్ఢతి, చేతనా వడ్ఢతి, చిత్తం వడ్ఢతి, సద్ధా వడ్ఢతి, వీరియం వడ్ఢతి, సతి వడ్ఢతి, సమాధి వడ్ఢతి, పఞ్ఞా వడ్ఢతీతి? న హేవం వత్తబ్బే…పే….

సమాదానహేతుకం సీలం వడ్ఢతీతి? ఆమన్తా. లతా వియ వడ్ఢతి, మాలువా వియ వడ్ఢతి, రుక్ఖో వియ వడ్ఢతి, తిణం వియ వడ్ఢతి, ముఞ్జపుఞ్జో వియ వడ్ఢతీతి? న హేవం వత్తబ్బే…పే….

౫౯౯. సమాదానహేతుకం సీలం వడ్ఢతీతి? ఆమన్తా. సీలం సమాదియిత్వా కామవితక్కం వితక్కేన్తస్స బ్యాపాదవితక్కం వితక్కేన్తస్స విహింసావితక్కం వితక్కేన్తస్స సీలం వడ్ఢతీతి? ఆమన్తా. ద్విన్నం ఫస్సానం…పే… ద్విన్నం చిత్తానం సమోధానం హోతీతి? న హేవం వత్తబ్బే…పే… ద్విన్నం ఫస్సానం…పే… ద్విన్నం చిత్తానం సమోధానం హోతీతి? ఆమన్తా. కుసలాకుసలా సావజ్జానవజ్జా హీనపణీతా కణ్హసుక్కసప్పటిభాగా ధమ్మా సమ్ముఖీభావం ఆగచ్ఛన్తీతి? న హేవం వత్తబ్బే…పే….

కుసలాకుసలా సావజ్జానవజ్జా హీనపణీతా కణ్హసుక్కసప్పటిభాగా ధమ్మా సమ్ముఖీభావం ఆగచ్ఛన్తీతి? ఆమన్తా. నను వుత్తం భగవతా – ‘‘చత్తారిమాని, భిక్ఖవే, సువిదూరవిదూరాని! కతమాని చత్తారి? నభఞ్చ, భిక్ఖవే, పథవీ చ – ఇదం పఠమం సువిదూరవిదూరం…పే… తస్మా సతం ధమ్మో అసబ్భి ఆరకా’’తి. అత్థేవ సుత్తన్తోతి? ఆమన్తా. తేన హి న వత్తబ్బం – ‘‘కుసలాకుసలా సావజ్జానవజ్జా హీనపణీతా కణ్హసుక్కసప్పటిభాగా ధమ్మా సమ్ముఖీభావం ఆగచ్ఛన్తీ’’తి.

౬౦౦. న వత్తబ్బం – ‘‘సమాదానహేతుకం సీలం వడ్ఢతీ’’తి? ఆమన్తా. నను వుత్తం భగవతా – ‘‘ఆరామరోపా వనరోపా…పే… ధమ్మట్ఠా సీలసమ్పన్నా తే జనా సగ్గగామినో’’తి. అత్థేవ సుత్తన్తోతి? ఆమన్తా. తేన హి సమాదానహేతుకం సీలం వడ్ఢతీతి.

సమాదానహేతుకథా నిట్ఠితా.